Da atamnaxac qataq da ño'oxonnataxanaxac
1'Am Ñatamnaxala', 'am Ñatamnaxala',
¿ta'ainco' ye aỹem qoca'ai?
¿Qataq ta'ainco' ye 'am qaỹoqtaique
da yaqto' aỹem 'anca'alaxatec?
¿Qataq ta'ainco' ye saishet da 'aua'axaỹalo
naua ỹa'aqtaqa da 'am ñeỹeeto'ot?
2'Am Ñatamnaxala', ye na'a'q 'am seỹaxaatega
qalaq aỹem sa 'auasateguet qataq ye pe,
qaica ca ñemataxac da 'am seỹaxaatega.
3Qalaxaye 'am qui'itta, qataq 'am nta'a,
maye 'am ỹo'oxoreetac na Israel le'ecpi.
4So qarta'alpi 'am pe'etega co'ollaxa,
'am pe'etega co'ollaxa ỹoqo'oye 'ausouec somayepi.
5'Am iỹaxanot co'ollaxa da 'autauan, nache 'ausouec somayepi,
somayepi ỹataqta 'am pe'etega co'ollaxa,
qaq ỹoqo'oye saishet da 'auauo'o ca la'aloxo.
6Qalaxaye aỹem choche aỹem qoche'l,
qaq saishet da aỹem shiỹaxaua,
na shiỹaxauapi qalaq choche aỹem ỹe'eetac.
7Qaq na aỹem ilota'a qalaq aỹem ỹe'eetac,
qataq iqapiaxattac ana lqa' da aỹem isheueetac,
qataq iraxaatac na lqaic,
8nache 'eeta':
«De'era, pe'etega naxa Ñim Nataxala',
qaq 'onaxaic da anac qome Ñimaye da nca'alaxatec,
cha'aye ỹataqta lauotaxat damaye,
qaq no'on da nacheñi Ñimaye da isouec.»
9Qalaxaye nache 'am co'ollaxa da 'auo'ot da ỹañoxoc,
aỹem 'auachegoxottoigui na lauel aso ỹate'e,
nache sootaleguete 'anqa'en naua lhuaxaye asomaye.
10Qaq co'ollaq saxanaxa da sañiguiñi,
qalaq nache 'eetai' da aỹem 'anteltega,
qataq co'ollaq ñaq sootaigui na lauel aso ỹate'e,
nache nale'ena da 'am Ñatamnaxala'.
11Qaq saishet qome da aỹem qaỹoqtaique 'anqa'en,
cha'aye mashe sa qaỹapeque da ỹaquicoxo,
qalaq qaica ca aỹem itauan.
12Qataq aỹem coleesop na ñepa'aguenaxauapi,
'eeta'am na huaca yeloxoic, maye lma' ye Basán,
13qataq 'eeta'am da lchec ca llon da desoqo,
nache ỹauachigui na alap da aỹem nqapaxanot.
14Qataq sheeta'am ca 'etaxat da qaicorec,
naua ipi'ineqa qalaq huesoguilo,
qaq añi iquiyaqte qalaq 'eeta'am aca dapic lapa da quiguiñi.
15Qaq na aỹap qalaq ỹataqta daqaqta,
'eeta'am ca chaic maye nhuo' lapo',
ñi ỹachaxat qalaq lapaqot na ñaquiaq.
Qataq ỹataqta aỹem 'alaroigui na 'alhua da seleu.
16Qaq so qalota qauemaicpi qalaq
'eeta'am na pioxoppi da aỹem coleesop,
nache aỹem nanaxachigui,
nache icolaxatta'ape naua ihua'q qataq naua ichel.
17Nache ishet da ñaloqten 'enauac na ipi'inecpi.
Qaq na ñepa'aguenaxauapi qalaq ỹataqta aỹem ilotagui.
18Qataq qanallichiguilo soua aỹogo,
da yaqto' qaỹaỹaten negue't ca taỹoto soomaye.
19Qalaxaye 'am Nataxala', saishet qome
da 'am qaỹoqtaique, cha'aye nache 'am ỹa'añaxac,
qataq sa 'anaỹaloxon qome da 'auanac da aỹem 'autauan.
20Qataq 'anca'alaxateeguesop qome ca ỹeelonec
de'era ñachaalataxac, qataq saishet
da 'aua'aqta'a da aỹem ỹalauat ne'ena pioxoppi.
21Qataq aỹem 'anca'alaxateeguesop qome
naua ala'api na llonpi, qataq aỹem
'eltaxaneguet ana lcouepi ne'ena huacapi.
22Qaq aỹem sa'axatem qome da 'are'enaxat na ỹaqaỹañicpi,
qataq 'am sho'oxoreetac qom lapoota'a't namayepi.
23Qaq qami' maye huo'o naq 'enec
qanqa'eñi Ñim Nataxala', ¡qavio'oxoyiñi qome Ñimaye!
Qami' maye qauachegoqoiguet so Jacob,
¡qavio'oxoyiñi qome Ñimaye!
Qami' maye qauachegoqoiguet so Israel,
¡qanatamñiỹot qome Ñimaye!
24Cha'aye Ñimaye saishet da huo'o ca ỹo'otan,
huo'otaq da sa iqocha'a da nque'eenaxac ca choxoraq,
qataq saishet da nqañoxocheesop camaye,
nda'a't da hua'axaỹa camaye da iỹaxanaique ca ntaunaguec.
25Qaq nache 'am sachegoxotchigui da ỹo'oxonnataxanaxac,
da salectaigui ca lta'araic laponaxac na shiỹaxauapi,
nache ỹauaachigui ñaqa'en na huo'o naq 'enec naqa'en 'am,
da sepacchiguilo naua ỹa'aqtaqa maye 'am sanoto co'ollaxa.
26Qaq deque'e qome na choxoraqpi nache ivitta'a da comaraxaicpi,
qataq ỹo'oxoren qome Ñim Nataxala' na nmittaique Ñimaye,
huaña nache qaỹoqtrec naua vi'iye da nachaalataxac.
27Qaq tachigui lauel qome Ñim Nataxala'
nache ỹe'eguelaxa Ñimaye 'enauac
na ỹotta'a't shiỹaxauapi maye neta'alo
naua loga'te ana 'alhua. Qataq 'enauac
na llalaqpi na ỹotta'a't shiỹaxauapi
da ỹa'aldoto qome naua l-llecte Ñimaye.
28Cha'aye Ñim Nataxala' nacheñi Ñim Nta'a,
qaq Ñimaye nacheñi ñi ilotague' na ỹotta'a't shiỹaxauapi.
29Qaq ỹa'aroto naua l-llecte qataq natamnot Ñimaye
'enauac na qaica ca iuena'a, qataq 'enauac
na taỹa'a da ỹe'eguelaxaigui ana 'alhua,
cha'aye namayepi saishet da maiche
ỹo'ot da qaỹoqtec da lca'alaxa.
30Qaq ca ỹalaqpi qalaq natameetacot qome
Ñim Nataxala', qataq nache 'eetai' qome
da da'aqtaxaatapeguem cam naỹauo shiỹaxauapi,
31qaq ca dalaxaic maye ñiguiñipi qome,
qalaq qaỹa'aqtaxaatapeguem de'era
ỹaỹamaqchiguiñi lo'onataxanaxac Ñimaye.
