Ño'oxonnataguec na lqataxacpi Ñim Lo'onatac 'Enauacna
1Ỹataqta machiguiñi qome cam quetague' so no'on nqa'aic,
cam ỹataqta queteguelo naua lqataxaco Ñim Nataxala'.
2Ỹataqta machiguiñi qome ca ỹaỹamaxatteque naua lamaxasoxonaxaco,
qataq imauec da lquiyaqteỹaxac da nmittapigui naamaye.
3Cam saishet da ỹo'ot ca qauem,
nacherata da quetegue da nqa'aicỹaxac Ñim Nataxala'.
4Cha'aye 'Am Nataxala', 'auamaxasoxooleguete co'ollaxa
naua 'aramaxasoxonaxaco da yaqto' ỹataqta qaipacchiguilo.
5Ỹoqo'oye da iyaxa da shectalec
da salaxagueta naua 'arqataxaco.
6Yaqto' saishet da ña'aloxootac,
da ivita da semete'n naua 'aramaxasoxonaxaco.
7Nache imauec da huesota da iquiyaqteỹaxac da 'am sho'oxoreetac,
qom ỹataqta saỹateeteguelo naua no'oiteguelo 'arqataxaco.
8Aỹem sauotaique da sepacchiguilo naua 'arqataxaco,
saishet qome da aỹem 'aualat.
9¿Negue'tom ca chegoqchigui da ishet
da qui'itta da nachaalataxac ca nsoqolec?
Qomye nacherata da ỹalaxagueta naua 'ara'aqtaqa.
10Qaq aỹem, ye ỹataqta imauec
da iquiyaqteỹaxac da 'am ñimittaique
ỹoqo'oye saishet qome da aỹem 'auashenem
da sheca'aisalo naua 'aramaxasoxonaxaco.
11Añi iquiyaqte ỹataqta soxotoiguilo naua 'ara'aqtaqa,
yaqto' saishet da 'am hueto'ot ca ỹasouaxashet.
12Qaq 'am qaỹo'oxoren qome 'Am Nataxala',
aỹem 'auapaxaguenec na 'arqataxacpi.
13Nache sa'axattac qome 'enauac na 'arqataxacpi,
maye 'aua'axattac co'ollaxa.
14Ỹataqta samachiguiñi qome da shectalec
da llecỹaxac naua 'aramaxasoxonaxaco,
ỹataqta napacalec ñaqa'en 'enauac da nsallaxa.
15Qataq nache ñapaxagueetegalo qome naua 'aramaxasoxonaxaco,
qataq ỹataqta selotegue da 'anqa'aicỹaxac.
16Qataq ỹo'ot qome da samachiguiñi naua 'arqataxaco,
qataq saishet qome da secoua'aisalo naua 'ara'aqtaqa.
17Ñaq aỹem 'auaỹamaxatta qome cha'aye aỹem 'aramaxashec,
yaqto' nache shecto'ot da salaxagueta naua 'ara'aqtaqa.
18Qataq nlorec 'anqa'en naua ỹa'ai'te,
yaqto' sela'a da llo'oxoyec naua 'arqataxaco.
19Cha'aye aỹem sachegaqauec da soota'a ne'ena 'alhua,
qaq saishet qome da aỹem 'oxocheesopa naua 'aramaxasoxonaxaco.
20Cha'aye imauec ye na'a'q da seuet ana itogue,
souaxat da iyaxa da saỹaten ca llec naua 'aramaxasoxonaxaco.
21Cha'aye 'am, 'aviraxato'ot ca saishet da ncherapec
qataq na qauemaicpi maye ca'aisalo naua 'aramaxasoxonaxaco.
22Aỹem 'eltaxaneguet qome da lalemataic
qataq da le'enaxanaxac namayepi,
cha'aye aỹem ỹataqta sepacchiguilo naua 'aramaxasoxonaxaco.
23Ỹoqo'oye na'aictaxa da na 'añaxaicpi aỹem mpa'aguena,
qalaxaye aỹem nacherata da ñapaxagueetegalo naua 'arqataxaco.
24Cha'aye naua 'aramaxasoxonaxaco
nachenaua naua ỹo'ot da samachiguiñi,
qataq nachenaua nam aỹem huaqattega.
