Salmos 143

₁'Am Nataxala', ñaq 'aua'axaỹa da ñatamnaxac,

ñaq 'aulo'oguet da ñachoxonnaxac, ñaq aỹem 'auasateguet,

cha'aye no'on da 'arataxac qataq 'aupacchiguilo naua qona'ape.

₂Saishet qome da 'anmittac ne'ena 'aramaxashec,

cha'aye qaica ca 'enapec qaica ca ỹasouaxat da 'am datato'ot.

₃Nam ñepa'aguenaxauapi, aỹem icaatac da huotaique da aỹem ỹalauat,

qataq da aỹem ỹo'orauga ca napalaxa da yaqto' sheeta'am ca mashe ileu co'ollaxa.

₄Aỹem mashe qaica ca ỹa'añaxac,

añi iquiyaqte qalaq mashe nquictañi da la'añaxac.

₅Qaq tachigui iuel soua hua'au' vi'iye,

nache seuennataxaateguelec 'enauac nam 'auo'otpi co'ollaxa,

qataq 'enauac na lo'onatacpi naua 'arhua'q.

₆'Am sachaxaato'oto naua ihua'q, cha'aye da ñachaalataxac ỹataqta 'am iuen,

sheeta'am ca 'alhua deqaqta maye iuen ca 'etaxat.

₇'Am Nataxala', sa 'anaỹaloxon qome da aỹem 'auasateguet,

cha'aye mashe huotaique da vi'iigueta naua ỹa'a'che,

saishet qome da aỹem 'oxocheesop da 'artaunaxanaxac,

yaqto' saishet da sheeta'am ca taỹa'a aca huachiqui.

₈Ñaq aỹem 'auaỹaanaxanaxanec da 'arauotaxanaqtaic ye nte'eta,

cha'aye nache 'am sacheto'ot da ipi'iỹaxac,

ñaq aỹem 'auachaxanegue qome ca nqa'aic maye ishet da sateuga,

cha'aye 'am sanot co'ollaxa da ñachaalataxac.

₉'Am Nataxala', ñaq aỹem 'anqateeguesop qome na ñepa'aguenaxauapi,

cha'aye nache 'am maye 'am ỹe'eguenaxala'.

₁₀Aỹem 'auapaxaguenec qome da so'ot ca qonetapeguec,

cha'aye nache 'Am Ñatamnaxala'.

Som no'on Saqcha'a 'Ara'añaxac ñaq aỹem ỹauega qome ca nalochiguiñi 'alhua.

₁₁Qaq souaxat da 'are'enaxat, 'Am Nataxala',

nache aỹem 'anca'alaxattauec qome qataq souaxat da no'on 'arataxac,

nache aỹem 'anqateeguesop da ñeque'eenaxac.

₁₂Qaq souaxat da lta'araic 'arauotaxanaqtaic,

nache 'anlaxaañi qome na ñepa'aguenaxauapi,

'anlaxaañi qome 'enauac na aỹem ipa'agueetacpi,

cha'aye maiche aỹem 'aramaxashec.