Da lataxac ca qoỹan na'aqtac
1So Moisés da'aqtaxanem so lataxala'pi so maiche nalamaxat nhuo' Israel le'ecpi, 'eeta':
«Da lamaxasoxonaxac Ñim Nataxala', 'eeta': 2Da huo'o ca shiỹaxaua da ỹanot ca la'aqtac Ñim Nataxala', huo'otaq da ỹan ca 'eetega ipacchigui la'aqtac, qaq camaye iuen da ipacchigui que'eca la'aqtac, qataq ỹo'ot 'enauac cam ỹachaxanapec.
3Qaq da huo'o aca qa'añole maye ñaq neto'ot ca lta'a, da ỹanot ca la'aqtac Ñim Nataxala', huo'otaq da ỹan ca la'aqtac da 'eetega ipacchigui, 4qaq ca lta'a da la'axaỹaxac, qalaxaye qaica ca la'aqtac, nache acamaye iuen da ipacchigui cam ỹan la'aqtac. 5Qaq ca lta'a da la'axaỹaxac que'eca ỹan la'aqtac acamaye, nache da illapeguem, nache acamaye saishet da ipacchigui que'eca ỹan la'aqtac. Nache Ñim Nataxala' ichoxoren acamaye, cha'aye ca lta'a illapeguem da ỹo'ot que'eca ỹan la'aqtac acamaye.
6Qaq aca 'alo da huo'otaq ỹalaxaraic da ỹan ca la'aqtac, nache da mashe ime da ỹan ca la'aqtac nache huaron, 7qaq que'eca lhua acamaye da la'axaỹaxac, qalaxaye da qaica ca la'aqtac, nache acamaye iuen da ipacchigui cam ỹan la'aqtac. 8Qaq que'eca lhua acamaye da huo'otaq la'axaỹaxac da nỹalaqtoc ca ỹan la'aqtac acamaye, nache da sa ỹaỹamaxaren, nache acamaye saishet da iuen da ipacchigui cam ỹan co'ollaxa la'aqtac. Qaq Ñim Nataxala' ishet da ichoxoren acamaye.
9Qaq aca pa'ai, huo'otaq aca nalate' ca lhua da ỹan ca la'aqtac, nache iuen da ipacchigui que'eca ỹan la'aqtac. 10Qaq aca 'alo maye mashe huaron da ỹan ca la'aqtac, 11nache ca lhua acamaye da huo'otaq la'axaỹaxac, nache da qaica ca la'aqtac, nache acamaye iuen da ipacchigui que'eca ỹan la'aqtac. 12Qalaxaye que'eca lhua da huo'otaq la'axaỹaxac nache da illapeguem, nache acamaye saishet da iuen da ipacchigui ca ỹan la'aqtac, cha'aye ca lhua mashe illapeguem da ỹo'ot. Qaq Ñim Nataxala' ishet da ichoxoren acamaye.
13Qaq que'eca lhua acamaye ishet da sa ipaigui naqa'en cam ỹan la'aqtac acamaye, huo'otaq da ipacchigui naqa'en. 14Qalaxaye da huo'otaq qaica ca la'aqtac ca lhua acamaye, nache acamaye iuen da ipacchigui que'eca ỹan la'aqtac. Cha'aye ca lhua qaica ca la'aqtac. 15Qalaxaye da mashe qaỹata'aguelo caua na'axa'te, nache da illapeguem da ỹo'ot cam ỹan la'aqtac acamaye. Nache camaye maiche pa'aiguet cam lasouaxashet acamaye.»
16Qaq 'ena nam lamaxasoxonaxacpi Ñim Nataxala' maye ỹanem co'ollaxa so Moisés, da yaqto' lataxac naqa'en da llecỹaxac ca ỹale qataq aca lhua. Nache 'ena'am ca nta'a qataq aca llale, da ñaq netaña ca lma' ca lta'a.
