Salmos 135

₁Qaỹo'oxoren qome Ñim Nataxala'

Qavio'oxoyiñi qome da le'enaxat Ñim Nataxala',

qavio'oxoyiñi qome qami' maye qami' lamaxashecpi Ñim Nataxala'.

₂Qami' maye qoviita'a naxa añi atamnaxaqui maye lalamaqte Ñim Nataxala',

yem nqasoxoc añi atamnaxaqui maye lalamaqte Ñim Qanatamnaxala'.

₃Qavio'oxoyiñi qome Ñim Nataxala', cha'aye Ñimaye ỹataqta soxoraic,

qauo'oñeetac qome da le'enaxat cha'aye Ñimaye ỹataqta choxonnataxanaxaic.

₄Cha'aye Ñim Nataxala', lca'aguishec co'ollaxa so Jacob,

som Israel da yaqto' lalamaxat.

₅Aỹem saỹateeta da Ñim Nataxala' maye Qanatamnaxala',

ỹataqta lta'araic, nataỹaña 'enauac na laỹepi atamnaxala'pi.

₆Ñim Nataxala', maichiñi da ỹo'ot co'ollaxa 'enauac nam huotaique da ỹo'ot,

nam hueto'ot na piguem qataq nam huetalec ana 'alhua,

qataq na huetangui aso auaxai, qataq na ỹataqta qaỹoqchiguiña asomaye.

₇Qataq naỹoxoosheguem naqa'en na lo'oc,

chegoqchiguiñalo naqa'en naua loga'te ana 'alhua,

qataq ỹo'ot na nqashelgaxa maye ỹa'axata'aguet ca auot,

qataq chegoqchiguiñalo naua laponaqa'ate da naỹoxoosheguem naqa'en na la'at.

₈Ñimaye nacheñi Ñim ỹo'ot co'ollaxa da l-leuaxa

som la'auaxanec llalaqpi so Egipto le'ecpi,

som ỹalleppi qataq so shiguiỹacpi.

₉Ñimaye namaxa co'ollaxa na na'anecpi,

qataq na ỹo'ot da na'aalaxa som netangui na laiñi ye Egipto,

da yaqto' dataỹa'aguet so faraón qataq 'enauac so ltauapi.

₁₀Qataq qalota so ilaxachigui ỹotta'a't shiỹaxauapi,

qataq ỹalauat so 'añaxaicpi nta'alpi.

₁₁So Sijón maye lta'a so amorreopi,

qataq so Og maye lta'a so netaña ye Basán,

qataq 'enauac so nta'alpi ye Canaán.

₁₂Nache so na'alhuapi se'eso nta'alpi,

ỹanem da lalamaxat naqa'en na Israel le'ecpi.

₁₃'Am Nataxala', da 'are'enaxat chochaq tatec,

da 'are'enaxat nache 'eetai' qome da lhuennataxat cam dalaxaicpi.

₁₄Ñim Nataxala' ỹo'otec da ỹaỹamaqchiguiñi na lalamaxat nhuo' le'ecpi,

qataq huo'o da lchoxonnataxanaxa na lamaxashecpi.

₁₅Na natamnaxala'pi na ỹotta'a't shiỹaxauapi,

namayepi chegaqaigui na lcat plata qataq na oro,

maiche lo'onatac naua lhua'q na shiỹaxauapi.

₁₆Namayepi huo'oi naua ala'api qalaq saretaqa,

huo'oi naua la'ai'te qalaxaye sa nauaañi,

₁₇qataq huo'oi naua ltela qalaxaye sa hua'aqa,

qataq qaicaua naua la'a'che.

₁₈Qaq namayepi 'eeta'am da lataxac nam ỹo'ot co'ollaxa namayepi,

qataq nam ỹa'amaqteetac namayepi.

₁₉Qami' Israel le'ecpi, qavio'oxoyiñi qome Ñim Nataxala',

qataq qami' llalaqpi so Aarón, qavio'oxoyiñi qome Ñim Nataxala',

₂₀qataq qami' leviitapi, qavio'oxoyiñi qome Ñim Nataxala',

qataq 'enauac nam huo'o naq 'enec naqa'en Ñim Nataxala',

ỹo'oxoren qome Ñimaye.

₂₁Qaq huaña qome ye Sión da qaỹo'oxoren Ñim Nataxala',

Ñim netaña ye Jerusalén.

¡Qaỹo'oxoren qome Ñim Nataxala'!