Salmos 147

₁¡Qaỹo'oxoren qome Ñim Nataxala'!

Ỹataqta sa no'onolec da qaỹo'on na no'onecpi

da qaỹo'onaxaato'ot Ñim Qanatamnaxala',

cha'aye huo'o da lyacỹaxac qataq da lamaicỹaxac da qaỹo'oxoren Ñimaye.

₂Ñim Nataxala' qaltaq no'oxoosheguem ye Jerusalén,

qataq laỹona't na Israel le'ecpi maye laga't co'ollaxa.

₃Ñimaye nataren na dolata da lquiyaqteỹaxac,

qataq ỹauo'o na laxataxat da ỹapolec na lque'emaxapi.

₄Ñimaye ỹaỹaten ye lcata ana huaqaañipi,

qataq ỹauo'o na le'enaxat añi 'oonole anamayepi.

₅Ñim Qarataxala', ỹataqta lta'araic qataq 'añaxaic,

qataq qaica ca loga't da laỹaanataxanaxac.

₆Ñim Nataxala', nauaxaỹaxaasheguem na choxoraqpi,

qalaxaye huetaiya' naqa'en na qauemaicpi.

₇Qauo'onaxañeeto'ot Ñim Nataxala' da qaỹa'añiỹot da qana'achecỹaxaqui,

qataq qauauoita'a aca nvique arpa,

da qauo'onaxañiito'ot Ñim Qanatamnaxala'.

₈Ñimaye ỹapolec naqa'en na lo'oc na piguem,

qataq talec naqa'en ana 'alhua na auot,

qataq ana qasoxonaxapi ñaxaalec naqa'en na 'auaqpi.

₉Ñimaye ỹanem da lquia'axac na shiguiỹacpi,

qataq na llalaqpi na teguesanpi naxa da iỹaxanaique ca aloq.

₁₀Ñim Nataxala', saishet da nachera da la'añaxac ca caaỹo,

qataq da la'añaxac ca shiỹaxaua da ỹamaateguet,

₁₁Ñim Nataxala', ỹamaateguet cam huo'o naq 'enec naqa'en Ñimaye,

qataq cam pi'iỹa'a da lta'araic lauotaxanaqtaic Ñimaye.

₁₂'Am Jerusalén, 'avio'oxoren qome Ñim Nataxala',

qataq 'am Sión, 'avio'oxoren qome Ñim 'Anatamnaxala'.

₁₃Cha'aye Ñimaye, ỹa'añaxatchiyiñi co'ollaxa naua 'anaso'omi,

qataq ỹasaxalec da lchoxonnataxanaxa nam 'am netaiguipi.

₁₄Ñimaye ỹauo'o da nlagaxayec na 'ana'alhua,

qataq 'am iquia'axanec na no'on ala na trigo.

₁₅Ñimaye namaxa na 'alhua da la'aqtac,

qaq dam la'aqtac ỹataqta sa ilaua'ague da jec.

₁₆Ñimaye ilagaxaañi ana aloñi 'eeta'am naqa'en ca qagueta laue,

qataq ilagaxaañi ana isaxa't aloñi 'eeta'am naqa'en ca alo.

₁₇Qataq namaq ana lache 'eeta'am naqa'en na loiquiaxa,

qaq ¿negue'tom ca nala'aguet na latomaxa anamaye?

₁₈Qalaxaye da namaq la'aqtac nache quiguiñi naqa'en anamaye,

qataq da ỹasheerelec naqa'en na la'at nache jec na 'etaxat.

₁₉Ñimaye, ỹachaxanalo co'ollaxa naua la'aqtaqa so Jacob,

qataq ỹachaxanalo naua lqataxaco

qataq naua lamaxasoxonaxaco so Israel.

₂₀Ñimaye saishet da 'eetec de'era na laỹepi ỹotta'a't shiỹaxauapi,

qaq saishet da huo'o lỹa ỹauatton nam lapaxañipi co'ollaxa Ñimaye.

¡Qaỹo'oxoren qome Ñim Nataxala'!