Salmos 140

₁'Am Nataxala', aỹem 'eltaxaneguet qome na qauemaicpi,

qataq aỹem 'anqateeguesop nam qaica ca iren,

₂nam lapaqtapiguiñi da ỹo'ot na qauem,

qataq 'enauaque naua na'axa'te da ỹo'ottac da loquiaxac.

₃Ñi lachaxat qalaq ỹataqta ỹaxaraic 'eeta'am ca na'araxanaq,

naua la'aqtaqa qalaq huetaiguilo na lshenataxanaxa ca na'araxanaq.

₄'Am Nataxala', aỹem 'antelaqna'aguet qome da la'añaxac na qauemaicpi,

aỹem 'eltaxaneguet qome na yeloxoicpi, nam ỹauotaique da souañi.

₅Na ño'oxonnaxaicpi qalaq ỹo'ot ana lqoinapi,

ỹauo'o so lañec da yaqto' aỹem nqovin,

qataq ỹo'ot ana lqoinapi da ỹanangui so ñeqa'aic.

₆Aỹem shenapega Ñim Nataxala', sheeta': «'Am Ñatamnaxala',

ñaq 'aua'axaỹa da nachoxoreeta iỹaxanaxac.

₇'Am Nataxala', 'am 'añaxaic qataq 'am ica'alaxaqui,

ñaq aỹem 'ampaxaalec qome que'eca na'a'q maye huaigui ca alaataxac.»

₈'Am Nataxala', saishet qome da 'aỹa'anem ca 'eetapeguec na qauemaicpi,

saishet da 'auashenem da nquictauec nam lapaqtapiguiñepi,

yaqto' saishet da ño'oxoreetai'.

₉Nam aỹem icaatacpi,

qalaq maiche talec qome na qauem la'aqtacpi.

₁₀Ñaq talec qome namayepi aca poqo 'ettaigui,

qaỹasaxangui qome ca norec, qataq aca nshere maye qaỹoqchiguingui,

yaqto' saishet da qaltaq ñe'eguelaxasheguem.

₁₁Saishet qome da nache huetalec ana 'alhua na sa ilo'oguelo naua la'aqtaqa,

ca qauem icanapec qome na yeloxoicpi nache ilaxachigui.

₁₂Aỹem saỹaten da Ñim Nataxala' ỹo'otec ca ỹaỹamaqchiguiñi na choxoraqpi,

qataq iueelec cam huo'o da lhuenaxanaxa.

₁₃Nam no'on da lataxac qalaq ỹo'oxoreetac qome da 'are'enaxat,

qataq na nalochiguiñi da lataxac qalaq nache 'am hueto'ot.