Salmos 128

₁Ỹataqta machiguiñi 'enauac nam huo'o naq 'enec naqa'en Ñim Nataxala',

nam quetegue da llecỹaxac Ñimaye.

₂Qom chectac ca aloq maye chegaqaigui da lo'onataxanaxac,

qalaq ỹataqta machiguiñi qataq no'on da llecỹaxac.

₃Aca lhua da hueta'a ca lma'

qalaq 'eeta'am aca uva da nlaqchigui ana ala,

ca llalaqpi da coleesop ca lquia'axala' qalaq 'eeta'am aca nañiguishe olivo.

₄Qaq 'era da 'eetec Ñim Nataxala' da talec naqa'en da nchoxonnataguec ca shiỹaxaua,

maye huo'o naq 'enec naqa'en Ñimaye.

₅Ñim Nataxala' chegoqchiguiña qome naqa'en ye Sión ca 'anchoxonnataguec,

nache 'aulotagui da lyacỹaxac ye Jerusalén,

'enauaque naua na'axa'te da 'anachaalataxac.

₆Qataq 'avira'a qome da 'auauaachigui ca llalaqpi na 'aỹa'alaqpi.

¡Ñaq huo'o qome da nlagaxayec na Israel!