25Cha'aye aỹem mashe soota'aguet na 'alhua,
ỹoqo'oye ñaq 'aupacchigui qome da 'ara'aqtac
da aỹem 'aỹa'anem da ica'alaxa.
26Cha'aye mashe aỹem 'auasateguet
co'ollaq 'am sa'axatem da ñeqa'aicỹaxac,
qaq ñaq aỹem 'auapaxaguenec qome na 'arqataxacpi.
27Qataq aỹem 'aỹa'anem qome da saỹaten
ca llec na 'aramaxasoxonaxacpi yaqto' seuennataxaalec ca ỹo'ot da 'ayo'oxoyec.
28Cha'aye mashe aỹem nlaqchigui da ỹachetataic,
ỹoqo'oye aỹem 'anllechiguiñi qome
cha'aye nachera da maiche 'ara'aqtac co'ollaxa.
29Qataq aỹem 'eltaxaneguet qome na llecpi da natenataxanaxac,
nache aỹem 'anqouaguec da aỹem 'auapaxaguenec na 'arqataxacpi.
30Cha'aye aỹem lleca'aua'a da llecỹaxac da 'eesa lataxac,
qataq shecteguelo naua 'arqataxaco.
31'Am Nataxala', aỹem ỹataqta sa seỹotrec naua 'aramaxasoxonaxaco,
saishet qome da 'auo'ot ca ỹa'aloxo.
32Aỹem ỹataqta seỹalapigui' da shectegue
da llecỹaxac naua 'aramaxasoxonaxaco,
cha'aye 'anlaxatchigui añi iquiyaqte da ñetonaxac.
33'Am Nataxala', aỹem 'auapaxaguenec qome
da shecteguelo naua lleco naua 'arqataxaco,
yaqto' ỹataqta sepacchiguilo choche ivitta'a ca loga't.
34Aỹem 'aỹa'anem qome ca ỹauattonaxanaxac
da yaqto' saỹamaxa't naua 'arqataxaco,
yaqto' imauec ñaqa'en da iquiyaqteỹaxac da sepacchiguilo.
35Aỹem 'auauecteuga qome da llecỹaxac na 'aramaxasoxonaxacpi,
cha'aye damaye ỹo'ot da samachiguiñi.
36Qaq da iquiyaqteỹaxac quetegue qome 'anqa'en na 'aramaxasoxonaxacpi,
qaq saishet da quetague' aca naueque maye chegaqaigui da ncachaxac.
37Qataq saishet da aỹem 'auashenem da selogui ca qaica ca naigui,
qataq aỹem 'aỹa'anem da ica'alaxa yaqto' shectegue so 'anqa'aic.
38'Aupacchigui qome so 'ara'aqtac
maye 'aỹa'anem co'ollaxa ne'ena 'aramaxashec,
'eeta'am 'anqa'en da qonetec cam huo'o naq 'enec naqa'en 'am.
39Aỹem 'anqateeguesop qome na aỹem ipataqtañi maye ỹo'ot da icolanaxa,
cha'aye naua 'arhuennataxaco ỹataqta no'oñi.
40Aỹem ỹataqta sauoteque naua 'aramaxasoxonaxaco,
ỹoqo'oye aỹem 'aỹa'anem qome da ica'alaxa,
cha'aye 'am ỹataqta no'on da 'arataxac.
41'Am Nataxala', aỹem 'anamaxa qome ca 'arauotaxanaqtaic,
qataq ca 'arca'alaqtaxanaxac, cha'aye nachera da 'auachaxanapec co'ollaxa.
42Yaqto' ishet da sasateguet ca aỹem nquiỹatega,
cha'aye ỹataqta sepi'iỹa'alo naua 'ara'aqtaqa.
43Qataq saishet qome da 'anqateeguesop na aỹap
naua na'aqtaqa maye 'eesora,
cha'aye aỹem ñaquita'alo naua no'oñi 'ara'aqtaqa.
44Qataq nache 'eetai' qome da shecto'ot,
da salaxagueta naua 'arqataxaco.
45Qaq ỹataqta aỹem huesochiguiñi qome,
cha'aye ỹataqta ñemitapigui naua 'aramaxasoxonaxaco.
46Qataq sa'axatem qome naua 'aramaxasoxonaxaco na nta'alpi,
qaq saishet qome da ña'aloxootac,
47aỹem ỹataqta sauoteque naua 'aramaxasoxonaxaco,
cha'aye naamaye ỹo'o't da samachiguiñi.
