1Ana aloñi saq taiguet da huo'oi naua nta'api,
qataq na auot da mashe qanqat na ala na nañiguishec,
qaq nache 'eetec ca qaica ca ỹaỹaanapec,
saq taiguet da huo'o da llo'oxoyec qanqa'en.
2Nache 'eeta'am ca qoỹo maye nỹec le'ec
da choche taỹa'aicra' da huaỹotac,
huo'otaq ca mayogotolec maye qaica ca lpata'c,
qaq nache 'eetec de'era qauem da saishet da choche anac.
3Ca caaỹo qaira'a ca nhuaxanaxanaxat
da qaỹo'oxoỹaqchet,
qataq ca 'ashena qoỹanaguilo caua lqueenaxanaqa'ate,
qataq ca nhuaxanaxanaxat qairolec ca
qaica ca ỹaỹaanapec da qaiuaxan.
4Saishet da 'auasatta'aguet ca qaica ca ỹaỹaanapec,
yaqto' saishet da qoneta'am camaye
da qaica ca 'auaỹaanapec.
5'Aua'aqtaxaatem ye hueta'a
ca qaica ca ỹaỹaanapec,
yaqto' camaye saishet da ipi'itaxaatega
da huo'o na ỹaỹaten.
6Da qaỹachoxoolec ca na'aqtac
ca qaica ca ỹaỹaanapec,
nache 'eeta'am da qaicheguerec naua nchel
huo'otaq da qanque'etaxangui da loquiaxac.
7Qataq 'eeta'am ca sa ra'añeeguelo naua lchel,
ca qaica ca ỹaỹaanapec da detaxaiguilo
naua ỹaanaxanaxaiqa na'aqtaqa.
8Qataq 'eeta'am da qaicoñera'aguet ca coma'
ca npocnaxanaxat,
da qaỹo'oxoren ca qaica ca ỹaỹaanapec.
9Qataq da 'eetec ca taxaic da sa nanomeguet aca ỹaxat,
nache 'eeta'am ca qaica ca ỹaỹaanapec
da detaxaiguilo naua ỹaanaxanaxaiqa na'aqtaqa.
10'Eeta'am ca checna lo'o da ỹareetagui 'enauac na nlectot,
ca iỹaxana ca qaica ca ỹaỹaanapec
da ỹanem ca lo'onatac ca lma'.
11Ca pioq ỹe'eguelaxa da chec ca alolaxat,
qaq nache 'eetec ca qaica ca ỹaỹaanapec
da ỹe'eguelaxa da qaica ca ỹaỹaanapec.
12Qataq ỹactec da ishet da qanaquita'a ca nauattoola't da qaica ca ỹaỹaanapec,
qaq saq 'ena'am ca qaica ca ỹaỹaanapec maye 'eetega huo'o na ỹaỹaten.
13Da yaqto' sa do'onataxan ca hualaic,
nache 'eetega huo'o ca llon netangui ca llec,
netangui ca nqa'aic ca llon da dauanaxaatac.
14Ca lasom ishet da ncolliiñi da netaguilo caua legaxaistel
nache 'eetec ca hualaic da nchemaqtapiguiñi
da huetalec ca lmala'.
15Ca hualaic ỹauota'a lhuaq da ỹacongui ca nquia'axaqui,
qalaxaye saỹañoxot da ỹachaigui na alap ca ỹacona.
16Ca hualaic ipi'itaxaatega da ỹataqta ỹaanaxanaxaic,
da napacaleguete caua siete shiỹaxau'
maye ỹaỹate'n da ltaxaỹaxa'c.
17Da qaỹe'egueetaua'a ca ỹaqa'a cotaxac,
qalaq 'eeta'am da qaỹacoota'alo naua ltela ca pioq.
18Qataq 'eeta'am ca huo'o da aloic da ichecnec
ana dalaataxanapec lchecnapi maye 'ettaigui,
19nachera da 'eetec ca ỹatenachet ca nauochaxaua
ime nache 'eetega da choche daỹactac.
20Da qaica ca nle' lashec nache 'om ca norec,
qataq da qaica ca na'aqtaqa lo'o nache imeuo da cotaxac.
21Qataq chegoqchigui ana 'omchigui poqo
da 'eroigui qanqa'en ana poqopi,
qataq da qaỹalonaxana na qo'oipaq
nache 'eroigui ca norec,
qataq chegoqchigui ca nogoqtaxanaxaic da qaỹo'ot ca cotaxac.
22Naua la'aqtaqa ca na'aqtaqa lo'o'
ỹataqta huo'o da lamai'c 'eeta'am ca ama nallec,
da qaiuoxonañi qalaq ivitchiguiñi da qanallec.
23'Eeta'am ca lcat plata da qalapaxalec aca taxaqui 'alhua,
naua huesotte' la'aqtaqa ca ỹachetac na qauem lhuennataxac.
24Ca dequiỹaxanaqtaxaatac da detaqtac
qalaq no'onaxa't naua la'aqtaqa,
qalaxaye da lavilỹaxac ipa'axaatauo da qauem lhuennataxac.
25Ỹoqo'oye saishet da 'aua'amaqten
da huesotte' naqa'en naua la'aqtaqa da 'am detaxaỹot,
cha'aye naua lhuennataxaco da'aichiguilo na qauem,
26cha'aye na'aictoxo' da ỹoxotchiguiñi da lquiỹaxa,
qalaxaye da qauem lataxac 'enauac da qaỹaỹaana'a't qome.
27Ca ỹo'ot aca lshere qalaq maiche tangui acamaye,
qataq ca ỹamaqtac aca coma' nache aca'aca coma' maiche ipataxañi camaye.
28Naua na'aqtaqa saq 'e'n ỹataqta ique'emaqche't ca taaleguete naamaye,
qataq ca huesotte' naqa'en naua la'aqtaqa taỹa'a naqa'en da huo'o ca nlaguiñi.
