Proverbios 14

₁Aca 'alo ỹaanaxanaxai no'oxoosheguem ca lma',

qaq aca qaica ca ỹaỹaanapec qalaq nlaxaañi.

₂Ca no'oitegue da lataxac qalaq huo'o naq 'enec naqa'en Ñim Nataxala',

qaq ca sa ỹaỹamaxañi da lataxac qalaq ỹo'otan Ñimaye.

₃Naua la'aqtaqa ca qaica ca ỹaỹaanapec

qalaq chegaqaiguilo da na'amqaanaxac,

qaq naua la'aqtaqa ca ỹaanaxanaxaic

qalaq npaxattaleguete camaye.

₄Da qaica ca nauegaxanaxala'pi huaca,

nache qui'itchigui ca laỹe' na ala na trigo,

cha'aye da la'añaxac ca nauegaxanaxala'pi

nquiguec naqa'en na ala na nañiguishec.

₅Ca na'aqtaxanaxanec maye 'eesa saishet da datenataxan,

qaq ca na'aqtaxanaxanec maye saq 'en qalaq ỹa'axat ca saq 'en.

₆Ca nogoqtaxanaxaic qalaq nmittaique

da naỹaanec qalaxaye saishet da ỹanata,

qaq ca ỹaanataxanaxaic qalaq qaica ca lqalaic da ỹanata da naỹaanec.

₇Qoca'ai qome ca qaica ca ỹaỹaanapec,

cha'aye naua la'aqtaqa sa 'auachegoxotaiguilo ca 'arauattonaxanaxac.

₈Da laỹaanec ca ỹaanaxanaxaic

ỹo'ot da ỹaỹateetegue da lataxac camaye,

qaq ca qaica ca ỹaỹaanapec qalaq maiche ỹatenachet da no'oopashaxac.

₉Na qaica ca ỹaỹaanapec qalaq lashetac na maiche lasouaxashetpi,

qaq na ỹalleppi maye no'on da lataxac qalaq huo'o da nchoxonnataguec.

₁₀Añi nquiyaqte ỹauatton da maiche lalamaxat nqui'ic,

qataq da lamaicỹaxac saishet da ỹaỹaten ca ỹaqa'a shiỹaxaua.

₁₁Ca lma' na qauemaicpi qalaq taỹa'a da nlachiguiñi,

qaq ca lma' na no'on da lataxac qalaq nquictasheguem.

₁₂Huo'o ca nqa'aic maye 'eeta'am da ỹashectec,

qalaxaye ca loga't camaye huetaña da nleuaxa.

₁₃Ivira'a da naỹalliguiyec nataqa'en ỹo'ot da lqui'ic añi nquiyaqte,

qataq ye loga't da namaicỹaxac, damaye naquicoxo.

₁₄Ca qaica ca ỹaỹaanapec qalaq ỹaỹamaxareeta da maiche lataxac,

qaq ca no'on da lataxac qalaq machiguiñi naqa'en nam ỹo'otpi.

₁₅Ca qaica ca ỹaỹaanapec ỹa'amaqten 'enauac nam qaỹa'axatem,

qaq ca huo'o na ỹaỹaten qalaq ilotague' da lqauaxac.

₁₆Ca ỹaanaxanaxaic ñi'iỹa'aguet ca qauem qataq ca'ai camaye,

qaq ca qaica ca ỹaỹaanapec qalaq qaica ca huotaique.

₁₇Ca saq ỹoxonguit da lalemataic qalaq

saishet da deuennataxaalec ca ỹo'ot,

qaq ca deuennataxaalec ca ỹo'ot qalaq ỹaỹaten da nhualaxauen.

₁₈Na qaica ca ỹaỹaanapec qalaq talec da qaica ca ỹaỹaana'a,

qaq na ỹaanataxanaxaic qalaq laueguec da lauattonaxanaxac.

₁₉Na qauemaicpi qalaq ỹa'aroto naua l-llecte na soxoraicpi,

qaq na qauem da lataxac qalaq nachoxoreetacot

qataq hueta'a ca nasom na no'on da lataxac.

₂₀Ca choxoraq qalaq ivira'a na nauochaxauapi da ỹaỹemec camaye,

qaq ca sallaxanec qalaq qalota na nauochaxauapi.

₂₁Ca ỹo'otan ca nauochaxaua qalaq huo'o da lasouaxashet,

qaq ca ichoxoren na choxoraq qalaq ỹataqta machiguiñi.

₂₂Ca nmitta'ai da ỹo'ot na qauem qalaq deqat da llecỹaxac,

qaq na nmitta'ai da ỹo'ot ca ỹaỹamaqchiguiñi

qalaq 'eesa qanqa'en qataq nauotaxat.

₂₃'Enauac na qana'añaxaalec no'onatacpi huo'o ca naigui,

qaq na qalota na'aqtacpi qalaq ỹo'ot da nachoxoyec.

₂₄Da laỹaanec ca ỹaanaxanaxaic

nachera da ỹo'ot da llo'oxoyec,

qaq ca qaica ca ỹaỹaanapec qalaq laueguec da no'oopashaxac.

₂₅Ca 'eesa na'aqtaxanaxanec qalaq nca'alaxateeguesop da l-leuaxa ca lỹa,

qaq ca saq 'en na'aqtaxanaxanec, qalaq ỹo'otec da l-leuaxa ca lỹa.

₂₆Da huo'o naq 'enec qanqa'en Ñim Nataxala',

nachera da ỹo'ot da 'eesa naqa'en da aquitaxac

qataq npaxattalec na ñalaqpi.

₂₇Da huo'o naq 'enec qanqa'en Ñim Nataxala',

nachera da chegaqaigui da nca'alaxa,

qataq nca'alaxateeguesop ca shiỹaxaua da loxonaxanaxac da nleuaxa.

₂₈Ca nta'a da qalota na ilotague',

nachera da ỹo'ot da llo'oxoyec camaye,

qaq ca llalec ca nta'a da saq 'amaqtaq na ilotague',

qalaq nachera da nlaguiñi naqa'en camaye.

₂₉Ca qaỹoqchiguinguit da lalemataic camaye ỹoqta ỹaanataxanaxaic,

qaq ca sancherapec qalaq ỹachaxan da ne'enaxac.

₃₀Da ỹe'emaqtac da nquiyaqteỹaxac,

nache no'oita naqa'en da no'ocỹaxac,

qaq da nquiỹaxanaqtaic qalaq ivira'a da iche'c naua npi'ineqa.

₃₁Ca qaica ca naigui naqa'en ca choxoraq

qalaq camaye inogoqchet Ñim Lo'onatac 'Enauacna,

qalaxaye Ñimaye ỹo'oxoren ca ichoxoren ca choxoraq.

₃₂Ca qauemaic qalaq nlaxaañi da maiche lle'etaxaloxo,

qaq ca ỹale no'on da lataxac qalaq npaxaalec da maiche ño'oxonnataguec.

₃₃Añi lquiyaqte ca ỹaanaxanaxaic nache huetanguit da naỹaanec,

qalaxaye na qaica ca ỹaỹaanapec saishet da ỹauatton damaye.

₃₄Naua nalochiyiñi lataxaco

ỹo'ot da la'amaqchec ca shiỹaxauapi,

qaq da ñe'etaxaloxo qalaq ỹo'ot da la'aloxo ca shiỹaxauapi.

₃₅Ca nlatac maye sanqalat camaye lauotaxat ca nta'a,

qaq ca 'enaqaic qalaq lquiỹaxat camaye.