Salmos 107

₁Qaỹa'añiỹot qome da qana'achecỹaxaqui

Ñim Nataxala' cha'aye ỹataqta soxoraic,

qataq da lauotaxanaqtaic chochaq tatec.

₂Qaq ñaq ỹa'axat qome de'era na lca'alaqtacpi Ñim Nataxala',

nam nca'alaxateeguesop co'ollaxa da la'añaxac na mpa'aguenaxauapi,

₃nam laỹona't co'ollaxa Ñimaye,

ỹachegoxotchiguiña na ỹotta'a't 'alhuapi,

nam pa'aigue da sheu', taguiñi, yo'oxoñi qataq da avit.

₄Nam nsomaxaatapigui' co'ollaq quetalec ye toolec 'alhua,

qataq saỹanata ca nqa'aic maye taỹa'a

ca huaqta'a't nỹecpi da yaqto' naña.

₅Ỹataqta huo'o na lqouaxa qataq na laquip,

qataq nquictañi da la'añaxac da nachaalataxac.

₆Qalaxaye co'ollaq huo'o da lachetataic

nache iỹaxanot Ñim Nataxala',

nache Ñimaye nqateeguesop de'era laquicoxo.

₇Ime, nache ỹauecteuga so nqa'aic ỹashectec,

nache iviraxatta'a so huaqta'a't nỹecpi maye qanayeetaña.

₈Ỹoqo'oye qaỹa'añiỹot da qana'achecỹaxaqui

Ñim Nataxala' souaxat da lauotaxanaqtaic,

qataq souaxat da llo'oxoyec

maye ỹo'otec na shiỹaxauapi.

₉Qataq imeuec naqa'en na laquip na ilem na laquip,

qataq icoma' naqa'en na huo'o na lqouaxa.

₁₀Huo'o co'ollaxa na huetaigui so lta'araic napalaxa,

qataq nque'etaxaatapigui da laquicoxo

qataq qaicoñetta'ac na lcat,

₁₁souaxat da dataỹa'agueta naua la'aqtaqa Ñim Nataxala',

qataq ỹaỹemeque naua lqataxaco

Ñim Nataỹaña 'enauacna.

₁₂Ỹoqo'oye Ñimaye ỹaneguet da nque'etaxangui na qapa'atta no'onatacpi,

qataq da quia'aqñi qalaq qaica ca itauan.

₁₃Qaq co'ollaq huo'o da lachetataic nache iỹaxanot Ñim Nataxala',

nache Ñimaye nqateeguesop da laquicoxo,

₁₄nache nqateeguesop so lta'araic napalaxa,

qataq nqateeguesop da ncoñetaguec.

₁₅Ỹoqo'oye qaỹa'añiỹot da qana'achecỹaxaqui

Ñim Nataxala' souaxat da lauotaxanaqtaic,

qataq da llo'oxoyec da lqouagaxanaqtaic maye ỹo'otec na shiỹaxauapi.

₁₆Ñimaye inoxonguilo co'ollaxa na lasompi maye chegaqaigui na bronce,

qataq ỹacagaxachiguilo naua lca'ache lta'al.

₁₇Somayepi ỹataqta huo'o da lachetataic souaxat da saỹalaq,

qataq qalota da nque'eenaxac souaxat na maiche lasouaxashetpi.

₁₈Qataq mashe saisheteguet da chec 'enauac na nallec,

qataq mashe ivira'a so lasom da nleuaxa.

₁₉Qaq co'ollaq huo'o da lachetataic

nache iỹaxanot Ñim Nataxala',

nache Ñimaye nqateeguesop da laquicoxo.

₂₀Qataq namaxa so la'aqtac nache nataren,

qataq nqateeguesop aso huachiqui.

₂₁Qaq ỹoqo'oye qaỹa'añiỹot da qana'achecỹaxaqui

Ñim Nataxala' souaxat da lauotaxanaqtaic,

qataq da llo'oxoyec da lqouagaxanaqtaic maye ỹo'otec na shiỹaxauapi.

₂₂Qataq qaỹa'añiỹot ca qarachetaqtaxanaxache da qavio'oyiñi Ñimaye,

qataq qauamaichiguiñi da qaua'axacheeuec na ỹo'otpi Ñimaye.