48Aỹem ỹataqta sauoteque naua 'aramaxasoxonaxaco,
qataq sachaxaato'oto naua ihuaxaye naamaye,
qaq ỹoqo'oye seuennataxaalec qome ne'enaua 'arqataxaco.
49Qaq 'auennata'a qome so 'ara'aqtac,
maye 'aỹa'anem co'ollaxa ne'ena 'aramaxashec,
som 'ara'aqtac maye ỹo'ot da ñaquitaxac.
50Qaq damaye nachera da ỹo'ot da ỹa'añaxac da sootaigui da ñiqui'ic,
cha'aye naua 'aỹa'a'n 'ara'aqtaqa aỹem ỹanema da ica'alaxa.
51Nam qaica ca iren qalaq nache queto'ot da aỹem inogoqchettac,
qalaxaye aỹem saishet da saxaarec naua 'arqataxaco.
52'Am Nataxala', aỹem tachigui ye iuel
naua hua'auchiyiñi co'ollaxa 'ara'aqtaqa,
nache naamaye ỹo'o't da ỹa'añaxac.
53Cha'aye aỹem nlaqchigui da inogoxonaxac souaxat na 'etaxaloxoicpi,
nam ca'aisalo co'ollaxa naua 'arqataxaco.
54Qalaxaye naua 'arqataxaco nachenaua nam so'oota'ape,
ne'ena 'alhua maye choche sachegaqauec da soota'a.
55'Am Nataxala', ye pe qalaq tachigui ye iuel da 'are'enaxat,
cha'aye sauotaique da sepacchiguilo naua 'arqataxaco.
56Cha'aye nachera da sepa'aỹa'aguet da so'ot,
da salaxagueta naua 'aramaxasoxonaxaco.
57'Am Nataxala', nache 'amta da aỹem qoueta'aguet,
ỹoqo'oye san co'ollaxa so ỹa'aqtac
da salaxagueta naua 'ara'aqtaqa.
58Ỹataqta imauec ñaqa'en da iquiyaqteỹaxac da 'am ñimitaique,
ỹoqo'oye aỹem 'auchoxoren qome
cha'aye nachera da 'auachaxanapec co'ollaxa.
59Aỹem seuennataxaatapeguelec co'ollaxa da maiche ỹecỹaxac,
nache she'eguelaxa da salaxagueta naua 'aramaxasoxonaxaco.
60Nache ỹataqta seỹalapigui', saishet da ñaỹaloxon,
da yaqto' sepacchiguilo naua 'aramaxasoxonaxaco.
61Na'aictaxa da aỹem coleesop da aỹem nqoviitac na 'etaxaloxoicpi,
qalaxaye saishet da secoua'aisalo naua 'arapaxaguenataxanaxaco.
62Qataq da laiñi ye pe qalaq soosheguem da 'am sanot da ña'achec,
souaxat naua no'oñi 'ara'aqtaqa.
63Aỹem ñauochaxaua 'enauac nam huo'o naq 'enec naqa'en 'am,
qataq ỹaỹamaxa't naua 'aramaxasoxonaxaco.
64'Am Nataxala', aỹem 'auapaxaguenec qome naua 'arqataxaco,
cha'aye ana 'alhua nlaqtelec da 'arauotaxanaqtaic.
65'Am Nataxala', ỹataqta 'auaỹamaxatta co'ollaxa ne'ena 'aramaxashec,
cha'aye nachera da maiche 'ara'aqtac co'ollaxa.
66Aỹem 'aỹa'anem qome ca naỹaanec qataq ca no'on nhuennataxa,
cha'aye aỹem sa'amaqte'n naua 'aramaxasoxonaxaco.
67Cha'aye co'ollaq saxanaxa da huo'o
da ñeque'eenaxac nache qalota na isomaxacpi,
qalaxaye nagui, aỹem salaxagueta naua 'ara'aqtaqa.
68Cha'aye 'am soxoraic qataq 'auo'ot ca ỹaỹamaqchiguiñi,
ỹoqo'oye aỹem 'auapaxagueneque qome naua 'arqataxaco.
