Salmos 132

₁'Am Nataxala', ñaq 'auennata'a qome so David,

qataq 'enauac na nque'eenaxacpi.

₂Qataq da la'aqtac maye 'am ỹanot co'ollaxa,

'am maye 'am la'añaxanec so Jacob co'ollaq 'eeta':

₃«Saishet qome da senoxonoigui ñi ima', qataq saishet qome da ñenaañi da ñematec.

₄Qataq saishet da samaxa't naua ỹa'ai'te,

qataq da ñeqachegoxoñi da so'ochetapigui',

₅qom saxanaxa da sanata ca sanaña ca lma' Ñim Nataxala',

Ñim la'añaxanec so Jacob.»

₆Co'ollaq huaña ye Efrata, nache sa'axasoqtega,

da qaỹa'axattac aso arca maye laỹe' soua aỹamaxataxaco,

qaq co'ollaq huaña ye Jáar nache sanataxa.

₇Qaq huaña nache shenaqta':

«Ñeqo'onaxaua'a ñi npe'l maye lanataqa' Ñim Nataxala',

nache sa'araqoto naua qarllecte Ñimaye.»

₈Ñaq 'anachaañi 'Am Nataxala', nache 'auanaua'a yem 'anmataqa',

'am qataq añi arca maye hueta'aguet da 'ara'añaxac.

₉Na 'artaxaỹaxanaxanecpi ñaq ỹaayiñi qome,

naua no'oñi alogo da ỹo'ot da nalochiguiñi lataxac,

qataq na 'am quetague'pi ỹa'alaqtai' qome da ntonaxac.

₁₀Qataq souaxat da 'arauotaxanaqtaic so 'aramaxashec David,

nache saishet qome da 'aumaqa'aguet so nta'a maye 'arca'aguishec.

₁₁Ñim Nataxala', ỹanem co'ollaxa so David so la'aqtac,

maye saishet da sa ipaguelec, 'eeta':

«Ca 'oonolec ca 'aỹa'alaqpi sanagui qome da 'aro'onataxanaxac da nta'a.

₁₂Qaq ca 'aỹa'alaqpi qom ipacchigui da ñaỹamaxataxac,

qataq na iqataxacpi maye sapaxaguenec,

nache nataqa'en ca llalaqpi camayepi talec qome,

da 'aro'onataxanaxac nache chochaq tatec qome.»

₁₃Ñim Nataxala', lca'aua'a co'ollaxa añi qasoxonaxa Sión,

cha'aye ỹauotaique da lanataqa', co'ollaq 'eeta':

₁₄«'Ena qome na chochaq tatec da ỹanataqa',

'ena qome na ỹanataqa' cha'aye namaye ỹataqta saỹamaxareeta.

₁₅Namaye sechoxonnec qome da sa qoue ca nallec,

qataq na choxoraqpi maye hueta'a namaye sa qoue ñaqa'en ca aloq.

₁₆Qataq sanaxanaxangui da nca'alaxa na ltaxaỹaxanaxanecpi,

qataq do'onaxaata'ai' da ntonaxac na quetague' namayepi.

₁₇Huaña, nache ñaxatec ñaqa'en da la'añaxac so David,

qataq se'eraxatoigui qome añi lcoỹaraxanaxaqui,

so nta'a maye lleca'aguishec.

₁₈Qaq na mpa'aguenaxauapi qalaq talec ñaqa'en da na'aloxonaxac,

qalaxaye somaye sanagui qome da llo'oxoyec.»