₂₃Qataq huo'o co'ollaxa so ỹo'ot ana nnotaxaquipi da quiguingui aso auaxai,

da yaqto' imen na lmenec da huetangui na qalota 'etaxat,

₂₄nache co'ollaq huetangui na laiñi aso auaxai,

nache ila'a da llo'oxoyec na lo'onatacpi Ñim Nataxala'.

₂₅Cha'aye detaqa Ñim Nataxala' nache anac so lta'araic la'at,

nache nasaxasheguem ana late'erai lapaxa na 'etaxat.

₂₆Nache iviro'ot naqa'en na piguem somayepi,

qataq ñe'eguelaxaña naqa'en na pa'aguiñi aso auaxai.

Huaña, nache somayepi daqat so nachaqaanaxac souaxat de'era lchec,

₂₇nache 'eeta'am ca taxaic da ỹe'egottapigui',

nache qaica ca naigui de'era laỹaanec da quetangui na 'etaxat.

₂₈Qalaxaye co'ollaq huo'o da lachetataic somayepi,

nache iỹaxanot Ñim Nataxala' nache Ñimaye nqateeguesop da laquicoxo,

₂₉nache nmooñi naqa'en so la'at lta'araic,

qataq vi'iiguet naqa'en ana lapaxa aso auaxai.

₃₀Qaq co'ollaq vi'iiguet ana lapaxa aso auaxai

nache machiguiñi somayepi,

nache Ñim Lo'onatac 'Enauacna ỹauega so ñegueta maye

nshetaique da ivira'a somayepi.

₃₁Qaq ỹoqo'oye qaỹa'añiỹot da qana'achecỹaxaqui

Ñim Nataxala' souaxat da lauotaxanaqtaic,

qataq da llo'oxoyec da lqouagaxanaqtaic maye ỹo'otec na shiỹaxauapi.

₃₂¡Qataq qaỹa'añiỹot da la'amaqchec Ñimaye

da huo'o ca laponaxac na nhuo' le'ecpi!

¡Qataq qavio'oxoyiñi da huo'o ca

laỹonaxac na nqueroxonecpi!

₃₃Ñim Nataxala' nañigui

naqa'en da toolec 'alhua so tala,

qataq na mpaxaatasheguem 'etaxat

nañigui naqa'en na 'alhua daqaqta,

₃₄qataq na no'on 'alhua

nañigui naqa'en da toue lma',

souaxat na qauem maye ỹo'ottac nam netalec ne'ena 'alhua.

₃₅Qataq na toolec 'alhua nañigui naqa'en na qa'aim,

qataq na 'alhua daqaqta mpaxaatasheguem naqa'en na 'etaxat,

₃₆nache ỹanalec namaye nam huo'o na lqouaxa,

nache namayepi no'oxoosheguem na huaqta'a't lma'pi.

₃₇Qataq danaxaaleguete naua no'onaxaye da ỹaañi ana uva,

nache ỹataqta qalota ana ala ana lañiguishepi.

₃₈Ñimaye ỹanem da lchoxonnataxanaxa

nache nquictauec namayepi,

qataq nquictauec naqa'en ye lcata na na'atetpi.

₃₉Qalaxaye da ileu nache nquiga't ye lcata souaxat da nanoxonaguec,

qataq na qauemsat qataq da lhuogoxo.

₄₀Qalaxaye Ñim Lo'onatac 'Enauacna

ỹataqta ỹaỹemec na saq ỹaxanapec namayepi,

nache ỹo'ot da isomtac da huetalec ca toolec 'alhua cha'aye qaica ca llec.

₄₁Qalaxaye Ñimaye nqateeguesop

da lachoxoyec na choxoraqpi,

nache nquigaxatec naqa'en na llalaqpi

'eeta'am ana qalota qaguetapi.

₄₂Qaq da ỹauaachigui de'era na no'on da lataxac

nache machiguiñi,

qaq na qauemaicpi qalaq ỹapoguilo naua ala'api.

₄₃Qaq cam ỹaanaxanaxaic qalaq ỹaỹamaxattec de'era,

nache ỹaỹaten qome da lauotaxanaqtaic Ñim Nataxala'.