69Na qaica ca iren, qalaq aỹem ỹasaxalec na latenataxanaxacpi,
qalaxaye aỹem imauec da iquiyaqteỹaxac
da saỹamaxa't naua 'aramaxasoxonaxaco.
70Cha'aye da lhuennataxac namayepi mashe sa ỹaỹamaxañi,
qalaxaye naua 'arqataxaco ỹo'ot da samachiguiñi.
71Qaq aỹem no'onaxat co'ollaxa da huo'o da ñeque'eenaxac,
cha'aye nachera da ỹo'ot da sauatto'n naua 'arqataxaco.
72Cha'aye aỹem, ỹactec ñaqa'en da no'o'n naua 'arqataxaco,
qaq napacalec aca qalota anom oro qataq plata.
73Cha'aye naua 'arhua'q maiche aỹem lo'onatac qataq 'enauac da ỹataxac,
ỹoqo'oye aỹem 'aỹa'anem qome ca ỹauattonaxanaxac
yaqto' saỹate'n naua 'aramaxasoxonaxaco.
74Yaqto' cam huo'o naq 'enec naqa'en 'am, machiguiñi da aỹem ilota'a,
cha'aye ỹataqta huo'o da ñaquitaxac naua 'ara'aqtaqa.
75'Am Nataxala', aỹem saỹaten da naua no'oñi
'arhuennataxaco ỹataqta ỹaỹamaqchiyiñi,
qaq ỹoqo'oye 'itchiguiñi da 'auo'ot da ñeque'eenaxac.
76Qaq da 'arauotaxanaqtaic nachera qome da ỹo'ot da samachiguiñi,
cha'aye nachera da 'ara'aqtac maye 'aỹa'anem co'ollaxa ne'ena 'aramaxashec.
77Ñaq 'auanacot qome da 'archoxonnataxanaxa,
yaqto' aỹem ỹanem da ica'alaxa,
cha'aye naua 'arapaxaguenataxanaxaco ỹo'o't da samachiguiñi.
78Ñaq huo'o qome da la'aloxo ca qaica ca iren,
cha'aye qaica ca sasouaxat qalaq aỹem sa iyacnapec,
qalaxaye aỹem ñapaxaguenalo qome naua 'aramaxasoxonaxaco.
79Qaq ñaq aỹem naua'a qome ca huo'o naq 'enec naqa'en 'am,
cam ỹauatto'n naua 'aramaxasoxonaxaco.
80Qaq da iquiyaqteỹaxac ỹataqta queteguelo qome,
naua 'aramaxasoxonaxaco, yaqto' saishet da huo'o ca ỹa'aloxo.
81Aỹem, nquictañi da la'añaxac da ñachaalataxac,
souaxat da seuattaique ca 'arca'alaqtaxanaxac,
qalaxaye huo'o da ñaquitaxac naua 'ara'aqtaqa.
82Qataq nquictrañi da la'añaxa'c naua ỹa'ai'te,
souaxat da seuatta'aguet cam 'auachaxanapec co'ollaxa,
nache sheeta': «¿Chaq laguio' da 'auanac da aỹem 'aua'añaqchet?»
83Qaq na'aictaxa da sheeta'am aca lota maye ỹaueraqchet na lmala'q,
qalaxaye saishet da secoua'aisalo naua 'aramaxasoxonaxaco.
84¿Chaq lcate' caua na'axa'te da seuataxaatac?
¿Chaq laguio' qaq 'anmit nam aỹem icaatac?
85Nam qaica ca icherapec qalaq ỹo'ot ana lshere da aỹem nqovin,
nam saishet da queteguelo naua 'arqataxaco.
86Cha'aye 'enauac na 'aramaxasoxonaxacpi ỹataqta 'eesa.
Qalaxaye aỹem qaicaatac qamaq qaica ca sasouaxat,
ỹoqo'oye aỹem 'autauan qome.
87Aỹem mashe huac da aỹem qaỹapalaxat ana'ana 'alhua,
qalaxaye saishet da saxaarec naua 'aramaxasoxonaxaco.
88Ñaq aỹem 'anca'alaxatec qome,
souaxat da lta'araic 'arauotaxanaqtaic,
nache aỹem sepacchiguilo qome naua 'aramaxasoxonaxaco.
89'Am Nataxala', naua 'ara'aqtaqa chochaq tatrec,
sa nqui'c da hueto'oto na piguem.
