Proverbios 17

₁Na'aictoxo' da qanallectac ca nallec qaramta

qalaxaye huo'o da nlagaxayec,

qaq saq 'ena'am da qalota na qaỹo'ot nquia'axac

qalaxaye nda'a't da loquiaxac.

₂Ca nlatac sanqalat ivitta'a da ỹamaqtac ca ñalec maye saỹalaq,

qataq camaye ivitta'a da nhuanaua'a

na lalamaxatpi na lqaỹañecpi so saỹalaq.

₃Na oro qataq na plata qalaq qaỹauota'a

na norec na qaỹe'eguen da ỹoqta 'eesa,

qaq na nhuennataxacpi

qalaq nacheñi Ñim Nataxala' ñi ỹe'eguen.

₄Ca qauemaic qalaq ỹalaxaguet ca shepecaic,

qaq ca shepecaic qalaq na'axaỹaxana

ca qauema na la'aqtaqa.

₅Ca ỹe'enai' ca choxoraq

camaye inogoqchet Ñim Lo'onatac 'Enauacna,

qaq ca ntootapeguec ca que'eenaxac ỹaqa'a,

camaye huo'o qanqa'en da nhuaxanaguec.

₆Na llo'oxoret ca ỹa'axaiquiolec

qalaq nachena na laualpi,

qaq da ỹo'ot da llo'oxoyec na ñalaqpi,

qalaq nachesoua soua lta'al.

₇Ca qaica ca ỹaỹaanapec qalaq saishet da mategueta

naqa'en naua na'aqtaqa 'onaxaiqa,

qataq ca ỹale huo'o naq 'enec

saishet da ỹamaategueta naua natenataxanaxaco.

₈Ca choche isheeten ca lỹa camaye ipi'itaxaatega da saqalaq da huo'o ca ỹo'ot,

cha'aye 'enauac na ỹacoolec da ỹo'ot camaye

qalaq 'enauac da ỹañoxot.

₉Ca saishet da iqocha'a da qainogoqchettac

camaye ỹo'ot da qaỹauotec,

qaq ca ipactega de'era nogoqtaxanaxac

camaye ỹo'ot da qaỹoqta ca nauochaxaua.

₁₀Ca ỹaanataxanaxaic,

ỹaỹaanataxanaxan da qanlaxa

qaq ca qaica ca ỹaỹaanapec

qalaq na'aictaxa da cien qaiuaxan

qalaq saishet da daỹaanataxan.

₁₁Ca qauemaic nacherata da nmitta'ai da loquiaxac,

qalaxaye qanamaxa camaye qome ca namaxashec qauemaic.

₁₂Ỹataqta huo'o naq naigui da qanatena'aguet aca potai

maye denotegueleguete caua llalqa,

qaq saq 'ena'am ca qaica ca ỹaỹaanapec

maye ỹo'ottac da no'oopashaxac.

₁₃Ca ỹan ca qauem da nmeneguet naqa'en ca no'on,

camaye saishet da ca'ai ca lma' da qauem.

₁₄'Eeta'am ca tala ipaxaalec ca cotaxac maye qanayecot da qaỹo'ot,

qalaxaye ỹaỹamaqchiguiñi da qanayeca'ai

da ñaq saxanaxa da lliỹa't camaye.

₁₅Da choche qaichoxoren ca huo'o ca lasouaxashet

qataq da qaỹo'ot ca nhuaxanaguec

ca qaica ca ỹasouaxat,

qaq ne'enaua dos ỹataqta

saishetegueta Ñim Nataxala'.

₁₆Negue'to' ca naigui ca qaica ca ỹaỹaanapec da huo'o aca alom,

ye saishet da desheenaxana da naỹaanec

cha'aye qaica ca lauattonaxanaxac.

₁₇Ca auochaxaua camaye nache 'eetai' da auochaxaua,

cha'aye da ivita da qanayeuaigui ca que'eenaxac

qalaq camaye 'eeta'am ca nqaỹa.

₁₈Ca qaica ca ỹaỹaanapec

qalaq npa'axaalec da isheeten ca lỹa,

nache pa'aỹa'aguet da isheeten aca lavigaxaiste camaye.

₁₉Ca nqopita da cotaxac qache nqopita da nloquiaxac,

qaq ca na'amqaanaxaic qalaq maiche quetaua'a da nlaguiñi.

₂₀Ca qauema naua lhuennataxaco sa ỹañoxot da ỹanata ca no'on,

ca tenataxanaxaiqa naua la'aqtaqa

camaye taỹa'a ca qauem.

₂₁Ca ñalec qaica ca ỹaỹaanapec

ỹo'ot da nqui'ic ca lta'a,

qataq ca ñalec 'oopaic ỹo'ot da qaica ca lamaic ca lta'a.

₂₂Da machiguiñi da nquiyaqteỹaxac

qalaq ỹo'ot da no'oita da no'ocỹaxac,

qaq da naquicoxo qalaq iqaxaỹaqche't naua npi'ineqa.

₂₃Ca qauemaic ỹaconeguet aca qoỹoxotchiguiñi nsheetenaqte,

da yaqto' qaỹashaxanec da llec ca nalochiguiñi lataxac.

₂₄Da naỹaanec nachera da nmitta'a ca sanqalat,

qaq na qaica ca ỹaỹaanapec

qalaq qaica ca llec ca 'eetapeguec.

₂₅Ca ñalec qaica ca ỹaỹaanapec

ỹo'otec da lalemataic ca lta'a,

qataq ỹo'ot da nqui'ic aca late'e.

₂₆Saỹaỹamaxañi da qaỹo'ot ca nhuaxanaguec ca qaica ca ỹasouaxat,

qataq da qaiuaxan ca ỹale saishet 'amaqtaqaic.

₂₇Ỹataqta huo'o na ỹaỹaten ca saqallegueme da detaqa,

qataq sanqalat ca ỹaỹaten da ñe'emaxatta.

₂₈Qataq ivira'a ca qaica ca ỹaỹaanapec

ishet da 'eco' ỹaanaxanaxaic da sa detaqa,

qataq 'eco' sanqalat qanqa'en da ỹaỹaten da ñe'emaxatta.