Salmos 28

₁Nagui 'am ñachoxonnot 'Am Nataxala',

maye aỹem 'ampaxattalec, saishet qome

da aỹem sa 'auasateguet, cha'aye da aỹem

sa 'aua'axaỹa, nache 'eeta'am da mashe salectaigui na leuaxaicpi.

₂'Aua'axaỹa qome da ñachoxonnaxac

da 'am seỹaxanot da aỹem 'autauan,

qom 'am sachaxanoto naua ihua'q ye 'aranataqa' maye qui'itta.

₃Saishet qome da aỹem 'auauecta'a

da aỹem 'aualecnoigui na qauemaicpi,

qataq na ỹo'ottac na qauemsat nam choche

ỹachaxaatac naxa da lauotaxanaqtaic,

qalaxaye choche ỹoxottañi 'enauac na qauemsat.

₄'Aỹa'anem qome namayepi ca 'itchiguiñi nhuaxanaguec,

ipacchigui 'anqa'en na qauem maye ỹo'ottac,

qataq 'aỹa'aneguet 'enauac na qauemsat maye ỹo'ottacpi.

₅Cha'aye mashe saishet da iuennata'a nam ỹo'otpi Ñim Nataxala',

qataq nam lo'onatacpi co'ollaxa Ñimaye,

qaq ỹoqo'oye Ñimaye ilaxachigui qome namayepi,

nache saishet da qaltaq ñe'eguelaxatsheguem.

₆Qaq nache 'eetai' qome da ño'oxonnataguec da le'enaxat Ñim Nataxala',

cha'aye hua'axaỹa da ñachoxonnaxac.

₇Ñim Nataxala' maye ỹo'ot da ỹa'añaxac

qataq nacheñi ñi aỹem mpaxattalec,

Ñimaye ỹataqta semato'ot da ipi'iỹaxac,

qaq Ñimaye aỹem itauan.

Añi iquiyaqte ỹataqta machiguiñi,

ỹoqo'oye so'onaxan qataq sanot da ñetonaxac.

₈Ñim Nataxala' nacheñi ñi ỹo'ot da la'añaxac

na lalamaxat nhuo' le'ecpi, nacheñi ñi detaunaxan

qataq lca'alaxaqui na nta'a maye lca'aguishec.

₉Ñaq 'anca'alaxatec na 'aralamaxat nhuo' le'ecpi,

'Am Nataxala', 'aỹa'anem ca nqouagaxa na 'aralamaxatpi.

'Antela'a qoneta'am ca ilotague' ana qaguetapi,

qataq nache 'eetai' da 'auauecta'aguet.