Salmos 124

₁Da saishet taxa da qomi' hueta'agueta Ñim Nataxala',

qaq nachera da ishet da qoñiỹapec nagui qami' Israel le'ecpi,

₂da sa qomi' hueta'agueta taxa Ñim Nataxala',

co'ollaq nachaañi na shiỹaxauapi da qomi' dataỹa'agueta,

₃nache qomi' nmatchiyiñi taxa da qomi' ỹalaua't,

co'ollaq 'eroigui da nnogoxonaxac da qomi' dataỹa'agueta.

₄Huaña taxa nache qomi' imooleguete so 'etaxat,

qataq qomi' huaỹoxo'n naqa'en so la'auaxac so 'etaxat.

₅Qataq huaña taxa nache qomi' ihuomaxaayiñi aso lle'eguelaxaso so 'etaxat.

₆Qaq sho'oxorenaq qome Ñim Nataxala', maye saishet da qomi' ỹanegueta

da qomi' icolaxatta'ape naua lhue namayepi.

₇Da qanachaalataxac 'eeta'am aca qoỹo' da ỹe't aca lqoina ca 'ipiaxaic,

aso nqoina dolagui nache qomi' qoỹe't.

₈Da qantaunaguec chegoqo'ot Ñim Nataxala',

maye lo'onatac na piguem qataq ana 'alhua.