Salmos 1

₁Ỹataqta machiguiñi ca shiỹaxaua

maye saishet da quegue da lqataxac na qauemaicpi,

qataq saishet da quegue da llec na 'etaxaloxoicpi,

qataq saishet da ỹalectegoigui na 'enaxanaxaicpi,

₂nacherata da ỹauoteque naua lapaxaguenataxanaxaco Ñim Nataxala',

qataq nache deuennataxaatapegueleguete naamaye ye na'a'q qataq ye pe.

₃Qaq camaye 'eeta'am aca qo'oipaq

maye ñaxattalec na loigue ca tala,

da ipacchiguilo naua laloqo'ote da huo'o ana ala,

qataq saishet da deqaqa ana laue.

¡Nache 'enauac na ỹo'otpi camaye ỹataqta ỹaỹamaqchiguiñi!

₄Qaq na qauemaicpi qalaq saishet da nache 'eetec de'era,

cha'aye namayepi 'eeta'am na 'auaqpi

deqaqta da ỹaỹoxonaqchet na la'at.

₅Qaq ỹoqo'oye nam qauemaicpi

saishet qome da nachaata'aguet da qanmit,

qataq saishet da ỹalecta'aguet nam no'on da lataxac.

₆Cha'aye Ñim Nataxala', ỹataqta ntela'a

da llecỹaxac nam no'on da lataxac,

qaq da llecỹaxac na qauemaicpi qalaq taỹa'a da nlaguiñi.