So huaqta'a't nỹecpi maye lalamaxat so leviitapi
1Ñim Nataxala' 'enapega so Moisés, co'ollaq huaña ye nalochiguiñi 'alhua ye Moab, yem sa qaỹapeque ye Jordán qataq nalotta ye Jericó, 'eeta':
2«Qonapega qome na Israel le'ecpi da 'enauac ne'ena ỹaconeguet 'alhua, ỹauo'o qome ca ỹanem na leviitapi nam huaqta'a't nỹecpi maye ỹotta'a't naua nañalo da yaqto' lalamaxat, qataq ỹanem na no'onaxapi maye coleesop que'eca huaqta'a't nỹecpi maye ỹotta'a't naua nañalo da yaqto' lquia'aqa' na na'atetpi. 3Nache na leviitapi naigui qome que'eca huaqta'a't nỹecpi maye ỹotta'a't naua nañalo, qaq na na'atetpi qataq na laỹe lalopi shiguiỹacpi nache netalec qome que'eca no'onaxa. 4Qataq que'eca no'onaxa maye qoỹanem na leviitapi da yaqto' lquia'aqa' ana lalopi, iuen da huauga ca sa qaỹapeque ca pa'auec que'eca huaqta'a't nỹecpi, qataq ivi' cuatrocientos cincuenta metro ye loga't que'eca no'onaxa, chegoqchiguiña qanqa'en ca lpaqtaxat camayepi. 5Qataq chegoqchiguiña ca loigue que'eca huaqta'a't nỹecpi, qataq nalochiguiñi qanqa'en da qanaloqten. Nache ca pa'aigue da nala' lliguisheguem ivi' qanqa'en ca novecientos metros, qataq naloteguet qanqa'en ca taỹa'ague da avit, qataq da sheu' qataq ca pa'aigue da la'añaxa. Nache que'eca huaqta'a't nỹecpi ñichiguingui qome na laiñi, qaq que'eca no'onaxapi coleesop camaye.
6Qaq que'eca huaqta'a't nỹecpi maye ỹotta'a't naua nañalo maye qoỹanem na leviitapi, nache qaiỹotaugalo caua seis que'eca huaqta'a't nỹecpi maye ỹotta'a't naua nañalo da yaqto' ñe'eguenaxaqui', yaqto' da huo'o ca dalaataxan, nache ishet da lle'eguenaqa' ca 'oonolec camaye. Qataq qoỹanem namayepi caua ỹaqaugalo cuarenta y dos que'eca huaqta'a't nỹecpi maye ỹotta'a't naua nañalo, 7qaq da ima'a't ca qoỹanem na leviitapi, nache ivi' cuarenta y ocho cam huaqta'a't nỹecpi maye ỹotta'a't naua nañalo, qataq ca no'onaxapi maye lquia'aqa' na na'atetpi. 8Nache que'eca huaqta'a't nỹecpi maye ỹotta'a't naua nañalo maye ỹan qome na Israel le'ecpi da ỹanem na leviitapi, ỹachegoxotaigui qome na 'alhua maye qoỹanem da lalamaxat. Qalaxaye ca lta'araic ca na'alhua, nache lta'araic ca ỹanec, qaq ca saq 'amaqtaq ca na'alhua, nache nataqa'en saq 'amaqtaq ca ỹan 'alhua, da qoỹanalec ca huaqta'a't nỹecpi maye ỹotta'a't naua nañalo da yaqto' lalamaxat namayepi.»
9Ñim Nataxala' 'enapega so Moisés, 'eeta':
10«'Aua'aqtaxanem na Israel le'ecpi, qoneta': Qom qaua'axasoxoñiilec ye tala Jordán da qaunoxoñiiua'a ye 'alhua Canaán, 11nache qauỹochiỹauga qome ca ñe'eguenaxaquipi huaqta'a't nỹecpi maye ỹotta'a't naua nañalo, yaqto' ishet da ỹe'egueneua'a ca shiỹaxaua maye choche ilamaxata'a da ỹalauat ca lỹa. 12Nache ỹe'eguenoigui camaye da dataueeguesop ca ipaltaique lvi' maye lauo' le'ec ca ileu, yaqto' saishet da ileu que'eca dalaataxan ivitta'a da qanmit, ỹauaachigui qanqa'en 'enauac na nhuo' le'ecpi. 13Nache que'eca huaqta'a't nỹecpi maye ỹotta'a't naua nañalo maye qoỹanec, qaiỹotauga qome caua seis da yaqto' ñe'eguenaxaqui'. 14Qaq caua tres caamaye neraña qome da nala' lliguisheguem ye Jordán, qaq caua lỹa't tres, neraña ye le'ego ye Canaán. 15Nache que'ecaua seis que'eca huaqta'a't nỹecpi maye ỹotta'a't naua nañalo, nache lle'eguenaxaqui' qome na Israel le'ecpi, qataq ca chegaqauecpi maye qami' netaiguilo, huo'otaq ca queuoxoicpi. Qataq lle'eguenaqa' qome ca choche ilamaxata'a da ỹalauat ca lỹa.
16Qaq da huo'o ca ique'emaqchet ca lỹa irota'a ca lcat, nache que'eca qaique'emaqchet da ileu, nache que'eca deque'emaqtaxan, camaye laataxanaxaic, qaq camaye nache qaỹalauat.
