Salmos 34

₁Aỹem sho'oxoreetac qome Ñim Nataxala'

'enauaque naua na'axa'te, qataq

nache 'eetai' qome da sho'oxoreetac Ñimaye.

₂Aỹem ỹataqta sho'oxoreetac qome Ñim Nataxala',

qaq qom hua'aqa na choxoraqpi nache machiguiñi.

₃Sho'oxorenaq qome Ñim Nataxala',

qataq llatetaq da le'enaxat Ñimaye.

₄Aỹem seỹaxanot co'ollaxa Ñim Nataxala',

nache Ñimaye aỹem ỹasateguet,

qataq aỹem isoueeguesop 'enauac na icolanaxasat.

₅Na ỹamato'ot Ñimaye nache ỹataqta nlaqchigui da ntonaxac,

qataq saishet da hueto'ot ca na'aloxonaxac.

₆Qaq ne'ena choxoraq deỹaxan co'ollaxa,

nache Ñim Nataxala' hua'axaỹa,

nache isoueeguesop 'enauac da laquicoxo.

₇Qaq so lamaxashec piguem le'ec Ñim Nataxala',

npaxattalec qataq nca'alaxatec,

nam huo'o naq 'enec naqa'en Ñimaye.

₈Ñaq qavi'iguiñi Ñim Nataxala',

yaqto' qauaỹachiñi da Ñimaye ỹataqta soxoraic.

Qaq ỹataqta machiguiñi qome ca shiỹaxaua maye pi'iỹa'a Ñimaye.

₉Ñaq huo'o naq 'enec qanqa'eñi Ñim Nataxala',

qami' maye qanañañiỹot Ñimaye,

cha'aye qaica ca iueetac cam huo'o naq 'enec naqa'en Ñimaye.

₁₀Na sallaxanecpi qalaq ỹe'eguelaxa da choxoraq

qataq nque'etaxangui na lqouaxa,

qalaxaye nam nmitaique Ñim Nataxala',

qalaq qaica ca iueetac.

₁₁Ña qauanaqui qami' ỹalaqpi,

ñaq aỹem qana'axaỹaxañiỹa,

nache qami' sapaxagueneque

da huo'o naq 'enec qanqa'eñi Ñim Nataxala'.

₁₂Ca nshetaique da ỹauotec da nachaalataxac,

qataq machiguiñi da huetaiguilo naua na'axa'te,

₁₃nache iuen da nllañi ñi lachaxat da sa nasaxauec ca qauem,

qataq da sa nasaxauec ca natenataxanaxac.

₁₄Qataq ca'ai na qauemsat, nache ỹo'ot ca ỹaỹamaqchiguiñi,

qataq nmitaique da nlagaxayec nache quegue.

₁₅Ñim Nataxala' ntela'a na shiỹaxauapi maye no'on da lataxac,

qataq hua'axaỹa na natamnaxacpi.

₁₆Ñim Nataxala' dataỹa'aguet na ỹo'ottac na qauemsat,

da yaqto' ỹapalaxat da le'enaxat namayepi da huetalec ana 'alhua.

₁₇Ñim Nataxala' ỹataqta hua'axaỹa da natamnaxac nam no'on da lataxac,

qataq isoueeguesop 'enauac da laquicoxo.

₁₈Ñim Nataxala' saqaỹapeque naqa'en

ca qaica ca la'añaxac da lquiyaqteỹaxac,

qataq nca'alaxatec ca mashe qaica ca naquitaxac.

₁₉Ca shiỹaxaua no'on da lataxac qalota na ivireguet qauempi,

qalaxaye Ñim Nataxala' isoueeguesop 'enauac namayepi.

₂₀Qataq Ñimaye mpaxattalec 'enauac na lpi'inecpi camaye,

nache qaica da huo'otaq 'oonolec ca qainoxon na lpi'inecpi camaye.

₂₁Qaq na qauemaicpi qalaq maiche ilem na qauempi maye ỹo'ottac.

Qaq na nquiỹatega nam no'on da lataxac

qalaq huo'o qome ca nhuaxanaguec.

₂₂Qalaxaye Ñim Nataxala', nca'alaxatec

da nachaalataxac nam lamaxashecpi.

Qataq nam pe'etega Ñimaye, saishet qome da huo'o ca nhuaxanaguec.