Da ño'oxonnataguec Ñim ỹo'ot 'enauacna
1¡Ayem, semato'ot da ñachaalataxac da sho'oxoren Ñim Nataxala'!
¡Ỹataqta 'am lta'araic 'Am Nataxala' maye Ñatamnaxala'!
Ỹataqta 'aỹa'aatañi da 'ayo'oxoyec qataq da 'ara'amaqchec.
2'Eeta'am 'anqa'en ca npo' da 'anapogoña na yo'oqchiguiñi.
Qataq 'aupiguiisheguem na piguem 'eeta'am ca napoxonaxat.
3Qataq ca qaỹoqotcheguemec 'arma' na'arelec 'anqa'en na 'etaxat,
qataq na lo'oc na piguem nañigui 'anqa'en aca 'annaigona,
qaq da qojec qalaq qonetaleguete naua laua't na la'at.
4Nam la'at nachena na 'ara'aqtaxanaxanecpi
qataq na le'eraxa na norec nachena na 'aramaxashecpi.
5'Am, na'attelec co'ollaxa 'anqa'en so lo'oxonaxala' ana 'alhua,
da yaqto' saishet da deraỹapigui'.
6Aso auaxai qalaq 'eeta'am ca npo' da ỹapolec 'anqa'en ana 'alhua,
na 'etaxat qalaq ỹapotalec ana qasoxonaxapi.
7Qalaxaye co'ollaq 'anlaxa na 'etaxat nache jec,
qataq co'ollaq hua'axaỹa da l-llimiaxa da 'arvilỹaxac nache datauec.
8Nache tasheguema ana qasoxonaxapi,
qataq ñe'eguelaxañi nache taña na ca'ameguepi,
nam 'auachaxana co'ollaxa da lma'pi.
9Qataq 'auauo'oi naua loga'te da yaqto' saishet da napacaleguete,
nache saishet da qaltaq ỹe'eguelaxa da ỹapolec ana 'alhua.
10'Am, 'auamaq co'ollaxa na npaxaatasheguem 'etaxat,
da yaqto' quegue na la'auaxacpi maye quichiguingui ana qasoxonaxapi.
11Qaq nachena namaye na nỹomtapigui na shiguiỹacpi no'onaxa le'ecpi,
qataq imeuec naqa'en na laquip nam huauec 'ashenapi.
12Qaq na qoỹopi maye huaỹotega't na piguem,
ỹanaña na lpata'cpi naua loiguiye namaye,
nache hueta'a da do'onaxaatagui netaigui ana lauepi ana qo'oipaqpi.
13Chegoqotcheguema 'anqa'en ye qaỹoqotcheguema 'arma',
da 'aucottalec ana qasoxonaxapi,
ana 'alhua qalaq machiguiñi naqa'en da alaỹaxac da 'aro'onataxanaxac.
14Qataq ñaxat 'anqa'en na 'auaqpi da yaqto' aloq na shiguiỹacpi,
qataq acam nañiguishe maye ỹaañi ca shiỹaxaua,
da yaqto' huo'o ca aloq ỹachegoxotaigui ana 'alhua,
15na lataxa maye machiguiñi naqa'en da lquiyaqteỹaxac,
qataq na aceite maye no'onaxat da lashiguiỹaxac,
qataq na nallec maye ỹo'ot da la'añaxac da nachaalataxac.
16Qataq huecottalec ana qo'oipaqpi maye lañiguishe Ñim Nataxala',
qataq ana cedro ye Líbano maye ỹaañi co'ollaxa Ñimaye.
17Qaq ana qoỹopi nache ỹanaigui na lpata'c anamayepi,
qaq ana lamaxañipi qalaq netaigui ana piinopi.
18Qaq ana qaỹoqotcheguemec qasoxonaxapi,
qalaq netalec ana quetaq no'onaxa lashe,
qaq ana coma'pi qalaq nache nqañoxotaxaqui ana soxonapi.
19'Am 'auo'ot co'ollaxa ñi ca'agoxoic
da yaqto' la'anaxat naua na'axa'te,
qataq añi nala' maye ỹaỹaten ca lagui da inoxooñi.
20Qaq da 'auanacot na napalaxa nache nvi' ye pe,
qaq namaye nache quetaigui da nqalgoqtega't
na shiguiỹacpi maye aviaq le'ecpi.
21Nam llonpi qalaq desoqo da iỹaxaataique ca loxonec,
iỹaxaato'ot Ñim Lo'onatac 'Enauacna da ỹanem namayepi ca aloq.
22Qalaxaye da nnoxoosheguem añi nala',
nache namayepi taỹa na lauacpi da yaqto' nnaañi.
23Qaq na shiỹaxauapi qalaq inoxonec da do'onataxan,
nache ivitta'a ye pe da ỹo'ottac na lo'onatac.
24Qaq ỹataqta qalota na 'auo'otpi co'ollaxa 'Am Nataxala',
qaq 'enauac namayepi 'auauota'a da 'araỹaanec co'ollaq 'auo'ot,
ana 'alhua qalaq nlaqtelec nam 'auo'otpi.
25Qaq 'aye aye auaxai maye ỹataqta late'erai qataq qalochiguiñi,
maye huetangui na shiguiỹacpi, na lta'araic qataq na qapio'olecpi,
maye qaica ca ivi' da naloqten.
26Qaq ayemaye nache quetangui naxa
ana notaxaquipi da qanayiguingui na 'etaxat,
qataq nache huetangui so shiguiỹac lta'araic le'enaxat Leviatán,
maye 'auo'ot co'ollaxa da yaqto' da'aistapiguingui ayemaye.
27Qaq 'enauac namayepi da 'am iuatta'aguet,
da yaqto' 'aỹa'anem ca aloq da ivita ca laloqo' da 'auquia'axan.
28Qaq da 'aỹa'anem nache namayepi ỹaconeguet,
da 'auauachigui na 'arhuaq lauel,
nache namayepi icomatec na ỹataqta no'on nallec,
29qaq da 'aỹo'oxocheesop da 'arashiguiỹaxac
nache huo'o da lcolanaxa,
qaq da 'anqa't naua la'a'che nache ileu,
nache qaltaq ỹe'eguelaxa da lsoche na 'alhua.
30Qalaxaye da 'anamaxa naua 'ara'a'che
maye ỹo'ot da nca'alaxa nache qaltaq nca'alec,
qaq 'era da qonetec da 'anaralaxat da lataxac ana 'alhua.
31Qaq da llo'oxoyec Ñim Nataxala' choche tatec qome,
qataq machiguiñi qome Ñim Nataxala' souaxat na lo'onatacpi.
32Qaq Ñimaye da ỹamatalec ana 'alhua nache anamaye cholaxan,
qataq da ipoteua'a ana qasoxonaxapi nache nchisheguem naqa'en.
33Qaq aỹem so'onaxaato'ot qome Ñim Nataxala'
qom ñaq huo'o da ñachaalataxac,
nache so'ootac na no'onecpi da sho'oxoreetac
Ñim Ñatamnaxala' da ñaq ñeca'altauec.
34Qaq no'ono' da ỹamaategueta Ñimaye
naua iuennataxaco,
cha'aye nacheñita Ñimaye da chegoqtacot da ỹamaicỹaxac.
35Qaq ña imeuo qome na 'etaxaloxoicpi maye netalec ana 'alhua,
qataq qaica qome na qauemaicpi.
Ayem, semato'ot da ñachaalataxac
da sho'oxoren Ñim Nataxala'.
¡Aja', qaỹo'oxoren qome Ñim Nataxala'!