90Qataq da sa nquic 'arataxac chochaq tatec,
'am 'alapaxañi co'ollaxa ana 'alhua, nache saishet da deraỹai'.
91Qataq 'enauac nam huo'o, saishet da deraỹai',
cha'aye nachera da 'aramaxasoxonaxac co'ollaxa,
qaq 'enauac namayepi 'am do'onataxaatacot.
92Naua 'arqataxaco taxa da saishet da ỹo'ot da ỹamaicỹaxac,
nache sogote taxa da aỹem imeuo naqa'en da ỹaquicoxo.
93Ỹoqo'oye saishet qome da secoua'aisalo naua 'aramaxasoxonaxaco,
cha'aye naamaye chegoqchiguilo da 'auauo'o da ica'alaxa.
94Ñaq aỹem 'anca'alaxatec qome cha'aye aỹem 'aralamaxat,
qataq ỹataqta shectelec da ñapaxaguenalo naua 'aramaxasoxonaxaco.
95Na qauemaicpi aỹem iuatta'aguet da huotaique aỹem nlaxaañi,
qalaxaye aỹem ỹataqta selotegueta naua 'aramaxasoxonaxaco.
96Cha'aye sauaachigui da 'enauac
na ỹaỹamaqchiguiñi da lataxac huo'o ye loga't,
qalaxaye naua 'aramaxasoxonaxaco qaica ca loga't.
97Aỹem ỹataqta sauoteque naua 'arqataxaco,
ỹoqo'oye 'enauac ye na'a'q da ñapaxagueetegalo.
98Qaq naua 'aramaxasoxonaxaco ỹo'ot da aỹem ỹaanaxanaxaic,
nache ñapacalec na ñepa'aguenaxauapi,
cha'aye naamaye nache 'eetai' da aỹem hueto'oto.
99Da ỹaỹaanataxanaxac napacalec 'enauac na ñapaxaguenaxala'pi,
cha'aye ñapaxagueetegalo naua 'aramaxasoxonaxaco.
100Da ỹaỹaanataxanaxac napacalec na ỹa'axaiquipi,
cha'aye salaxagueta naua 'aramaxasoxonaxaco.
101Qataq ca'aisalo ñaqa'en naua ỹapia'ate 'enauac na qauem nqa'aicpi,
da yaqto' sepacchiguilo naua 'ara'aqtaqa.
102Qataq saishet da sheca'aisalo naua no'oñi 'ara'aqtaqa,
cha'aye nache 'am da aỹem 'auapaxagueetac.
103Ỹataqta amai' naua 'ara'aqtaqa da huetaiguilo na aỹap,
napacalec da lamaic ca te'esaq lli'i da taigui na aỹap.
104Naua 'aramaxasoxonaxaco nache sachegoxotaiguilo da ỹaỹaanataxanaxac,
ỹoqo'oye ỹataqta saỹemec da llecỹaxac da natenataxanaxac.
105Naua 'ara'aqtaqa 'eeta'ama aca ncoỹaraxanaxaqui
da icoỹatta'aguelo naua iqauaxaqui',
qataq icoỹatta'ague so ñeqa'aic.
106Aỹem san co'ollaxa so ỹa'aqtac
da yaqto' sepacchiguilo naua nalochiyiñi 'ara'aqtaqa.
107'Am Nataxala', aỹem ỹataqta qalota da iuogoxo,
aỹem 'anca'alaxatec qome, cha'aye nachera da 'ara'aqtac co'ollaxa.
108'Am Nataxala', 'auaconeguet qome
da ỹachetaqtaxanaxac maye chegaqaigui na aỹap,
nache aỹem 'auapaxagueneque naua 'ara'aqtaqa.
109Cha'aye da ñachaalataxac nache queta da huetaigui da lchecỹaxac,
qalaxaye saishet da secoua'aisalo naua 'arqataxaco.
110Na qauemaicpi qalaq ỹauo'o ana lqoina da aỹem nqovin,
qalaxaye aỹem saishet da sheca'aisalo naua 'aramaxasoxonaxaco.
111Cha'aye naua 'aramaxasoxonaxaco
naamaye chochaq tatec da ỹalamaqa'ate,
qaq nachenaua na ỹo'ot da ntonaxac da iquiyaqteỹaxac.
