Proverbios 29

₁Ca shiỹaxaua maye sa ỹaconeguet

da qaỹaỹamaxaañi da lataxac,

camaye qaica ca ishet da nca'alaxatec

da nque'elaxatta da qailaxachigui.

₂Da qaỹatatalec na no'on da lataxac,

nache machiguiñi na shiỹaxauapi,

qaq da qaỹatatalec na qauem da lataxac,

nache na shiỹaxauapi huo'o da nque'eenaxac.

₃Ca ñalec ỹaanaxanaxaic ỹo'ot da machiguiñi ca lta'a,

qaq ca nnaigaxaua aca quisheguetaxai

qalaq choche ỹa'ashaxan ana alom.

₄Ca nta'a maye ỹo'ot da nalochiguiñi lataxac,

ỹo'ot da qaica ca iraxaatapigui' na netalec ca na'alhua,

qaq ca ndotec da iỹaxaataua'a da nsheetenaxanaxac

qalaq taỹañecra naqa'en na netalec que'eca 'alhua.

₅Ca ỹale maye choche no'onaxa't naua la'aqtaqa

da detaqtacot ca nauochaxaua,

camaye choche nqoviitac que'eca lỹa.

₆Ca qauemaic qalaq que'emaxama

naua maiche lqoinaxanaxaco,

qaq ca ỹale no'on da lataxac qalaq nda'a't da machiguiñi.

₇Ca no'on da lataxac qalaq iuennata'a da huapegue' ca choxoraq,

qaq ca qauemaic qalaq saishet da huo'o ca qochetega.

₈Qaq na nogoqtaxanaxaicpi qalaq lliỹa't naqa'en na netaña ca huaqta'a't nỹecpi,

qaq na ỹaanaxanaxaicpi qalaq nmanaqche't naua nhuennataxaco.

₉Ca ỹaanaxanaxaic da ncotaỹapegue' ca qaica ca ỹaỹaanapec,

qalaq na'aictoxo' da dalemata huo'otaq daỹalleguettac,

qalaxaye qaica ca ỹachegoxotaigui damaye.

₁₀Na laataxanaxaicpi qataq qauemaicpi

ỹaỹemec nam nalochiguiñi da lataxac,

qataq huotaique da ỹalauat na no'on da lataxac.

₁₁Ca qaica ca ỹaỹaanapec saỹaỹaten da nllañi da nnogoxonaxac,

qaq ca ỹaanaxanaxaic qalaq ỹaỹaten da nllañi da nnogoxonaxac.

₁₂Ca nta'a da ỹalaxagueta naua natenataxanaxaco,

nache 'enauac na lo'onataxanaxanecpi ỹo'ot na qauem.

₁₃Ca choxoraq qataq ca sa dechoxonnataxan

caamaye nache 'eeta'a't,

cha'aye Ñim Nataxala' ỹanema caamaye da huo'o da lmeenaxanaxa'c.

₁₄Ca nta'a da ỹaỹamaxatchiguiñi da lo'onataxanaxac

da ilotague' na choxoraqpi,

nache camaye nache 'eetai' da sa nlaguiñi

da lo'onataxanaxac.

₁₅Ca nalashenaxanaxat qataq da qanlaxanec ca shiỹaxaua

damaye chegaqaigui da naỹaanec,

qalaxaye ca ñalec maye saiuooneguet da qaitaxaỹot,

ỹo'ot da la'aloxo aca late'e.

₁₆Na qauemaicpi da qalota nache ỹataqta qalota da ñe'etaxaloxo,

qalaxaye na no'on da lataxac ỹauaachigui qom huañi namayepi.

₁₇'Anhuogaxa ca 'aỹa'alec yaqto' 'aulactapiguiñi,

qataq ỹataqta 'auamachiguiñi.

₁₈Ca huaña da qaica ca nauanaqchec saqcha'a, nache qaica ca naỹamqa',

qalaxaye machiguiñi na shiỹaxauapi

maye ỹalaxagueta naua nqataxaco.

₁₉Saishet da ndotec da qaỹauota'aisalo

naua na'aqtaqa da qanlaxanec da lataxac ca nlatac,

cha'aye camaye ỹaỹaten damaye,

qalaxaye saishet da ỹalaq.

₂₀Qaq ỹoqta ỹactec da ishet da qanaquita'a ca qaica ca ỹaỹaanapec,

cha'aye camaye saq 'ena'am ca sa ilo'oguelo naua la'aqtaqa da detaqa.

₂₁Ca 'aco' da saishet da nhuogaxa ca l-latac da ñaq nogotolec,

nache huo'o ca na'a'q qaq choche ntogottague' camaye.

₂₂Ca sa qaỹaloxonguit da lalemataic ỹo'ot da loquiaxac,

qataq ca sancherapec camaye qalota na lsomaxac.

₂₃Da ño'oxonnaxac ca ỹale nachera da qaica ca la'amaqchec naqa'en,

qaq ca sa na'amqaanaxaic qalaq huo'o da la'amaqchec qanqa'en.

₂₄Ca huaqtapeeguet ca cachaxaic

camaye maiche na'aqchettapeguela't,

cha'aye na'aictaxa da hua'aqtega da nsheunaguec

qalaxaye sa da'aqtaxan.

₂₅Da qañe'etega na ỹalleppi damaye nachera da icoñerai' ca shiỹaxaua,

qalaxaye ca pi'iỹa'a Ñim Nataxala' camaye ỹataqta qanpaxattalec.

₂₆Qalota na nmitta'ai da lqouagaxanaqtaic ca nta'a,

qalaxaye nacheñita Ñim Nataxala'

maye ỹan ca nalochiguiñi lataxac.

₂₇Na ỹalleppi maye no'on da lataxac

saisheteguet na qauemaicpi,

qataq na qauemaicpi nataqa'en saisheteguet

na no'on da lataxac.