Proverbios 9

₁Da naỹaanec no'oxoosheguem so lma',

nache siete naqa'en soua llo'oxoraqte lauoqtel.

₂Ime, nache ỹalauat so na'atetpi da yaqto'

ỹo'ot so lquia'axac qataq ỹauo'o so no'on lataxa,

nache ỹaỹamaxaañi so lquia'axala',

₃nache ỹamaq aso lamaxashepi,

da tasheguema so qaỹoqotcheguemec

so huaqta'a't nỹecpi da deỹaxan, 'eeta':

₄«¡Qauanaỹeecna'a qami' nsoxoppi 'enaqaicpi!»

Qataq ỹamaxa so la'aqtac so qaica ca ỹaỹaanapec, 'eeta':

₅«Qauanaqui da sacheguenaq na anoq,

qataq qanỹomiigui na no'on lataxa maye seqataxaatai'.»

₆Qaỹa'axañiiuec qome da qane'enaxaqui yaqto' qarca'alleeuec,

qataq qoquiigue da llec da naỹaanataxanaxac.

₇Ca iviraxato'ot ca nogaqaic qataq qauemaic,

nache camaye ỹe'egueeta'a da qaisheuen qataq qainogoqchet.

₈Saishet da 'aviraxato'ot ca nogaqaic ten qom 'am nquiỹa,

'aviraxato'ot qome ca ỹaanaxanaxaic yaqto' 'am ỹauotec.

₉'Auapaxaguen ca ỹaanaxanaxaic nache camaye nquiguec da laỹaanec,

'auapaxaguen ca no'on da lataxac yaqto' nquiguec da laỹaanec.

₁₀Da naỹaanec chegoqchiguiña da huo'o naq 'enec qanqa'en Ñim Nataxala',

da qaỹauatton Ñim Qui'itta nachera da ỹo'ot da qaỹachiguiñi da naỹaanataxanaxac.

₁₁Aỹem 'am sanem da logoraic da 'anachaalataxac,

qataq da qaỹoqtrec naua vi'iye da 'anachaalataxac.

₁₂Da 'am ỹaanaxanaxaic, nache ỹataqta huo'o da 'ana'achecỹaxac,

qaq da 'am nogaqaic qalaq maiche 'anque'etaxangui damaye.

₁₃Da qaica ca qaỹaỹaana'a qalaq 'eeta'am aca 'alo na'aqtaqa lo'o',

'oopai qataq qaica ca ỹaỹaanapec.

₁₄Acamaye netoigui ca lasom ca lma' da nso'ootañi,

qataq huo'o da nso'ootaña ca qaỹoqotcheguema

pa'asheguem ca huaqta'a't nỹecpi,

₁₅nache iỹaxaatague' na petañepi,

maye quetague' so no'on nqa'aic, 'eeta':

₁₆«¡Ña qauanaỹeecna'a qami' nsoxoppi maye qaica ca qauaỹaañi!»

Qataq ỹanem da la'aqtac na qaica ca ỹaỹaana'a, 'eeta':

₁₇«Ca ncachaxat 'etaxat ỹataqta ama,

qataq ca nallec maye qoỹoxottañi da qanallec

camaye ỹataqta huesotta da lamaic.»

₁₈Qalaxaye namayepi sa ỹaỹaten da na icoyeguen asomaye,

taỹa'a da ileu tangui na pa'aguiñi aca huachiqui.