112Aỹem, ỹataqta iquiyaqteỹaxac da sasateguet
da sepacchiguilo naua 'arqataxaco,
qaq damaye nache shecto'ot, choche ivitta'a ca loga't.
113Aỹem ỹataqta saỹemec na saq ỹataxalec da lataxac,
qalaxaye sauoteque naua 'arqataxaco.
114Cha'aye nache 'am ñeqañoxotaqa' qataq ipaqtaxanaxat,
qataq naua 'ara'aqtaqa ỹataqta sachetaleguete da ñaquitaxac.
115Ñaq aỹem qauỹocheelec qome qami' qauemaicpi,
cha'aye sauotaique da sepacchiguilo
naua lamaxasoxonaxaco Ñim Ñatamnaxala'.
116Ñaq aỹem 'anasoqchiguiñi qome,
cha'aye nachera da 'auachaxanapec co'ollaxa, yaqto' nache ñeca'altauec,
qataq saishet da ỹauo'o ca ña'aloxonaxac de'era ñaquitaxac.
117Aỹem 'anasoqchiguiñi qome yaqto' ñeca'alec,
yaqto' sepacchiguilo qome naua 'arqataxaco.
118'Am, saishet da 'auooneguet ca ca'aisalo naua 'arqataxaco,
cha'aye ỹataqta saq'e'n naua lhuennataxaco.
119Na qauemaicpi maye huetalec ana 'alhua
'eeta'am 'anqa'en ca lasogoñi,
qaq ỹoqo'oye aỹem sauoteque naua 'aramaxasoxonaxaco.
120Da ỹo'ocỹaxac ỹataqta iviloxol
souaxat da icolanaxa da qoneta,
cha'aye huo'o naq 'enec ñaqa'en naua 'arqataxaco.
121Aỹem so'otta'ape naua ỹaỹamaqchiyiñi
qataq naua nalochiyiñi lataxaco,
qaq ỹoqo'oye saishet qome da aỹem 'aỹa'aneguet,
nam nshetaique da aỹem ỹachetaiya'.
122Ñaq 'auo'otec qome ca no'on ne'ena 'aramaxashec,
yaqto' saishet da aỹem ỹachetaiya' ca qaica ca iren.
123Cha'aye naua ỹa'ai'te mashe qaica ca la'añaxa'c
souaxat da seuattaique ca 'arca'alaqtaxanaxac,
qataq da seuattaique da 'aupacchigui da 'auachaxanapec co'ollaxa.
124Qaq ỹoqo'oye 'auo'otec qome
da 'arauotaxanaqtaic ne'ena 'aramaxashec,
qataq aỹem 'auapaxagueneque naua 'arqataxaco.
125Qaq cha'aye aỹem 'aramaxashec,
ỹoqo'oye aỹem 'aỹa'anem qome ca ỹauattonaxanaxac,
yaqto' sauattoote' naua 'aramaxasoxonaxaco.
126'Am Nataxala', mashe ivita ye laloqo' da huo'o ca 'auo'ot,
cha'aye mashe sa qaỹalaxagueta naua 'arqataxaco.
127Ỹoqo'oye aỹem ỹataqta sauoteque naua 'aramaxasoxonaxaco,
napacalec ñaqa'en da lyac ca ỹataqta no'on oro.
128Ỹoqo'oye ỹataqta sauoteque naua 'aramaxasoxonaxaco,
qaq ỹoqo'oye sa sesheteguet 'enauac da ñecỹaxac maye saq 'en.
129Ỹataqta huo'o da lyacỹaxac naua 'aramaxasoxonaxaco,
ỹoqo'oye aỹem ỹataqta salaxagueta.
130Cha'aye da qaỹa'axatte' naua 'ara'aqtaqa nache ỹo'ot da yo'oqchiguiñi,
qataq ỹanem da lauattonaxanaxac ca huesota da lataxac.
131Qaq ỹoqo'oye sauachigui na aỹap da setaqa,
cha'aye ỹataqta huo'o da ỹauoche naua 'aramaxasoxonaxaco.
132Qaq aỹem 'anamata'a qome, ñaq aỹem 'auchoxoren,
'eeta'am da qonetec naxa cam ỹauotec da 'are'enaxat.
133Qataq 'auo'ot qome da shecteguelo naua 'ara'aqtaqa,
qataq saishet da aỹem loxonec 'anqa'en na qauemsat.
