Qoỹanot da 'achecỹaxac Ñim Nataxala'
1'Am Nataxala', 'am sanot da ỹo'oxonnataxanaxac,
cha'aye aỹem 'anca'alaxatec, qataq sa 'auashenem
na ñepa'aguenaxauapi da aỹem lashetac.
2'Am Nataxala' maye 'Am Ñatamnaxala',
'am seỹaxanot co'ollaxa da aỹem 'autauan,
nache 'am, aỹem 'anataren.
3'Am Nataxala', aỹem 'anca'alaxateeguesop co'ollaxa da nleuaxa,
qataq aỹem 'aỹa'anem da ica'alaxa,
da yaqto' saishet da seleu.
4Qami' maye ỹataqta qoquiitegue
da llecỹaxac Ñim Nataxala', ¡qauo'oñi qome na no'onecpi
qavio'oxoyiñi da qui'itta le'enaxat Ñimaye!
5Cha'aye da layeloxo Ñimaye sa qaỹauec,
qalaxaye da no'on ltaunaxanaxac ivittec naqa'en da achaalataxac.
Cha'aye da huo'o da noinaxac ye pe,
qalaxaye ye lỹa na'a'q qaltaq huo'o da namaicỹaxac.
6Qaq co'ollaq ñanomta da qaica
ca aỹem iraxaatapigui', nache sheeta':
«Qaica qome ca aỹem ỹayogottac.»
7Qalaxaye 'Am Nataxala', de'era 'arqouagaxanaqtaic,
ỹo'ot da qaica ca aỹem iraxaatapigui',
qalaxaye co'ollaq aỹem 'anqañoxotaisop,
nache aỹem ñesomaxaatapigui'.
8Qaq nagui 'am seỹaxanot 'Am Nataxala'
qataq 'am ñachoxonnot 'Am Nataxala'.
9¿Negue'tom ca 'araueguec da seleu
da aỹem qairouga aca huachiqui?
cha'aye na lsoche na 'alhua saishet da 'am ỹo'oxoren,
huo'otaq da ỹa'axat da 'eesa 'arataxac.
10¡'Am Nataxala', ñaq aỹem 'aua'axaỹa
qataq aỹem 'auchoxoren, 'Am Nataxala'!
¡Ñaq aỹem 'autauan!
11Cha'aye da ñenoinaxac nmeneguet 'anqa'en da ỹasotaxac,
qataq 'anqa't soua ỹasouaxaqui' aỹogo
nache aỹem 'aỹa'anguilo soua no'o'n aỹogo.
12Ỹoqo'oye 'Am Nataxala' maye 'Am Ñatamnaxala',
aỹem saishet da nache 'eetai' da she'emaqtom,
aỹem so'onaxan da yaqto' 'am sho'oxoren,
qataq nache 'eetai' da 'am saatacot da ña'achecỹaxac.
