Salmos 115

₁'Am Nataxala', da ño'oxoyec saishet da qaralamaxat,

cha'aye damaye lalamaxat da 'are'enaxat,

souaxat da 'arauotaxanaqtaic qataq da 'eesa 'arataxac.

₂Qaq ta'ainco' taxa da qomi' inatta'ape na shiỹaxauapi, da 'eeta':

«¿Hua'ague ca hueta'ague ca Qanatamnaxala'ai?»

₃Ñim Qanatamnaxala' neto'ot na piguem,

Ñimaye ỹo'ot 'enauac nam huotaique co'ollaxa da ỹo'otpi.

₄Qaq na natamnaxala'pi namayepi

qalaq ỹachegoxotaigui na lcat plata qataq na oro,

qaq namayepi maiche lo'onatac na shiỹaxauapi.

₅Namayepi huo'oi naua ala'api qalaxaye saishet da detaqa,

qataq huo'oi naua la'ai'te qalaxaye saishet da huo'o ca ila'a,

₆qataq huo'oi naua ltela qalaxaye saishet da hua'aqa,

qataq huo'o na lmic qalaxaye saishet da detaxan,

₇qataq huo'oi naua lhua'q qalaxaye saishet da depotaxan,

qataq huo'oi naua lapia'ate qalaxaye saishet da queuoỹapigui',

qataq saishet da qaỹa'axaỹa ca lavilỹaxac ana lqoichiqui.

₈Namayepi 'eeta'am nam ỹo'ot co'ollaxa namayepi,

qataq na ỹa'amaqteetac namayepi.

₉Qami' Israel le'ecpi, qaupi'iỹai qome Ñim Nataxala',

Ñimaye nacheñi ñi qami' itauaata'ape qataq qami' mpaxattaleguete.

₁₀Qami' llalaqpi so Aarón, qaupi'iỹa'ai qome Ñim Nataxala',

Ñimaye nacheñi ñi qami' itauaata'ape qataq qami' mpaxattaleguete.

₁₁Qami' maye huo'o naq 'enec qanqa'eñi Ñim Nataxala',

qaupi'iỹa'ai qome Ñimaye,

Ñimaye nacheñi ñi qami' itauaata'ape qataq qami' mpaxattaleguete.

₁₂Ñim Nataxala' qomi' iuennata'alo

nache qomi' ichoxore'n qome,

qataq ichoxoren qome na Israel le'ecpi,

qataq ichoxoren qome cam chegoxoguetpi so Aarón.

₁₃Qataq ichoxoren qome cam huo'o naq 'enec naqa'en Ñimaye,

nam lta'araicpi qataq na qapio'olecpi.

₁₄Ñim Nataxala' nquictauec naqa'en qome

da lchoxonnataxanaxa da qoñiita,

qami' qataq cam qaỹa'alquipi.

₁₅Qami' ỹanema qome da lchoxonnataxanaxa,

Ñim Nataxala' maye lo'onatac na piguem qataq ana 'alhua.

₁₆Ñim Nataxala' lalamaxat na piguem,

qalaxaye ana 'alhua ỹanem na shiỹaxauapi.

₁₇Nam leuaxaicpi qalaq saishet da ỹo'oxoreetac Ñim Nataxala',

qataq ca mashe huetaigui ca ntochiguiñi.

₁₈Qomi' qalaxaye sho'oxorenaqtac Ñim Nataxala',

nagui qataq chochaq tatec qome.

¡Qaỹo'oxoren qome Ñim Nataxala'!