Da achaalataxac qui'itta
1'Am Nataxala', ñaq aỹem 'auo'otec ca ỹaỹamaqchiguiñi lataxac,
cha'aye da ñachaalataxac ỹataqta qui'itta.
Qataq ỹataqta 'am sepe'etega 'Am Nataxala'.
2Ñaq aỹem 'anmit qataq aỹem 'avi'iguen,
qataq 'aumeteeta qome na iuennataxacpi qataq da iquiyaqteỹaxac.
3Aỹem ỹataqta ñetoueeta'ac da 'arsoxoyec,
qataq shecteguelo naua 'eesora 'ara'aqtaqa.
4Ỹataqta sa ỹauanago' da salectaigui na shepecaicpi,
qataq saishet da sootaigui na na'amqaanaxaicpi.
5Ỹataqta sequiỹa na laponaxacpi na qauemaicpi,
qataq saỹauanago' da ñeso'oota'ai' na 'etaxaloxoicpi.
6Ỹoqo'oye seỹote' naua ihua'q, maye qaica ca ỹasouaxa't,
cha'aye sauotaique da secoleetacot
añi nca'atoxonaxalate maye 'aralamaqte,
7qataq ñelamaxaren da so'onaxan da 'am sho'oxoren,
qataq sa'axatta da llo'oxoyec na 'auo'otpi.
8'Am Nataxala', aỹem ỹataqta sauotec
añi atamnaxaqui maye 'aranataxaqui,
yem hueta'a naxa da 'ayo'oxoyec
9Ỹoqo'oye qom seleu nache saishet qome
da aỹem 'aualecnoigui na 'etaxaloxoicpi,
huo'otaq da ỹalecta'aguet da ñachaalataxac na laataxanaxaicpi,
10nam shiỹaxauapi maye naua lhua'q
nlaqchiguilo na qauem qataq ana ỹoxottañi nsheetenaqte.
11Qalaxaye aỹem da ñachaalataxac qui'itta,
ỹoqo'oye aỹem 'anca'alaxatec qome qataq aỹem 'auchoxoren.
12Naua ỹapia'ate qalaq ỹaỹamaqchiguiñi da lapiaxa'c.
Ỹoqo'oye sho'oxoren Ñim Nataxala'
da salectaigui cam qalota shiỹaxauapi.
