Proverbios 13

₁Ca ñalec ỹaanaxanaxaic ỹaconeguet na lapaxaguenataxanaxacpi ca lta'a,

qaq ca saiuooneguet da qaitaxaỹot qalaq saiqocha'a na nqataxacpi.

₂Ñi 'oonolec maiche ỹaconeguet da alaỹaxac na la'aqtacpi,

qaq na que'elaqtaxanaxaicpi qalaq huo'o da lyaxa da ỹo'ot da loquiaxac.

₃Ca ilo'oguelo naua la'aqtaqa qalaq maiche ntela'a da nachaalataxac,

qaq ca qalota na la'aqtacpi qalaq maiche nlaxattapeguela't.

₄Ca hualaic huo'o ca nqopittaique qalaxaye saishet da ỹanata,

qaq ca 'onataxanaxaic qalaxaye ishet da nquictasheguem.

₅Ca no'on da lataxac saisheteguet ca natenataxanaxac,

qaq ca qauemaic qalaq ỹo'ot da na'agaxa qataq qauem da na'aqtaguec.

₆Naua ỹaỹamaqchiyiñi lataxaco mpaxattaleguete ca ỹale qaica ca ỹasouaxat,

qaq na qauemsat qalaq nlaxaañi ca 'etaxaloxoic.

₇Huo'o na qaica ca ye qalaq 'eetega sallaxanec,

qataq huo'o na sallaxanec qalaq ỹe'enaxat da choxoraq.

₈Da lsallaxa ca sallaxanec nachera da nca'alaxatec da nachaalataxac,

qaq ca choxoraq qalaq saishet da hua'aqtega ca narenaguec.

₉Ca no'on da lataxac 'eeta'am ana ncoỹaraxanaxaqui da 'ettaigui,

qaq na qauemaicpi qalaq 'eeta'am aca ncoỹaraxanaxaqui da 'omchigui.

₁₀Da 'amqaanaxac ỹo'oteua'a da loquiaxac,

qaq da naỹaanec qalaq hueta'aguet ca sa na'amaqten.

₁₁Da nỹalaqtoc nsallaxa, damaye taỹañecra,

qaq ca npottac da laỹonaxanaxac qalaq nquictasheguem da lsallaxa.

₁₂Ca aquitaxac maye saipaigui, qalaq daỹalli naqa'en añi nquiyaqte,

qaq ca qoỹeetapeguec da ipacchigui

qalaq 'eeta'am aca qo'oipaq maye huo'o da lca'alaxa.

₁₃Ca saishet da ilo'oguet ca napaxaguenataxanaxac qalaq taỹa'a da deqat,

qaq ca huo'o naq 'enec naqa'en ca namaxasoxonaxac qalaq huo'o ca nsheetenaguec.

₁₄Da lapaxaguenataxanaxac ca ỹaanaxanaxaic

chegaqaigui da nca'alaxa qataq ishet da nca'alaxateeguesop

ca ỹale da loxonaxanaxac da nleuaxa.

₁₅Naua qailoteguelo na'aqtaqa ỹo'ot da qaỹauotec ca shiỹaxaua,

qaq da llecỹaxac na saipaguelguete naua la'aqtaqa qalaq taỹa'a da nlaguiñi.

₁₆Ca huo'o na ỹaỹaten qalaq ỹaỹamaxatchiguiñi da huo'o ca ỹo'ot,

qaq na qaica ca ỹaỹaanapec qalaq na'amqaañigui da no'oopashaxac.

₁₇Ca na'aqtaxanaxanec qauemaic ỹo'ot na cotaxacpi,

qaq ca no'on na'aqtaxanaxanec qalaq ỹo'ot da nlagaxayec.

₁₈Ca ỹo'otan na nqataxacpi qalaq taỹa'a

da lachoxoyec qataq qaica ca llo'oxoyec,

qaq ca ỹasateguet da qaitaxaỹaua'a

qalaq ỹaconeguet ca ño'oxonnataguec.

₁₉Da ipacchigui ca qoỹeetapeguec qalaq ỹo'ot da namaicỹaxac.

Qaq na qaica ca ỹaỹaanapec qalaq saishet da ca'ai na qauem.

₂₀Ca sa iỹotec na ỹaanaxanaxaicpi qalaq nataqa'en ỹaanaxanaxaic,

qaq ca sa iỹotec na qaica ca ỹaỹaanapec qalaq taỹa'a da deqat.

₂₁Na qauemsat qalaq ca'attapiguiñi' na 'etaxaloxoicpi,

qaq na no'on da lataxac qalaq nsheetenaxat da ỹaỹamaqchiguiñi.

₂₂Ca ỹale no'on da lataxac qalaq no'onaxata'aguet na laualpi na lalamaxatpi,

qaq da lsallaxa ca 'etaxaloxoic qalaq talec ca no'on da lataxac.

₂₃Ca no'onaxa ca choxoraq qalaq saqoue na qanallec,

qalaxaye qalota na daqat namaye

souaxat da qaica ca nalochiguiñi da lataxac.

₂₄Ca saishet da nlaxanec ca llalec qache saishet da ỹauotec,

qaq ca ỹauotec ca llalec qalaq nlaxanec da lataxac camaye.

₂₅Ca no'on da lataxac qalaq ỹataqta comaraxaic da deque'e,

qaq ca qauemaic qalaq nda'a't na lqouaxa.