Proverbios 6

₁'Am ỹalec, da 'anañan da 'auavigaqtaxaalec ca 'anauochaxaua

huo'otaq da 'anañan da 'autauan ca ỹaqa'a,

₂nache maiche 'am da 'anañan da 'angui aca nqoina,

qataq maiche 'am loxonec naua maiche 'ara'aqtaqa.

₃Qaq da yaqto' 'am huesoueeguesop damaye, 'am ỹalec,

nache 'auo'ot da 'eeta': 'Axanec da 'ana'amqaanaxac,

nache 'anqo'ona camaye nache 'auỹaxanot da 'am isheeten,

cha'aye mashe qoueto'oto naua lhuaxaye que'eca 'arỹa.

₄Saishet qome da 'auo'ochetañi,

qataq saishet da cara'ac da 'anmatec,

₅'auatauec qome qoneta'am aca ñi'imshe da dataueeguesop ca 'ipiaxaic,

'auatauec qome qoneta'am ca qoỹo da dataueeguesop aca nqoina.

₆'Am hualaic, 'anqo'ona qome da 'aumeten ca qaguesaq,

nache 'aumeteeta ca ỹo'ottacpi nache 'aue'enaxat camaye,

₇cha'aye camayepi na'aictoxo' da qaica ca na'aco'

qataq qaica ca lataxala' da ỹamaqtac camayepi,

₈qalaxaye iqataxanai' na aloq da nvi' na napaxaỹaxa,

qataq da ivita da qanqat na ala na nañiguishec,

nache choche ỹaỹamaxat na aloq.

₉¡'Am hualaic, nache a'aye qome da 'aro'ochaxa!

¡Nache a'aye da choche 'annaatai'!

₁₀Cha'aye da cara'acolec da 'auo'oche,

qataq 'ananaqteguiñi na 'aro'ochaxa,

qataq da 'ansoxoreuo naua 'arhua'q

da yaqto' 'onaxaic na 'aro'ochaxa,

₁₁nache 'am naỹa'a ca nachoxoyec da 'am icogaxanapec,

'eeta'am ca shiỹaxaua queuoxoic maye na'atchigui ca lo'ogoxonaxat.

₁₂Cam qauemaic qataq 'etaxaloxoic,

camaye ỹa'axattac na shepegaxanaxacpi,

₁₃qataq naquiaxaatai'salo naqa'en naua la'ai'te,

da huo'o ye ỹecapega qalaq huota'aisalo

naua lapia'ate qataq naua llaxaata,

₁₄da lhuennataxa qalaq huetaigui da ñe'etaxaloxo,

qataq nache lhuennataxa da ỹo'ot na qauemsat qataq da loquiaxac.

₁₅Qaq ỹoqo'oye nque'elaxatta qome da nvita ca nlaguiñi naqa'en,

'eeta'am da choche nlouec qataq ỹamaxa't naua la'ai'te nache nlaguiñi,

huaña nache qaica ca ishet da ỹaỹamaxaañi.

₁₆Huo'oi naua seis lataxaco maye saishetegueta Ñim Nataxala',

qataq siete naua ỹataqta sa ihuoonegueta Ñimaye:

₁₇na'ai'te maye na'amqaanaxaiqa,

qataq nachaxat maye shepecaic,

qataq nhua'q maye ỹalaua't ca qaica ca ỹasouaxat,

₁₈qataq nhuennataxac maye lapaxañi da ỹo'ot na ñe'etaxaloxosat,

qataq napia'ate maye nqalgoqta'a da ỹo'ot ca qauem,

₁₉qataq ca saq'en ca ỹa'axat, qataq tenataxanaxaic,

qataq deloguiỹa't naqa'en ca nqaỹañecpi.

₂₀'Am ỹalec, ỹataqta 'aualaxagueta qome naua lamaxasoxonaxaco ca 'arta'a,

qataq saishet da qoca'aisalo naua lapaxaguenataxanaxaco aca 'arate'e.

₂₁Ỹataqta 'auachaiguilo qome añi 'arquiyaqte,

qataq ỹataqta 'anqolaachiguiñalo qome,

₂₂yaqto' 'am ỹaueca'agueta da huo'o ca 'aigue,

qataq 'am npaxattaleguete da 'auo'ocheta,

qataq da 'anlouec nache 'am detaqtacoto.

₂₃Cha'aye naua namaxasoxonaxaco nachenaua naua ncoỹaraxanaxaqui',

qataq naua napaxaguenataxanaxaco naamaye 'ettaiguilo,

qataq naua ntelaqtaxanaxaco nachenaua naua ỹo'o't da llec da achaalataxac.

₂₄'Am ntelaqna'agueta qome aca 'alo qauem da lataxac,

qataq naua amai' la'aqtaqa aca ỹaqa'a 'alo.

₂₅Saishet qome da 'auqopitta'a da lyacỹaxac acamaye,

qataq sa 'anañaneguet da 'am loxonec da lmeenaxanaxac.

₂₆Cha'aye aca quisheguetaxai choche quetague' da ilotaique ca aloq,

aca lauañe' ca sa lhua qalaq ca'atteguiñi' ca ỹale maye huo'o naqye.

₂₇Cha'aye ca ỹachalec ana ltogue ca norec,

qalaq camaye ỹavi'c caua alogo.

₂₈Qataq ca queuoỹapigui' quetangui aca poqopi,

qalaq camaye ỹavi'c naua lapia'ate.

₂₉Qataq ca lauañe' aca ỹaqa'a 'alo,

qalaq camaye saishet da saqca ca nhuaxanaguec.

₃₀Cha'aye saishet da qaỹo'otan ca cachaxaic,

da decache souaxat na lqouaxa,

₃₁qaq da qaỹauanalec da decachetac,

nache camaye iuen da siete da ỹe'eguelaxalec da isheeten ca lcachaxat,

qataq ivira'a da ỹanec 'enauac ca lalamaxatpi.

₃₂Qalaxaye ca lauatapiguiñi' aca ỹaqa'a 'alo

camaye ỹataqta qaica ca laỹaanataxanaxac.

¡Qaq cam ỹo'ottac de'era, camaye nlaxattapiguiñi da maiche nachaalataxac.

₃₃Qaq camaye maiche talec ca nhuaxanaguec qataq ca nsheunaguec,

qataq qaica ca ishet da ỹapalaxat da ne'enaguec.

₃₄Cha'aye ca ỹale ca'alaxanaxaic 'eeta'am ca norec,

sa dechoxonnataxan da ivita da ipalaique ca lvi',

₃₅qataq saishet da ỹaconeguet ca nsheetenaguec,

qataq saishet da nmooñi naqa'en da lalemataic ca qalota nmepi.