Da ño'oxonnataguec Ñim Nataxala'
1Qavio'oxoyiñi qome Ñim Nataxala',
qami' maye no'on da qarataxaqui,
cha'aye da llo'oxonnataxanaxac
na no'on da lataxac ỹataqta 'onaxaic.
2Qataq qaỹa'añiỹot da qana'achecỹaxaqui
Ñim Nataxala', qauauoita'a ana nvique arpa,
qataq qauo'oñi na no'onec, qauo'onaxañiita'ai'
da l-lamaxa ana nvique salterio,
3qauo'oñi ca dalaxaic no'onec,
ỹataqta qauaỹamaxachiichiguiñi da qarvicnaxanaxaqui,
da qavio'oxoyiñi Ñimaye.
4Naua la'aqtaqa Ñim Nataxala' ỹataqta 'eesora,
cha'aye na lo'onatacpi ỹachaxan da ỹoqta 'eesa Ñimaye.
5Ñim Nataxala' ỹataqta ỹauotec na no'on da lataxac
qataq no'oitegue da llec
qataq da lsoxoyec Ñimaye
ỹataqta imattalec ana 'alhua.
6Ñim Nataxala' ỹauota'aisalo co'ollaxa naua la'aqtaqa
da ỹo'ot na piguem, qataq co'ollaq iquetetec
na la'at nache ỹo'ot 'enauac ana huaqaañipi.
7Ñimaye laỹona't co'ollaxa na 'etaxat aso auaxai,
qataq ỹaỹamaxat ỹachangui asom qaỹoqchiguingui auaxai late'erai.
8Ỹataqta huo'o naq 'enec qanqa'eñi Ñim Nataxala'
'enauac qami' maye qoñiitalec ana 'alhua,
ỹataqta ỹo'oxoren qome Ñimaye
'enauac na shiỹaxauapi maye netalec ana 'alhua.
9Cha'aye Ñimaye co'ollaq choche detaqa
nache ime naqa'en 'enauacna, qataq co'ollaq
choche ỹan da la'aqtac nache ime da nalochiguiñi naqa'en namayepi.
10Ñim Nataxala' saishet da ipaigui naqa'en
na 'eetapeguecpi na ỹotta'a't shiỹaxauapi,
qataq saipaigui naqa'en na 'eetapeguecpi na nhuo' le'ecpi.
11Qalaxaye na 'eetapeguecpi Ñim Nataxala',
qalaq nache 'eetai' chochaq tatec.
12Qaq ỹataqta machiguiñi na ỹotta'a't shiỹaxauapi
maye nacheñi Ñim Nataxala' da Natamnaxala',
nam shiỹaxauapi maye lca'aua'a co'ollaxa Ñimaye da yaqto' lalamaxatpi.
13Ñim Nataxala' neto'ot na piguem da nalletañi,
nache imeteetac 'enauac na shiỹaxauapi,
14qaq nache netaña ca lma' Ñimaye da imeteetac,
'enauac nam huetalec ana 'alhua,
15cha'aye nacheñi Ñimaye ñim ỹo'ot
co'ollaxa ana lquiyaqtepi 'enauac namayepi.
Qataq nacheñi ñi ỹaỹateetac 'enauac na ỹo'ottacpi namayepi.
16Ca nta'a saishet da deca'alligui ca qalota nalleppi,
qataq na 'añaxaicpi saishet da deca'alligui da qalota la'añaxac.
17Na caipi qalaq nataqa'en saishet da huo'o ca nca'alaxatec,
na'aictaxa da ỹataqta 'añaxaicpi,
qalaxaye saishet da huo'o ca nca'alaxatec.
18Qaq Ñim Nataxala' qalaq ntela'a
nam huo'o naq 'enec naqa'en Ñimaye,
qataq na pi'iỹa'a da lsoxoyec,
19da yaqto' nca'alaxateeguesop namayepi da nleuaxa,
qataq ỹanem da lca'alaxa da ivita da huo'o na nqouaxa.
20Qaq qomi' qalaq sepia'aqtega Ñim Nataxala',
qaq Ñimaye qomi' itaua'n qataq qomi' npaxattaleguete.
21Da qarquiyaqteỹaxac ỹataqta machiguiñi naqa'en Ñim Nataxala',
cha'aye ỹataqta imauec da sa'amaqtenaq da qui'itta le'enaxat.
22Qaq 'Am Nataxala' da 'arsoxoyec nache qomi' hueta'agueta qome,
cha'aye nachera da seuataqtaique dam qoneta.
