So chegoxoguetpi so Rubén qataq so Gad naña ye pa'aigue da nala' lliguisheguem ye Jordán
1Qaq so maiche nhuo' le'ecpi maye chegoxoguet so Rubén qataq so Gad, qalota co'ollaxa so na'atetpi, qaq co'ollaq ila'a da 'onaxaic ye 'alhua Jazer qataq ye Galaad, da taiguet da netaña na 'atetpi, 2nache somayepi detaxaỹapegue' co'ollaxa so Moisés qataq so ntaxaỹaxanaxanec Eleazar, qataq so lataxala'pi so nhuo' le'ecpi, nache 'eeta':
3Naua 'aleu', Atarot, Dibón, Jazer, Nimrá, Jesbón, Eleale, Sebán, Nebo qataq Beón, 4maye loxonec co'ollaxa Ñim Nataxala' da yaqto' lalamaxat naqa'en na Israel le'ecpi, naamaye hualec na no'on 'auaqpi maye aloq na 'atetpi, qaq qomi' huo'o na qana'atetpi. 5Qaq da 'auaỹamaxareeta, nache no'on da qomi' 'aỹa'anema yi'iye 'alhua. Nache saishet da sa'axasoxonaxalec 'anqa'en ye tala Jordán.
6Qalaxaye so Moisés 'enapeco':
¡Na qarqaỹaipi jec da nalat! Qaq qami', ¿peta'a qauauoitaique da nache qoñiỹaña ne'ena 'alhua? 7¿Ta'ainco' da huotaique da deqalvi qanqa'eñi na laỹe Israel le'ecpi, da yaqto' saishet da taitague da le'ego da ỹacona yem 'alhua maye ỹanem Ñim Nataxala'? 8Qaq 'era da 'eetec co'ollaxa so hua'au qarta'ailpi co'ollaq samaxa ye Cadés Barnea da ichemaxata yi'iye 'alhua. 9Nache ivira'a co'ollaxa so la'auaxac Escol da imeteetac yi'iye 'alhua, qaq co'ollaq ñe'eguelaq nache ỹo'ot da lqalviaxa na Israel le'ecpi, da yaqto' saishet da taỹa ye 'alhua maye ỹanem co'ollaxa Ñim Nataxala'. 10Ỹoqo'oye Ñim Nataxala' ỹataqta dalemata co'ollaxa, nache ỹan da la'aqtac, 'eeta': 11'Enauac na shiỹaxauapi maye chegaqa'a ye Egipto, maye ivi' qataq napacalec naua veinte vi'iye da nachaalataxac, saishet qome da inoxoneua'a da nalec ye 'alhua maye sachaxanapecot co'ollaxa da sanem so Abraham, Isaac qataq so Jacob, souaxat da aỹem sa ỹalaxaguet. 12Qaq nachesota so Caleb som llalec so Yefune, som queniziita, qataq so Josué, som llalec so Nun, da ỹataqta ỹalaxagueta co'ollaxa Ñim Nataxala'. 13Nache Ñim Nataxala' dalemataỹa co'ollaxa na Israel le'ecpi, nache choche coleeteguelec naqa'en ye toolec 'alhua soua cuarenta vi'iye, nache ivitta'a da nmichiguiñi so shiỹaxauapi maye sa ỹalaxaguet co'ollaxa Ñimaye. 14Qaq nagui, qami' llalaqpi so 'etaxaloxoicpi, qansheetaique da qoquiitegue da lataxac so qarta'ailpi, nache qanquigaxacheeuec da lalemataic Ñim Nataxala' da dalemataỹa na Israel le'ecpi. 15Qalaxaye qami' da qoquiỹa'ai Ñim Nataxala', nache Ñimaye ỹo'ot qome da nache netalec ne'ena toolec 'alhua na Israel le'ecpi, nache qami' qarasouaxashichi qome da qailaxachigui namayepi.
16Nache somayepi nquigueua'a so Moisés, nache 'eeta':
Qomi' sauoqtaique da ñepaxataxaua'a ana qarelo qaguetapi qataq ana huacapi, qataq da so'otaq ca huaqta'a't nỹecpi da yaqto' lalamaxat ñaqa'enaq na qaralamaxat qoyalaqpi. 17Qaq da ime, nache qolaq, ña'ataxagui na qaro'ogoxonaxatpi nache sa'auaqta'ague da taỹa'ague na Israel le'ecpi, choche ivitta'a ñaqa'enaq ye na'alhua namayepi. Qaq na qoyalaqpi nache netaigui qome que'eca huaqta'a't nỹecpi maye huo'o na lpaqtaxat, yaqto' saishet da ỹe'egueeta'a na shiỹaxauapi maye lma' ne'ena 'alhua. 18Qataq saishet qome da ñe'eguelaxasaxalo naua qarma'te ivitta'a da 'enauac na Israel le'ecpi nalec na na'alhuapi. 19Qaq qomi', nache saishet da sauoqo'o ca qana'alhua yem pa'aitague da le'ego ye Jordán, cha'aye qomi' saconaxa ne'ena 'alhua maye npa'aitague na nala' lliguisheguem na Jordán.
