1Na lataxa ỹo'ot da sancherapec ca ỹale,
qataq na no'on lataxa ỹo'ot da cotaxac,
qaq ca itaqchet namaye qalaq saishet da ỹaỹateetegue ca ỹo'ot.
2Ca nta'a da denotac qalaq 'eeta'am ca quiyoc da desoqtac,
qaq ca inogoqchet camaye, nache huetalec da lchec da nachaalataxac.
3Qataq ỹo'oxoraq ca ỹale da maiche ivita'a ca cotaxac,
qaq ca qaica ca ỹaỹaanapec qalaq ishet da ỹo'ot damaye.
4Da ivita da qana'atsheguem na 'alhua,
qalaq ca hualaic saishet da da'araxan,
qalaxaye da ivita da qanqat na nañiguishec ala,
nache nmittaique namaye qalaxaye sa ỹanata.
5Naua nhuennataxaco saqcha'alo
'eeta'ama ca qaỹoqchiguingui 'etaxat,
qalaxaye ca sanqalat ỹaỹaten da ỹanatalo.
6Ỹataqta qalota na 'eetega da no'on da lataxac,
qalaxaye saishet da saqalaq da qaỹanata ca ỹoqta ishet da qaipi'iỹa'a.
7¡Ỹataqta ỹo'oxoraq ca no'on da lataxac,
qataq machiguiñi ca llalaqpi da quetegue da no'on lataxac camaye!
8Ca nta'a da nso'ooñi da huaña ca qanmit na nasouaxashet,
nache da lmeenaxanaxac camaye
ishet da ỹauanalec 'enauac na qauem.
9Qaq ỹoqo'oye qaica ca 'enapec:
«Aỹem qui'itta añi iquiyaqte,
qataq aỹem qui'itta qaica ca ỹasouaxashet.»
10Aca naloqnaxanaqte qataq ca naloqnaxanaxat
da saipaigui da huo'o ca qanaloqten,
qaq caamaye ỹataqta saishetegueta Ñim Nataxala'.
11Naua ỹo'otta'ape ca nsoqolec nachenaua naua ỹo'o't da qaỹauatton camaye,
da ỹaỹamaqchiguiñi qataq no'on da lataxac.
12Naua ntela ỹo'ot da na'axaỹaqchec
qataq naua na'ai'te ỹo'ot da nauanaqchec,
qaq naamaye maiche lo'onataqa Ñim Nataxala'
13Saishet qome da 'anañaneguet
na 'aro'ochaxa yaqto' saishet da 'am choxoraq,
qataq ỹataqta 'anlotec yaqto' na 'oq saishet da imeuo.
14Ca nmenaxaic qalaq, 'enapec:
«¡Ỹataqta qauem ne'ena nmenec!»
Qalaxaye da mashe desheenaxana
nache ño'oxoreetapigui ca lsheenaxanaxat.
15Huo'o na oro qataq qalota na ỹataqta 'onaxaic coma',
qalaxaye ỹataqta ỹactec da lyacỹaxac
naua la'aqtaqa da detaqa ca ỹaanaxanaxaic,
16Ca isheeten ca huo'o ca lasouaxashet maye saqaỹauatton,
qalaq camaye 'auotaxaneque caua alogo
da lpatanaqa 'anqa'en souaxat da itauan ca saqaỹauatton.
17Ca ỹale naman da chectac na nallec
maye ỹachegoxotaigui da latenataxanaxac,
qalaxaye da qaỹoqtegue nache namaye
'eeta'am da qanallectac na 'alhua lsoche.
18Na qalapaxañipi da qaỹo'ot qalaq chegoqchigui
qanqa'en naua no'o'n nqataxaco,
'eeta'am da loquiaxac da qaỹo'ot
qalaq qaiue'n naua no'oñi naỹaanataxanaxaco.
19Ca na'aqtaqa lo'o' sa ỹaỹaten da ỹoxooñi ca qoỹoxottapiguiñi,
qaq ỹoqo'oye saishet qome da 'aualectapeeguet que'eca na'aqtaqa lo'o'.
20Ca isheueetac ca lta'a huo'otaq aca late'e,
qalaq camaye taỹa'a da ileu, nache taigui ca ỹataqta chaqaic napalaxa.
21Na hua'auchiguiñi nalamaxatpi maye qaica ca lqalaic da qaỹaconeguet,
namayepi da ivita ca loga't qalaq saishet da ỹo'ot ca namaicỹaxac.
22Saishet qome da 'autaqtega da 'aupalaique ca 'arvi',
nacherata da 'aupi'iỹa'a Ñim Nataxala'
qaq Ñimaye qome 'am itauan.
23Ñim Nataxala' saỹaỹamaxaren da
qaỹo'onataxana ana naloqnaxanaqte saq 'en,
qataq aca naloqnaxanaxaqui maye saỹaỹamaxañi.
24Ñim Nataxala' nacheñi ñi ilo'oguelo naua lqauaxaqui' ca ỹale,
qaq ỹoqo'oye ca shiỹaxaua saishet da ỹaỹaten ca taỹa'ague.
25Huo'o da lchec ca ỹale da ỹalaxaraic
da huo'o ca ỹachaxanapecot Ñim Lo'onatac 'Enauacna,
cha'aye da ime da ỹan ca la'aqtac
nache cheta'ague da deuennataxaalec.
26Ca nta'a ỹaanaxanaxaic camaye ishet da ilagaxattac na qauemaicpi,
qataq irolec ana namaicnaxanaqte da ilaxachigui.
27So saqcha'a lca'alaxa ca shiỹaxaua
maye chegoqo'ot Ñim Lo'onatac 'Enauacna
nacheso so ỹataqta nmi't naua saqcha'alo lhuennataxaco camaye.
28Da nchoxonnataxanaxa qataq da 'eesa lataxac,
nachera da nlletañi ca nta'a,
cha'aye da lo'onataxanaxac da nta'a na'attalec da nsoxoyec.
29Da ỹo'oxoren na nsoxoppi nachera da la'añaxac,
qaq da ỹo'oxoren na ỹa'axaiquipi qalaq nachana ana lapagaxai.
30Na qauemsat da qanataren qalaq qairolec
na nque'emaxapi qataq na nhuaxanecpi,
cha'aye de'era nhuaxanaxanaxac nachera da no'oita naqa'en da nvilỹaxac.
