Salmos 112

₁¡Qaỹo'oxoren qome Ñim Nataxala'!

Ỹataqta machiguiñi ca shiỹaxaua

maye huo'o naq 'enec naqa'en Ñim Nataxala',

qataq ỹauoteque naua lamaxasoxonaxaco Ñimaye.

₂Cam chegoxoguetpi camaye

ỹataqta 'añaxaicpi qom huetalec ana 'alhua,

qataq ca llalaqpi ca no'on da lataxac

qalaq huo'o da nchoxonnataguec.

₃Naua lma'ate qalaq chochaq huañi da lsallaxa,

qaq da lqouagaxanaqtaic nache queta.

₄Ca no'on da lataxac qalaq qaicoỹattalec da huo'o na napalaxa,

nataqa'en cam hualaxaunaxaic, choxonnataxanaxaic

qataq ca nalochiguiñi da lataxac.

₅Ca shiỹaxaua soxoraic ỹataqta ichoxoren

da huo'o ca ỹa'aalaxanaxan,

qataq nalochiguiñi naqa'en da lataxac da imen ca lmenec.

₆Ỹoqo'oye camaye saishet da huañi,

qataq nache 'eetai' da nhuennataxat cam no'on da lataxac.

₇Qataq saishet da ñe'etaique ca qauem na'aqtaxanaxac,

cha'aye da lquiyaqteỹaxac saishet da deraỹapigui',

cha'aye pi'iỹa'a Ñim Nataxala'.

₈Da lquiyaqteỹaxac qalaq saishet da deraỹapigui',

qataq qaica ca ñe'etaique choche ivitta'a

da ỹauaachigui da noxonec ca mpa'aguenaxauapi.

₉Qataq itauaatac na choxoraqpi,

qaq da lqouagaxanaqtaic qalaq nache queta,

qaq da la'añaxac huo'o qanqa'en da llo'oxoyec.

₁₀Qaq ca qauemaic da ila'a de'era nache dalemata,

nache inaga't naua lhue qalaxaye taỹa'a da imeuo.

Qataq da lqopitaxanaqtaic na qauemaicpi taỹa'a da imeuo.