Salmos 113

₁¡Qaỹo'oxoren qome Ñim Nataxala'!

Qami' lamaxashecpi Ñim Nataxala',

qavio'oxoyiñi qome da le'enaxat Ñimaye.

₂Qaỹo'oxoren qome da le'enaxat Ñim Nataxala',

chegoqchiguiña nagui nache chochaq tatec qome.

₃Chegoqchiguiña da nnoxoosheguem

añi nala' nache ivitta'a da inoxooñi,

da qaỹo'oxoreetac da le'enaxat Ñim Nataxala'.

₄Ñim Nataxala' ilotague' 'enauac na ỹotta'a't shiỹaxauapi,

da llo'oxoyec qalaq imattalec na piguem.

₅¿Negue'tom ca 'eeta'am Ñim Nataxala' maye Qanatamnaxala'?

Ñimaye netasheguema na pa'asheguem da ilotague' 'enauacna,

₆qalaxaye sa na'amaqten da namataña

na piguem qataq ana 'alhua.

₇Ñimaye chegoqoolec naqa'en na namoxoỹaxa

da nauaxaỹaxaasheguem ca choxoraq,

qataq nqateeguesop da lachoxoyec ca deuenaxaatac,

₈da yaqto' nso'ootañi da ỹalectaigui naqa'en ca 'amaqtaqaicpi,

cam 'amaqtaqaicpi maye maiche lauo' le'ecpi.

₉Qataq Ñimaye ỹo'ot da huo'o ca lma' aca 'alo maye sa deco'o,

qataq ỹanem da ntonaxac da ishet da nate'e acamaye.

¡Qaỹo'oxoren qome Ñim Nataxala'!