17Qaq da huo'o ca ique'emaqchet ca lỹa da irota'a ca coma', nache que'eca qaique'emaqchet da ileu, nache que'eca deque'emaqtaxan camaye laataxanaxaic, qaq camaye nache qaỹalauat.
18Qaq da huo'o ca ique'emaqchet ca lỹa da irota'a ca 'epaq, nache que'eca qaique'emaqchet da ileu, nache que'eca deque'emaqtaxan camaye laataxanaxaic, qaq camaye nache qaỹalauat. 19Qaq ca ỹataqta lalamaxat lauo' le'ec que'eca nalaatac, nacheca ca ishet da ipalaique lvi' da ỹalauat que'eca laataxanaxaic da ivita da ilalec.
20Qaq da huo'o ca ỹamaxañi huo'otaq ỹasaq ca lỹa souaxat da nquiỹatega, nache da ileu naqa'en camaye, 21huo'otaq da souaxat da nache 'eetai' da npa'agueetague', nache ỹauota'a ana napocna da iuaxan, nache da ileu naqa'en camaye, nache que'eca deque'emaqtaxan camaye laataxanaxaic, qaq camaye nache qaỹalauat. Qalaxaye ca ỹataqta lalamaxat lauo' le'ec que'eca qaỹalauat, nacheca ca ishet da ipalaique lvi' da ỹalauat que'eca laataxanaxaic da ivita da ilalec.
22Qalaxaye da huo'otaq choche ilamaxata'a da ỹamaxañi, huo'otaq da chochaq ỹetauec ca coma', nache ileu naqa'en camaye, 23huo'otaq da sa ilo'ogue ca lasaxasoxonaxat coma', nache ỹasaqa'a ca lỹa nache ileu naqa'en camaye, huo'otaq da saishet da npa'aguenaxaua camaye, qataq saishet da nache 'ena'ac da ique'emaqchet, 24nache ca maiche nhuo' le'ecpi nmit qome da l-leuaxa que'eca ileu, qataq ca ipaltaique lvi', nache qaipacchigui da lataxac na nqataxacpi maye qalapaxañi. 25Nache ca nhuo' le'ecpi maiche ilo'ogue qataq ntela'a qome ca shiỹaxaua maye ilamaxata'a da ỹalauat ca lỹa, ntelaqna'aguet ca ipaltaique lvi' maye lauo' le'ec que'eca ileu. Nache que'eca shiỹaxaua qaỹe'eguelaxata que'eca huaqta'a't nỹecpi maye ỹe'egueneua'a co'ollaxa, qaq nache netaña camaye ivitta'a da ileu ca lataxala' ca ntaxaỹaxanaxanecpi maye ncoyiguishec. 26Qaq que'eca shiỹaxaua maye dalaataxan da huo'otaq ca'ai que'eca huaqta'a't nỹecpi maye ñe'eguenaqa', 27nache ca lauo' le'ec ca ileu maye ipaltaique lvi', da ilalec camaye da huetauga ca pa'auec ca lle'eguenaqa', nache ishet da ỹalauat, qalaxaye qaica ca lasouaxashet camaye. 28Ỹoqo'oye que'eca shiỹaxaua maye ilamaxata'a da ỹalauat ca lỹa, iuen da nache hueta'a que'eca huaqta'a't nỹecpi maye ñe'eguenaqa', ivitta'a da ileu ca lataxala' na ntaxaỹaxanaxanecpi. Ime, nache ishet da ỹe'eguelaxa ca lma'.
29Qaq de'era qalapaxañi lataxac, nachera qome da lataxac da qoyecỹaxaqui qataq ca qami' chegoxogueta, na'aictaxa ca qoñiitaña ana 'alhua.
30Qaq da huo'o ca dalaataxan, nache camaye iuen da qaỹalauat nataqa'en. Qalaxaye saishet da qaỹalaxaguet ca la'aqtaxanaxac ca 'oonolec shiỹaxaua, nachecata cam qalota da da'aqtaxanpi, nache camaye ishet da qaỹalauat.
31Qataq saishet da qauacoñiiguet aca lasheue da qaisheeten ca laataxanaxaic, cha'aye camaye mashe taỹa'a da qaỹalauat.
32Qataq saishet da qauacoñiiguet aca lasheue, ca laataxanaxaic da yaqto' ca'ai ca 'oonolec que'eca huaqta'a't nỹecpi maye ỹotta'a't naua nañalo maye ñe'eguenaxaquipi, da yaqto' taỹa ca lma' da ñaq saxanaxa da ileu ca lataxala' na ntaxaỹaxanaxanecpi.
33Qataq saishet da qana'axache qome ca 'alhua maye qoñiỹalec, cha'aye na ntago'q nachena na na'axat na 'alhua, cha'aye naua qaicoldec ntago'q saishet da iqui'itaxat, nachaqcata ca icolde'c co'ollaxa caua ntago'q maye ishet da iqui'itaxat da qaỹalauat camaye, nache ishet da qui'itta naqa'en.
34Nache saishet da qana'aqchichi ca 'alhua maye qoñiỹalec qome, cha'aye nataqa'en Aỹem sootaña camaye, cha'aye Aỹem, maye nachaỹem Nataxala', nache sootaigui qome na Israel le'ecpi.»
