1Qalaxaye so Balaam co'ollaq ila'a da Ñim Nataxala' ỹaỹamaxareeta da somaye ỹasaxalec da no'on la'aqtac so Israel le'ecpi, nache somaye saishet da 'ena'am so hua'auñi ỹo'ot da ichemaxata ca la'aqtac Ñimaye, nacherata da ỹamatalec da pa'aigue ye toolec 'alhua. 2Qaq so Balaam co'ollaq ila'a so Israel le'ecpi da ỹataqtac so netañapi so lpe'lpi so maiche nalamaxat nhuo' le'ecpi, nache so Saqcha'a La'añaxac Ñim Lo'onatac 'Enauacna taigui somaye. 3Ime, nache so Balaam do'onaxaataueeguelo naua la'aqtaqa, 'eeta':
«Da la'aqtaxanaxac na Balaam maye llalec so Beor,
nam ỹale maye huo'o na lauanaqchec,
4nam hua'aqchiguilo naua la'aqtaqa Ñim Lo'onatac 'Enauacna,
qataq ila'alo naua lauanaqcheco Ñim Lo'onatac 'Enauacna
maye Qaica ca Ỹaqalanapec, nam huo'oi naua lauanaqcheco
maye ỹataqta yo'oqteguelo.
5¡'Am Jacob, ỹataqta 'onaxaic na 'arpe'lpi!
¡Ỹataqta no'on na 'aranataqa' 'am Israel!
6'Eeta'am ca la'auaxac da nquictauec,
qataq ca nañiguishe lma' maye no'ot na loigue ca tala,
qataq aca áloe maye lañiguishe Ñim Nataxala',
qataq aca cedropi maye no'ot na loigue ca 'etaxat.
7Qataq sa qoue na 'etaxat, maye laquip qome namayepi,
qataq da icorelec na lañiguishec,
qaq ñi lta'a qalaq napacalec da la'añaxac ñi nta'a Agag,
qataq da lo'onataxanaxac da nta'a qalaq ỹataqta nquictauec.
8Ñim Lo'onatac 'Enauacna maye nqateeguesop ye Egipto namayepi,
Ñimaye 'eeta'am ca huaca no'onaxa le'ec da la'añaxac.
Na Israel ỹataqta nmatchiguiñi qome na ỹotta'a't shiỹaxauapi maye depa'aguenataxaatacpi,
qataq ỹataqta inoxo'n naua lpi'ineqa, ỹapacaviiguilo naqa'en naamaye ana lchecnapi.
9Qaq da nmatec, qalaq 'eeta'am ca quiyoc da nqapaxaatañi,
¡Nache qaica ca ỹe'egueeta'a da nlouec naqa'en!
¡Ỹataqta talec da nchoxonnataxanaxa ca 'am ichoxoren,
qaq saishet da talec da nchoxonnataguec ca 'am saichoxoren!»
Da la'aqtaxanaxac so Balaam
10Qaq so Balac co'ollaq hua'aqchigui de'era, nache ỹataqta dalemataỹa so Balaam, nache ivigoxoguilo naua napocna, nache iuaxana't naua lhua'q, nache 'eeta':
Aỹem, 'am seỹaxana co'ollaxa da yaqto' 'auasaxalec ca qauem 'ara'aqtac na ñepa'aguenaxauapi, qaq nagui mashe ivi' tres da talec 'anqa'en da 'onaxaic 'ara'aqtac namayepi. 11¡Qaq nagui no'on da 'avi'eguelaxa ca 'arma'! Aỹem 'am sachaxanapecot co'ollaxa da 'am sanem da lta'araic 'año'oxonnataguec, qalaxaye Ñim Nataxala' nqanaxat damaye.
12Nache so Balaam 'enapego' somaye, 'eeta':
Aỹem mashe sa'aqtaxaateguem so 'aramaxashecpi co'ollaxa, 13da na'aictaxa da aỹem 'aỹa'anem ñi 'arma' maye nlaqchigui na oro qataq na plata, qalaxaye aỹem saishet da ñapacalec ca la'aqtac Ñim Nataxala' da yaqto' so'ot ca no'on huo'otaq ca qauem, nacherata da sa'axat ca la'aqtac Ñim Nataxala'. 14Qaq nagui, aỹem she'eguelaxa ye ima', qalaxaye hua'auñi da 'am sa'aqtaxanem dam ỹo'otec qome na Israel le'ecpi nam 'arhuo' le'ecpi, que'ecaua natrauo na'axa'te.
15Nache so Balaam do'onaxaataueeguelo naua la'aqtaqa, 'eeta':
«Da la'aqtaxanaxac na Balaam maye llalec so Beor,
nam ỹale maye huo'o na lauanaqchec,
16da la'aqtaxanaxac nam hua'axaỹalo
naua la'aqtaqa Ñim Lo'onatac 'Enauacna,
qataq ỹaỹate'n naua lhuennataxaco Ñim Nataỹaña 'enauacna,
nam ỹauan na nauanaqchecpi maye chegoqo'ot Ñim Qaica ca Ỹaqalanapec,
nam huo'oi naua lauanaqcheco maye ỹataqta yo'oqteguelo.
17Aỹem huo'o da selota'a qalaxaye ñaq natauo,
selota'a qalaxaye ñaq qaỹoqtaique,
anamaye, huaqaañi maye chegoxoguet so Jacob,
nta'a maye nachaañi qome chegoqtoigui na Israel.
Nache ilaxachigui qome ye Moab qataq nlaxaañi na llalaqpi so Set.
18Qataq loxonec qome ye Edom nache ỹacona 'enauac ye Seír,
maye lma' na npa'aguenaxaua.
Nache na Israel le'ecpi ỹataqta ỹo'ot qome ca lta'araic na'aalaxa.
19Qaq que'eca doxonaxan qome camaye chegoxoguet so Jacob,
nache camaye nlaxaañi qome na no'onañipi que'eca huaqta'a't nỹecpi.»
20Qaq ime nache so Balaam ỹamata'a da pa'aigue so Amalec le'ecpi, nache 'eeta':
«Ye Amalec le'ecpi, nacheye ye la'auaxanec
da 'amaqtaqaicpi 'enauac na laỹe shiỹaxauapi,
qalaxaye yemaye taỹa'a da ỹataqta nlachiguiñi qome.»
21Ime, qataq ỹamata'a so queniitapi, nache 'eeta':
«Qami', na'aictaxa da qaramchiguiñi na qarma'aipi,
cha'aye na'attalec na coma' na qaye'eguenaxaquiipi,
22qalaxaye 'am Caín
'aỹa'a ye norec qaq ye Asiria 'am loxonec qome nache 'am ỹauec.»
23Ime, nache so Balaam qaltaq do'onaxaataueegue da la'aqtac, 'eeta':
«¡'Agai! ¿Che negue'tom qome ca nca'altauec,
qom ỹo'ot de'era Ñim Lo'onatac 'Enauacna?
24Cha'aye anac qome aca notaxaquipi nacto'ot na loigue ye Chipre,
nache ỹo'ot da nque'eenaxac na Asiria le'ecpi qataq na Éber le'ecpi,
cha'aye nataqa'en taỹa'alo da qailaxachiguilo.»
25Qaq co'ollaq ime de'era, nache so Balaam jec, da ỹe'eguelaxa so lma'. Qaq nataqa'en so Balac ỹe'eguelaq.