134Qataq aỹem 'eltaxaneguet qome da layeloxo na shiỹaxauapi,
cha'aye sauotaique da salaxagueta naua 'aramaxasoxonaxaco.
135Qataq 'ano'onaxat da 'armeenaxanaxac
da 'anamata'a ne'ena 'aramaxashec,
qataq aỹem 'auapaxagueneque naua 'arqataxaco.
136Cha'aye naua lache' naua ỹa'ai'te
qalaq 'eeta'am ca tala da ipaxaalec,
souaxat da sa qaỹalaxagueta naua 'arqataxaco.
137'Am Nataxala', ỹataqta nalochiguiñi da 'arataxac,
qataq no'oiteguelo naua 'alapaxayiñi lataxaco.
138Qataq 'enauac na 'aramaxasoxonaxacpi,
ỹataqta nalochiguiñi qataq 'eesa.
139Da ica'alaxanaxac ỹataqta aỹem nlaxaañi,
cha'aye na ñepa'aguenaxauapi icoua'aisalo naua 'ara'aqtaqa.
140Naua 'ara'aqtaqa ỹataqta qui'itte',
ỹoqo'oye ne'ena 'aramaxashec ỹataqta ỹauoteque.
141Aỹem qaica ca ỹa'amaqchec qataq aỹem no'otanec,
qalaxaye saishet da secoua'aisalo naua 'aramaxasoxonaxaco.
142Naua nalochiyiñi lataxaco maye 'auo'o't chochaq tatrec,
qataq naua 'arqataxaco ỹataqta 'eesora.
143Aỹem huo'o co'ollaxa da iuogoxo qataq da ñeque'eenaxac,
qalaxaye naua 'aramaxasoxonaxaco ỹo'o't da ỹamaicỹaxac.
144Naua 'aramaxasoxonaxaco nache 'eetai' da nalochiyiñi,
ỹoqo'oye aỹem 'aỹa'anem qome ca ỹauattonaxanaxac yaqto' ishet da ñeca'altauec.
145'Am Nataxala', ỹataqta imauec da iquiyaqteỹaxac da 'am seỹaxanot,
ñaq aỹem 'auasateguet qome yaqto' salaxagueta naua 'arqataxaco.
146Aỹem, 'am seỹaxanot: «Ñaq aỹem 'anca'alaxatec qome.»
Yaqto' sepacchiguilo naua 'aramaxasoxonaxaco.
147Aỹem soosheguem ye nte'etom
da 'am seỹaxanot da aỹem 'autauan,
cha'aye naua 'ara'aqtaqa ỹataqta sachetaleguete da ñaquitaxac.
148Da ñaq taỹa'a ye pe qalaq ñelotec,
da yaqto' ñapaxaguenalo naua 'aramaxasoxonaxaco.
149'Am Nataxala', ñaq 'aua'axaỹa qome da ivilỹaxac
cha'aye huo'o da 'arauotaxanaqtaic,
ñaq aỹem 'aỹa'anem qome da ica'alaxa,
'aupacchigui da nalochiguiñi 'aro'onataxanaxac.
150Cha'aye mashe sa qaỹapeque
nam qauemaicpi maye aỹem icaatac,
qalaxaye namayepi qaỹoqtalo naqa'en naua 'arqataxaco.
151Qalaxaye 'am saqaỹapeque, 'Am Nataxala',
qataq 'enauaque naua 'aramaxasoxonaxaco ỹataqta 'eesora.
152Qataq mashe qaỹoqtegue da sauatto'n naua 'aramaxasoxonaxaco,
maye chochaq tatrec 'anqa'en co'ollaq 'alapaxayiñi.
153Qaq ña 'aumeten qome da iuogoxo
nache aỹem 'anca'alaxatec,
cha'aye aỹem sa secoua'aisalo naua 'arqataxaco.
154Ñaq aỹem 'aueelec qome qataq aỹem 'anca'alaxatec,
qataq aỹem 'aỹa'anem da ica'alaxa,
cha'aye nachera da 'auachaxanapec co'ollaxa.
155Da nca'alaxa qalaq qaỹoqta naqa'en na qauemaicpi,
cha'aye namayepi sa nmitapigui naua 'arqataxaco.
