Proverbios 2

₁'Am ỹalcolec, 'auaỹamaxatteque qome naua ỹa'aqtaqa,

ỹataqta 'oxotoiguilo qome da 'antoonaxac naua ỹamaxasoxonaxaco.

₂'Ana'axaỹaxaachigui qome de'era naỹaanec,

qataq ỹataqta 'aneguet da 'arquiyaqteỹaxac da naỹaanataxanaxac.

₃Da 'auỹaxanaique da naỹaanataxanaxac,

qalaq 'anmatasheguem da 'ara'añaxac,

qataq da 'auỹaxanaique da qaica ca qanqalaate',

₄da 'anmitaique damaye qalaq 'eeta'am 'anqa'en,

da 'anmitaique aca nlayiguishe plata maye qoỹoxooñi.

₅Qaq huaña qome nache 'auaỹaten da 'eetec

da huo'o naq 'enec qanqa'en Ñim Nataxala',

¡qataq 'auaỹaten da 'eetec da nauattonaguec Ñim Lo'onatac 'Enauacna!

₆Cha'aye Ñim Nataxala', nacheñi ñi ỹan da naỹaanec,

cha'aye naua la'aqtaqa nache chegaqaiguilo

da nauattonaxanaxac qataq da naỹaanataxanaxac.

₇Ñimaye itauan qataq ntela'a ca ỹaỹamaqchiguiñi da lataxac

qataq ca qaica ca ỹasouaxat,

₈qataq ntela'a da llecỹaxac ca nalochiguiñi da lataxac,

qataq npaxattalec ca ỹataqta quetegue Ñimaye.

₉Huaña nache 'auaỹaten da no'oitegue lataxac, no'on nataxac,

qataq qaica ca qaiỹotauga, qataq da no'on ñecỹaxac,

₁₀cha'aye da naỹaanec da taigui añi 'arquiyaqte

nache da nauattonaxanaxac ỹo'ot da lamaicỹaxac da 'arquiyaqteỹaxac.

₁₁Da ntelaqchec 'am ntela'a

qataq da naỹaanataxanaxac 'am npaxattalec.

₁₂Naamaye 'am nca'alaxateeguesopa ca qauem nqa'aic,

qataq na shiỹaxauapi maye qauemaicpi,

₁₃nam ca'ai so no'on nqa'aic

qataq quegue so nqa'aic maye napalñi,

₁₄qataq nqopita da ỹo'ottac na qauem,

qataq ntootalec nam qauem ỹo'otpi,

₁₅qataq quetague' so nqa'aic namaqtapigui,

qataq dasheueeguesop so ỹaỹamaqchiguiñi nqa'aic.

₁₆Qataq nataqa'en 'am nca'alaxateeguesop aca ỹaqa'a 'alo,

acam saqaỹauanapega maye amai' naqa'en naua la'aqtaqa,

₁₇acam ỹalat co'ollaxa ca lhua maye naloxoua,

nache icoua'ai so naỹamaxataxac

maye ỹanot co'ollaxa Ñim Lo'onatac 'Enauacna.

₁₈Da qaica'ata ca lma' acamaye,

qalaq 'eeta'am da qanayeegue ca nqa'aic maye taỹa'a da nleuaxa,

₁₉cam inoxoneua'a ca lma' acamaye qalaq saishet da ñe'eguelaq,

qataq saishet da ỹe'eguelaxa da quegue so nqa'aic maye huetangui da nca'alaxa.

₂₀Ỹoqo'oye 'am qoquetegue qome so no'on nqa'aic,

qataq 'anapaxaguena da lataxac na no'on shiỹaxaua.

₂₁Cha'aye na no'oitegue da lataxac qataq qui'itta,

namayepi nache 'eetai' qome da netalec ana 'alhua,

₂₂na qauemaicpi qataq na que'emaqtaxanaxaicpi,

qalaq qanapogosheguem qome qataq qaỹamaqauec.