Da atamnaxac da qoỹan da 'achecỹaxac
1Aỹem sauotec Ñim Nataxala',
cha'aye Ñimaye hua'axaỹa da ñachoxonnaxac,
2qaq cha'aye Ñimaye aỹem hua'axaỹa,
nache 'enauaque naua na'axa'te da ñachaalataxac da seỹaxaatacot.
3So lcoñetaxanaxat da nleuaxa qalaq mashe aỹem lpachigui,
qataq mashe aỹem loxonec da ỹachetataic souaxat añi huachiqui,
qataq sevireguet da icolanaxa qataq da ñiqui'ic.
4Huaña nache seỹaxanot Ñim Nataxala', sheeta':
«'Am Nataxala', 'am ñachoxonnot
da 'anca'alaxatec da ñachaalataxac.»
5Ñim Nataxala' ỹataqta no'on da lataxac qataq hualaxaunaxaic,
Ñim Qanatamnaxala' ỹataqta choxonnataxanaxaic.
6Ñim Nataxala' mpaxattalec ca huesota da lataxac,
co'ollaq mashe sa ñerasheguem qalaq Ñimaye aỹem nca'alaxatec.
7Qaq nagui, she'eguelaxa da she'emaqtac,
cha'aye Ñim Nataxala' aỹem ỹo'otec da no'on,
8qataq aỹem nca'alaxateeguesop da nleuaxa,
qataq iỹoi' naua ỹache' qataq saishet naqa'en da souañi.
9Qaq ỹoqo'oye nache shecto'ot qome da salaxaguet Ñimaye,
da sootalec ana 'alhua maye lma' nam huo'o da lca'alaxa.
10Qaq na'aictaxa da lta'araic ca iuogoxo,
qalaxaye ñaqaiyeta sa'amaqteetac Ñimaye.
11Qaq ỹoqo'oye co'ollaq sootaigui so ỹachetataic, nache sheeta':
«'Enauac na shiỹaxauapi da shepecaicpi.»
12¿Qaq ca sheeteco' da sesheeten,
'enauac da lqouagaxanaqtaic Ñim Nataxala'?
13Qaq nacherato' da san qome da ña'achecỹaxac souaxat da ica'alaxa,
qataq seỹaxaatega qome da le'enaxat Ñim Nataxala'.
14Qataq sepacchiguilo qome naua ỹa'aqtaqa
maye sanoto co'ollaxa Ñim Nataxala',
ỹauaachigui ñaqa'en so nhuo' le'ecpi maye lalamaxatpi Ñimaye.
15Ñim Nataxala' ỹataqta huo'o da nqui'ic,
da ỹauaachigui da l-leuaxa cam quetague' Ñimaye.
16¡'Am Nataxala', maiche aỹem 'aramaxashec!
¡Qataq maiche aỹem llalec aso 'aramaxashe!
Qaq ỹoqo'oye 'ausogui co'ollaxa so ñecoñetaxat.
17Qaq ỹoqo'oye 'am sanot qome aca ỹachetaqtaxanaqte
da so'ot ca ña'achecỹaxac, qataq seỹaxana qome
da 'are'enaxat, 'Am Nataxala'.
18Qataq sepacchiguilo qome naua ỹa'aqtaqa
maye sanoto co'ollaxa Ñim Nataxala',
ỹauaachigui ñaqa'en na nhuo' le'ecpi maye lalamaxatpi Ñimaye,
19qom huaña ye nqasoxoc ñi lma' Ñim Nataxala',
maye huangui na laiñi ye Jerusalén.
¡Qaỹo'oxoren qome Ñim Nataxala'!