156'Am Nataxala', ỹataqta lta'araic da 'archoxonnataxanaxa,
ñaq aỹem 'aỹa'anem da ica'alaxa,
ñaq 'aupacchigui qome da nalochiguiñi 'aro'onataxanaxac.
157Aỹem, ỹataqta qalota na ñepa'aguenaxauapi
qataq na aỹem icaatacpi,
qalaxaye aỹem saishet da sheca'aisalo
naua 'aramaxasoxonaxaco.
158Da selota'a na que'elaqtaxanaxaicpi
qalaq ỹataqta sa saỹamaxaren,
cha'aye sa ỹalaxagueta naua 'ara'aqtaqa.
159'Am Nataxala', ñaq 'aula'a da ỹataqta sauoteque
naua 'aramaxasoxonaxaco,
qaq aỹem 'anca'alaxatec qome 'aupacchigui
da 'arauotaxanaqtaic.
160Cha'aye naua 'ara'aqtaqa na'attaleguete da 'eesa lataxac,
qataq chochaq tatec 'enauac na ỹaỹamaqchiguiñi 'aramaxasoxonaxacpi.
161Aỹem, qaica ca sasouaxat qalaq aỹem icaatac na 'añaxaicpi,
qalaxaye añi iquiyaqte huo'o naq 'enec naqa'en naua 'ara'aqtaqa.
162Cha'aye naua 'ara'aqtaqa ỹo'o't da samachiguiñi,
'eeta'am ca ilalec ca qalota nogoxoshetpi.
163Aỹem, ỹataqta saỹemec qataq seqaiga da natenataxanaxac,
qalaxaye sauoteque naua 'arqataxaco.
164Ỹoqo'oye siete da she'eguelaxalec ye na'a'q da 'am sho'oxoren,
souaxat naua nalochiyiñi 'aramaxasoxonaxaco.
165Cha'aye qalota da l-lagaxayec,
cam ỹauoteque naua 'arqataxaco
qataq qaica ca ishet da huañi naqa'en.
166'Am Nataxala', aỹem seuatta'aguet ca 'arca'alaqtaxanaxac,
cha'aye so'otta'ape naua 'aramaxasoxonaxaco.
167Aỹem ỹataqta imauec da ñachaalataxac
da sepacchiguilo naua 'aramaxasoxonaxaco,
qataq ỹataqta sauoteque.
168Qaq ỹataqta salaxagueta naua 'aramaxasoxonaxaco qataq naua 'arqataxaco,
cha'aye da ñeqa'aicỹaxac 'enauac da 'auaỹateetac.
169'Am Nataxala', ñaq 'am iviro'ot qome da iỹaxanaxac,
ñaq aỹem 'aỹa'anem ca ỹauattonaxanaxac,
cha'aye nachera da 'ara'aqtac co'ollaxa.
170Ñaq 'am iviro'ot qome da ñatamnaxac,
nache aỹem 'anca'alaxatec, cha'aye nachera da 'auachaxanapec co'ollaxa.
171Ñaq nauoigui qome na aỹap ca ỹo'oxonnataxanaxac,
cha'aye aỹem 'auapaxagueneque naua 'arqataxaco.
172Ñim ỹachaxat ñaq ỹo'o'n qome naua 'ara'aqtaqa,
cha'aye 'enauac na 'aramaxasoxonaxacpi ỹataqta ỹaỹamaqchiguiñi.
173Qataq sanaỹaloxon qome na 'arhuaq da aỹem itauan,
cha'aye lleca'ateua'alo co'ollaxa naua 'aramaxasoxonaxaco.
174'Am Nataxala', huo'o da iyaxa
da saconeguet ca 'arca'alaqtaxanaxac,
cha'aye naua 'arqataxaco ỹo'ot da samachiguiñi.
175Qaq ñaq aỹem 'anem qome ca ica'alaxa,
yaqto' 'am sho'oxoreetac,
qataq ñaq aỹem itaua'n qome
naua nalochiyiñi 'arhuennataxaco.
176Cha'aye aỹem ñesomaxaatapigui' co'ollaxa
sheeta'am aca qagueta da deqat,
qaq ỹoqo'oye 'auanac qome
da 'anmitaique ne'ena 'aramaxashec,
cha'aye aỹem sa secoua'aisalo naua 'aramaxasoxonaxaco.
