So Israel le'ecpi netaña ye Sitín
1Qaq so Israel le'ecpi co'ollaq netaña ye Sitín, nache so ỹalleppi ca'ata naxa da nquishestague' aso Moab lashepi, 2qaq asomayepi, nache ỹauec co'ollaxa se'eso ỹalleppi da ỹanot na lachetaqtaxanaxat so natamnaxala'pi asomayepi. Nache so Israel le'ecpi nhuanaua'a de'era nquia'axac, qataq natamnot na natamnaxala'pi so Moab le'ecpi, 3qaq 'era da 'eetec co'ollaxa se'eso nhuo' le'ecpi da natamnot so Baal Pegor. Qaq huaña nache Ñim Nataxala' ỹataqta dalemataỹa so Israel le'ecpi, 4nache Ñim Nataxala' 'enapega so Moisés, 'eeta':
«'Alaỹona't qome 'enauac na lataxala'pi na nhuo' le'ecpi, nache sauaachigui 'anqa'en da 'aucoñerasheguem da 'aualauat, qataq 'auachetoigui ca yo'oqchiguiñi na'a'q, yaqto' vi'iiguet da ỹayeloxo maye talec na Israel le'ecpi.»
5Nache so Moisés 'enapega so nmit na nasouaxashetpi ye Israel, 'eeta':
«Ñi 'oonolec da qoñiita, ỹalauat qome ca ỹalleppi maye maiche lalamaxat lauo' le'ecpi maye ca'ata co'ollaxa da ỹo'oxoren so Baal Pegor.»
6Qalaxaye co'ollaq laỹoota'a't so nhuo' le'ecpi, nỹeetagui netaña so ñegueuo so npe'l maye naponqa', nache ivireuo so 'oonolec Israel le'ec, ỹauectauo aso 'alo Madián lashe da yaqto' ỹachaxaneguet so maiche lauo' le'ecpi, nache ỹauaachigui 'enauac so laỹoota'a'tpi qataq so Moisés. 7Qaq co'ollaq ỹauaachigui de'era so Finés, som llalec so Eleazar, qataq laual so ntaxaỹaxanaxanec Aarón, nache chegoqtoigui so laỹoota'a'tpi da ñisheguem, nache nacotcheguem aso lataquiaxai, 8nache ca'ataueeguelo soomaye, nache taigui so lpe'l se'eso Israel le'ec, nache huaigui naqa'en somaye da ira'alo aso lataquiaxai, ỹapacauiiguilo naqa'en soomaye aso lataquiaxai. Huaña nache vi'iiguet se'eso nleuaxa maye talec so Israel le'ecpi, 9qaq da ima'a't se'eso ileupi maye ilem se'eso nhuaxanaguec somayepi ivi' veinticuatro mil.
10Qaq huaña nache Ñim Nataxala' 'enapega so Moisés, 'eeta': 11«Da Finés, maye llalec so Eleazar, qataq laual so Aarón, damaye ỹo'ot da vi'iiguet naqa'en da ỹayeloxo maye talec na Israel le'ecpi, cha'aye damaye 'eeta'am Aỹem da sa sesheteguet da qanatamnot ca ỹaqa'a atamnaxala'. Qaq nachera damaye, da huo'omshe saishet da ỹataqta imeuo ñaqa'en namayepi. 12Qaq 'aua'aqtaxanem qome da Finés da ỹataqta ñaỹamaxate' qome damaye, da yaqto' huo'o da nlagaxayec, 13qaq ỹoqo'oye nagui damaye qataq ca chegoxoguetpi qome, ñaỹamaxate' da sanem da chochaq tatec da lo'onataxanaxac da ntaxaỹaxanaxanecpi, cha'aye Aỹem deca'alaxaalec, qataq ỹo'ot da qaỹapalaxat na lasouaxashetpi na Israel le'ecpi.» 14Qaq so Israel le'ec maye ỹapacaviigui qanqa'en aso taquiaxai som cañe' qanqa'en aso Madián lashe, le'enaxat Zimri, llalec so Salu, maye lataxala' so maiche nalamaxat nhuo' le'ecpi maye chegoxoguet so Simeón. 15Qaq asa'aso 'alo Madián lashe maye cañe' se'eso Israel le'ec, asomaye le'enaxat Cozbi, llale so Sur, maye lataxala' so maiche nalamaxat nhuo' le'ecpi ye Madián. 16Nache, Ñim Nataxala' 'enapega so Moisés, 'eeta': 17Qauloquiaxañi ye Madián le'ecpi qataq qaualauache qome, 18cha'aye yemayepi qami' ỹo'oteque da latenataxanaxac, nache qami' ỹauegalo da qanatamñiỹot so Baal Pegor, qaq aso Cozbi maye llale so nataxala' Madián le'ec, qalaq asomaye ileu co'ollaxa, huetoigui so na'a'q co'ollaq huo'o so nleuaxa huaña ye Baal Pegor.