20Nache so Moisés, 'eeta':
Da ỹoqta 'eesa da qaupaquiichigui da qara'aqtaqui, qataq qana'achiigui na qaro'ogoxonaxache da qaualaqaiguet da lamaxasoxonaxac Ñim Nataxala', 21qaq da 'enauac qami' da qaua'axasoxoñiilec ye tala Jordán qataq qaualaqaiguet da lamaxasoxonaxac Ñim Nataxala', qataq qoviỹa'a yemaye ivitta'a da Ñim Nataxala' ỹo'orauec 'enauac na qanpa'aguenaxauaipi, 22qataq da mashe ỹacona yi'iye 'alhua, qaq huaña nache ishet da qañe'eguelaqai. Cha'aye mashe ime da qaualaqaiguet Ñim Nataxala' qataq da qautauañi na Israel le'ecpi, nache ne'ena 'alhua qaralamaxache qami' ỹanema Ñim Nataxala'. 23Qalaxaye da saishet da qauo'oche de'era, nache qauaỹachiñiita da hueto'ot da qarasouaxashichi Ñim Nataxala', nache huo'o ca na'a'q qaq qami' nvitalo ca qanhuaxanaguiqui souaxat de'era qarasouaxashichi. 24Qauo'oche qome que'eca huaqta'a't nỹecpi da yaqto' lma' na maiche qoyalquipi, qataq qanpaxachiiua'a ana qareloi qaguetapi, qalaxaye qaupaquiichigui qome da qara'aqtaqui.
25Nache so chegoxoguetpi so Rubén qataq so Gad, 'enapega so Moisés, 'eeta':
Ne'ena 'aramaxashecpi ỹo'ot qome dam 'aramaxasoxonaxac. 26Qaq ana qarhuapi, qataq qoyalaqpi maye ñaq ñaqpiolec, qataq na qana'atetpi, qataq 'enauac na qarelo shiguiỹacpi, nache no'onaña ne'ena huaqta'a't nỹecpi na Galaad, 27qaq qomi' maye qomi' 'aramaxashecpi, ña'ataxagui na qaro'ogoxonaxatpi da ñeqo'onaxa ca 'alaataxac da salaxasoxoguet da lamaxasoxonaxac Ñim Nataxala', nache sepagaqchigui da qomi' 'auamaxaleguete.
28Nache so Moisés ỹanem de'era namaxasoxonaxac so ntaxaỹaxanaxanec Eleazar, Josué qataq so lataxala'pi so maiche nalamaxat nhuo' le'ecpi so Israel, 'eeta': 29Da 'enauac na ỹalleppi, na maiche nalamaxat nhuo' le'ecpi maye chegoxoguet so Rubén qataq so Gad, da ỹa'axasoxoolec ye tala Jordán qataq na'achigui na lo'ogoxonaxat da nalat da deuotaxanec ye 'alhua maye qami' ỹamaxaleguete Ñim Nataxala', nache qami' qaỹa'añim qome yi'iye 'alhua Galaad da lalamaxat qanqa'eñi namayepi. 30Qalaxaye namayepi da saishet da jec da ỹa'axasoxoolec ye tala da na'achigui na lo'ogoxonaxatpi, nache namayepi qami' naiguilo qome da qoñiỹalec ye 'alhua Canaán.
31Nache so chegoxoguetpi so Gad qataq so Rubén, 'eeta':
Qomi' so'otaq qome de'era lamaxasoxonaxac Ñim Nataxala' maye ỹanem na lamaxashecpi. 32Nache ña'ataxagui na qaro'ogoxonaxat da ñeqo'onaxata ye 'alhua Canaán da salaxasoxoguet Ñim Nataxala'. Qalaxaye qomi' saconaxa ne'ena 'alhua maye npa'aitague na le'ego na Jordán da qaralamaxat.
33Nache so Moisés ỹanem so 'alhua so maiche nalamaxat nhuo' le'ecpi maye chegoxoguet so Gad, Rubén qataq so laỹepi maiche nhuo' le'ecpi maye ncolaxara'ache co'ollaxa maye chegoxoguet so Manasés, maye llalec so José, yem na'alhua co'ollaxa so Sijón maye lta'a na amorreopi, qataq so Og maye lta'a na netaña ye Basán, lỹaueegue' nataqa'en so huaqta'a't nỹecpi qataq so no'onaxapi maye sa qaỹapeque yemaye. 34Nache so maiche nalamaxatpi nhuo' le'ecpi maye chegoxoguet so Gad, qaltaq nauaxaỹaxaasheguem co'ollaxa so huaqta'a't nỹecpi ye Dibón, Atarot, Aroer, 35Atarot Sofán, Jazer, Yogbeá, 36Bet Nimrá, Bet Arán nataqa'en nauaxaỹaxaasheguem so lpaqtaxat se'eso huaqta'a't nỹecpi, qataq qaỹo'ot aso laỹe'pi aso qaguetapi. 37Qaq so maiche nalamaxat nhuo' le'ecpi maye chegoxoguet so Rubén, ỹe'eguelaxalec da nauaxaỹaxaasheguem co'ollaxa so huaqta'a't nỹecpi ye Jesbón, Elale, Quiriatayin, 38Nebo, Baal Megón qataq ye Sibemá, qataq naralaxat da le'enaxat se'eso huaqta'a't nỹecpi maye nauaxaỹaxaasheguem.
39Qaq so chegoxoguet so Maquir, maye llalec so Manasés, ỹacona ye Galaad, ỹo'orauec so amorreopi maye netaña co'ollaxa yemaye. 40Nache so Moisés ỹanem ye 'alhua Galaad, som chegoxoguetpi so Maquir, maye nataqa'en chegoxoguet so Manasés, nache somayepi nalec co'ollaxa yemaye. 41Qaq so Yaír, maye nataqa'en chegoxoguet so Manasés, deuotaxanec co'ollaxa soua sa lamai' nma'ate maye lalamaqa'ate so amorreopi, nache ỹanagui da le'enaxat Javot Yaír. 42Qaq so Nobaj deuotaxanec ye Kenat nataqa'en so nma'pi maye sa qaỹapeque yemaye, nache ỹanagui da maiche le'enaxat somaye, Nobaj.
