Da qaiuennate ye Jerusalén
1Qomi' co'ollaq ñeso'onaqto'oto naua loiguiye so talapi ye Babilonia,
nache ñeỹenaqtac naxa da tachigui ye qarhuel ye Sión.
2Ana nañiguishepi yi'iye huaqta'a't nỹecpi,
nache sanaqasheguemec naxa ana qarviquepi arpapi.
3Nache som qomi' ỹaue'c co'ollaq qomi' loxonqa,
qomi' iỹaxaatacoto naxa da so'otaq ca qaro'onec da so'onaxanaq,
qataq som qomi' ipataqtrañi qomi' 'eetegalo naxa da qaramachiguiñi.
¡Qataq da so'onaq na qaro'onecpi maye sachegoxotaqa'a ye Sión!
4¿Ca 'eeteco' da so'onaq na no'onecpi,
maye lalamaxatpi Ñim Nataxala' da souaqta'a ca ỹaqa'a 'alhua?
5Da huo'otaq ivita da 'am secoua'ai 'am Jerusalén,
qalaq no'ono' da deqaqa na ihuaq aỹoiguishec.
6Qataq no'ono' da donaỹo'ot na ñaquiaq ñi ỹachaxat,
da saq tagui iuel da qoneta 'am Jerusalén,
da saishet da 'am sematalec da ỹamaicỹaxac.
7'Am Nataxala', ña 'auennata'a qome da 'eetec na Edom le'ecpi,
cha'aye co'ollaq noxonec ye Jerusalén nache namayepi, 'eeta':
«¡Qanlaxachiiñi, qanlaxachiiñi qome 'enauac nam lo'oxonaxala'pi!»
8¡Qaq 'am Babilonia, maye taỹa'a da 'am qanlaxaañi!
¡Ỹataqta machiguiñi qome ca ỹo'ot ca 'ansheetenaguec,
souaxat 'enauac de'era qomi' 'auo'oteque!
9Qataq machiguiñi qome ca ỹacoosop na 'aỹa'alaqpi,
nache iuaxaneguet aca coma'pi.
