Da chochaq tatec lauotaxanaqtaic Ñim Nataxala'
1Qavio'oxoyiñi qome Ñim Nataxala'
cha'aye Ñimaye ỹataqta soxoraic,
qataq chochaq tatec da lauotaxanaqtaic.
2Na Israel le'ecpi ñaq 'enapec qome:
«Da lauotaxanaqtaic Ñim Nataxala' chochaq tatec.»
3Qataq na ntaxaỹaxanaxanecpi ñaq 'enapec qome:
«Da lauotaxanaqtaic Ñim Nataxala' chochaq tatec.»
4Qataq nam huo'o naq 'enec naqa'en Ñim Nataxala' 'enapec qome:
«Da lauotaxanaqtaic Ñim Nataxala' chochaq tatec.»
5Co'ollaq huo'o da ỹachetataic nache seỹaxanot Ñim Nataxala',
qaq Ñimaye aỹem hua'axaỹa nache aỹem huesochiguiñi naqa'en.
6Ñim Nataxala' aỹem hueta'aguet,
ỹoqo'oye saishet da she'etac,
qataq saishet da she'etega ca aỹem ỹo'otec ca shiỹaxaua.
7Ñim Nataxala' aỹem hueta'aguet,
Ñimaye aỹem itauaatac qaq ỹoqo'oye
sauaachigui qome da nanoxonaguec na aỹem nquiỹategapi.
8Ỹoqo'oye no'on da qaipi'iỹa'a Ñim Nataxala',
qaq saq 'ena'am da qaipe'etega ca choche shiỹaxaua.
9Ỹoqo'oye no'on da qaipi'iỹa'a Ñim Nataxala',
qaq saq 'ena'am da qaipe'etega na 'amaqtaqaicpi shiỹaxauapi.
10'Enauac na ỹotta'a't shiỹaxauapi da aỹem coleesop co'ollaxa,
qalaxaye serolec da le'enaxat Ñim Nataxala' nache 'enauac da ỹoxonec.
11Namayepi imauec co'ollaxa da aỹem coleesop,
qalaxaye serolec da le'enaxat Ñim Nataxala' nache 'enauac da ỹoxonec.
12Namayepi aỹem coleesop 'eeta'am ca te'esaq lta'a lalaxat,
qalaxaye da lalemataic 'omañi 'eeta'am ca norec da sa qaỹaloq da no'omñi,
qalaxaye serolec da le'enaxat Ñim Nataxala' nache 'enauac da ỹoxonec.
13Namayepi aỹem sa icherapec da aỹem ỹamaxañi da yaqto' souañi,
qalaxaye Ñim Nataxala' anac da aỹem itauan.
14Qaq ỹoqo'oye aỹem so'onaxaato'ot Ñim Nataxala',
cha'aye Ñimaye ỹauo'o da ỹa'añaxac qataq nacheñi ñi ica'alaxaqui.
15Na lma'pi na shiỹaxauapi no'on da lataxac,
qalaq huo'o da na'alaxac da qantootalec
da noxonaxanaxac maye, 'eeta':
«Da la'añaxac Ñim Nataxala' ivira'a da doxonaxan.
16Da la'añaxac Ñim Nataxala' ỹataqta lta'araic,
da la'añaxac Ñim Nataxala' ivira'a da doxonaxan.»
17Qaq ỹoqo'oye aỹem saishet qome da seleu,
nacherata da ñeca'altauec yaqto' sa'axattac
'enauac na ỹo'otpi Ñim Nataxala'.
18Ñim Nataxala' ỹataqta aỹem sa ỹala'ac
co'ollaxa da ỹo'ot so ñeuaxanaguec,
qalaxaye saishet da aỹem ỹaneguet da nleuaxa.
19Ñaq qauauachiỹoiguilo qome naua laso'omi ana atamnaxaqui,
cha'aye sauotaique da sepa'auo da sanot da ña'achecỹaxac Ñim Nataxala'.
20Cha'aye nachenaua naua naso'omi Ñim Nataxala',
qataq nachenaua naua lleguereuo ca pe'etega Ñimaye.
21'Am sho'oxoren qome 'Am Nataxala',
cha'aye aỹem 'auasateguet co'ollaxa qataq nache 'am ica'alaxaqui.
22Qaq so coma' maye ỹo'otan co'ollaxa nam nỹec lo'opi,
nacheso nagui som lo'oxonaxala' da huo'o ca qano'oxoosheguem.
23Damaye nachera da ỹo'ot co'ollaxa Ñim Nataxala',
qaq damaye ỹo'ot da qara'aalaxa.
24Qaq ne'ena na'a'q nachena na huetoigui co'ollaxa,
da Ñim Nataxala' do'onataxan, ỹoqo'oye qomi' ỹataqta qaramachiguiñi
qataq ñetonaqtapeguec qome namaye.
25'Am Nataxala', ñaq qomi' 'anca'alaxatrec,
'Am Nataxala', qomi' 'anqouagueque,
qomi' 'anema da no'on ca qoyecỹaxac.
26Ỹataqta no'on da lviraxac ca nactaigui da le'enaxat Ñim Nataxala'.
Ỹoqo'oye nagui da souaqtaigui na lma' Ñim Nataxala',
nache qami' sanaxama da qanchoxonnataguiiqui.
27Ñim Nataxala' nacheñi Ñim Lo'onatac 'Enauacna,
Ñimaye qomi' icoỹattaleguete.
Qaq ỹoqo'oye qalapoñiỹa't qome,
nache qauacheetauo aca qo'oipaq lcouepi,
da qaroiua'alo naua lcoue añi nca'atoxonaxalate.
28Qaq 'am nache 'Am Ñatamnaxala' ỹoqo'oye 'am sho'oxoren qome,
qataq sho'oxoren da 'ara'amaqchec.
29Ñaq qavio'oxoyiñi qome Ñim Nataxala',
cha'aye Ñimaye ỹataqta soxoraic qataq da lauotaxanaqtaic chochaq tatec.
