Salmos 36

₁Da lhuennataxac ca 'etaxaloxoic, 'eeta':

«Qaica ca 'enec Ñim Nataxala', na'aictaxa da huo'o ca ỹauaachigui.»

₂Nache camaye ipi'itaxaatega da huo'o da ño'oxonnataguec,

qataq saishet da deqaictega na qauemsat maye ỹo'ottac.

₃Qataq ỹataqta qauema naua la'aqtaqa qataq shepecaic,

cha'aye deqat so no'on ntoonaxac,

qataq ỹaxaañi da ỹo'ot da ỹaỹamaqchiguiñi.

₄Qataq da nnaatalec ca lmala', nache ỹaqataxaatapigui' da ỹo'ot na qauem,

cha'aye saishet da ỹaxanec da qauem llecỹaxac,

qataq saishet da ỹaxanec na qauemsat.

₅Qalaxaye 'Am Nataxala' da 'arauotaxanaqtaic iviro'ot na piguem,

qataq da 'arsoxoyec ỹataqta iviro'ot na piguem.

₆Qataq da nalochiguiñi 'arataxac,

'eeta'am ana qaỹoqotcheguemec qasoxonaxapi,

qataq naua 'alapaxayiñi lataxaco 'eeta'ama

aso auaxai late'erai maye qaỹoqchiguingui.

Qataq ỹataqta 'antela'a na shiỹaxauapi

qataq na shiguiỹacpi 'Am Nataxala'.

₇Ỹataqta huo'o da llo'oxoyec da 'arauotaxanaqtaic, 'Am Atamnaxala',

ỹoqo'oye na shiỹaxauapi deuaqtacoto

naua 'araua't da yaqto' 'ampaxattalec.

₈Qataq ỹataqta machiguiñi namayepi

souaxat na chochaq huañi nallec ye 'arma',

qataq 'anỹomaxaatapigui namayepi

som tala maye ỹataqta ama na le'ec,

₉cha'aye nache 'am hueto'ot da nca'alaxa,

qataq na 'are'eraxa ỹo'ot da seloqtaigui na yo'oqchiguiñi.

₁₀Qataq 'aỹa'anem da 'arauotaxanaqtaic

na 'am ỹauatton, qataq da ỹaỹamaqchiguiñi lataxac

na shiỹaxauapi maye no'on da lataxac.

₁₁Qaq sa 'auashenem qome da aỹem petapigui na ño'oxonnaxaicpi,

qataq da aỹem nchegoxosheguem na qauemaicpi.

₁₂Ñaq qauloỹa da 'eetec da huañi na qauemaicpi,

namayepi huañi nache sa lỹa da nachaañi.