Salmos 146

₁¡Qaỹo'oxoren qome Ñim Nataxala'!

Aỹem, imauec qome da ñachaalataxac da sho'oxoren Ñim Nataxala'.

₂Imauec qome da ñachaalataxac da sho'oxoreetac Ñim Nataxala',

so'oxonaxaato'ot Ñim Ñatamnaxala' qom ñaq ñeca'altauec.

₃Saishet qome da qauacheeto'ot da qarpi'iỹaxaqui, na 'amaqtaqaicpi shiỹaxauapi,

nam shiỹaxauapi maye saishet da deca'alaqtaxan,

₄cha'aye da ileu nache qaltaq ỹe'eguelaxaigui ana 'alhua,

qaq que'eca na'a'q imeuo nataqa'en nam huotaique ỹo'otpi.

₅Qaq ỹataqta machiguiñi qome cam ỹaconeguet,

da ltaunaxanaxac Ñim Natamnaxala' so Jacob,

cam ỹacheto'ot da naquitaxac Ñim Nataxala' maye Natamnaxala',

₆Ñim ỹo'ot co'ollaxa na piguem, 'alhua, qataq aso auaxai,

qataq 'enauac nam huetalec namayepi.

Ñimaye saishet da nquigaxa't naua la'aqtaqa.

₇Ñimaye ỹo'otec da no'on lataxac cam qaica ca nyacnataguec,

qataq ỹanem da lquia'axac cam huo'o na lqouaxa.

Ñim Nataxala', isouec na ncoñeteguishecpi,

₈Ñim Nataxala', ỹo'ot da nauaachiguiñi nam sa nauaañipi,

Ñim Nataxala', nauaxaỹaxaasheguem nam huetaiya'pi,

Ñim Nataxala' ỹauotec nam shiỹaxauapi maye no'on da lataxac,

₉Ñim Nataxala', ntela'a nam chegaqauecpi,

qataq itauan nam qaicaua caua lta'al qataq ana pa'aipi,

qalaxaye ỹo'ot da deqat da nqa'aicỹaxac nam qauemaicpi.

₁₀'Am Sión, Ñim Nataxala' ñaq nache 'eetai' qome da lo'onataxanaxac,

Ñim 'Anatamnaxala', chochaq tatec qome da lo'onataxanaxac.

¡Qaỹo'oxoren qome Ñim Nataxala'!