Da natamnaxac so huo'o da nque'eenaxac
1'Am Nataxala' saishet qome da aỹem 'aurolec
da 'annogoxonaxac da aỹem qonapega,
qataq saishet da 'auo'ot ca ñeuaxanaguec da 'aualemata.
2Cha'aye mashe aỹem ỹapacaviigui ana 'archecnapi,
qataq da 'arhuaqỹaxac ỹataqta aỹem ipataqtañi.
3Qaq souaxat de'era 'aralemataic,
nache 'enauac da ỹo'ocỹaxac ỹataqta dalola,
qataq qaica ca 'oonolec na ipi'inecpi da no'oita,
souaxat na ỹasouaxashetpi.
4Na qauem maye so'otpi co'ollaxa ỹataqta aỹem ipataxañi,
namaye ỹataqta qapa'atta, saishet da ñalo'oguet.
5Qataq ỹasouaxat da qaica ca saỹaanapec,
nache na lque'emaxa na ỹo'oc nchega qataq huo'o lli'i.
6'Enauaque naua na'axa'te da ñeqollemta qataq she'eta'a't,
saquicota qataq qaica ca ỹa'añaxac.
7Na ilaq qalaq 'eroigui souaxat na ỹe'eraxa,
qataq dolata 'enauac na ỹo'oc.
8Ỹataqta qaica ca ỹa'añaxac qataq ñesotchiguiñi,
añi iquiyaqte qalaq dacholaxan souaxat da ñiqui'ic.
9'Am Nataxala', mashe 'auaỹateetac 'enauac na sheetapeguecpi,
qataq 'enauac na seuennategapi.
10Añi iquiyaqte qalaq iỹala da lasotaxa,
qataq qaica ca ỹa'añaxac ivira'alo naua ỹa'ai'te 'omaleguete.
11Na ỹataqta ñauochaxauapi, qataq ivira'a na ihuo' le'ecpi,
ỹataqta qaỹoqteuga souaxat na laita na lli'i na ique'emaxa.
12Na huotaique da aỹem ỹalauat qalaq lapaxañi ana lqoinapi,
na huotaique da aỹem ỹo'otec ca qauem,
qalaq ỹareetega da aỹem nlaxaañi,
nache 'enauaque naua na'axa'te
ỹo'ottac da latenataxanaxac.
13Qalaxaye aỹem se'enaxat da sa sa'aqa,
nache 'eeta'am da sa sa'axaỹa namayepi,
qataq 'eeta'am da qaicaua naua ỹa'aqtaqa,
nache saishet da sauachigui na aỹap da setaqa.
14Qataq sheeta'am ca saishet da hua'aqa,
qataq saishet da detaqa da maiche nhueela't.
15Cha'aye aỹem 'am seuatta'a, 'Am Nataxala' maye 'am Ñatamnaxala',
qaq nache 'am qome da 'auasateguet namayepi.
16Qaq nacherata da seỹaxaatapegueua'a
da saishet qome da aỹem ne'eetapigui namayepi,
qataq saishet da na'amaqten, qom ivita da souañi.
17Cha'aye yo'oqta 'eesa da mashe huotaique da souañi,
cha'aye dam ñiqui'ic ỹataqta imauec ye na'a'q.
18Ỹoqo'oye aỹem sa'axat qome na ỹasouaxashetpi,
cha'aye ỹataqta ỹo'ot da ỹaquicoxo.
19Na ñepa'aguenaxauapi qalaq nquictauec ye lcata,
ỹataqta qalota na aỹem nquiỹatega,
na'aictaxa da qaica ca sasouaxat.
20Namayepi so'otec co'ollaxa da no'on,
qaq nagui qalaq namayepi aỹem ỹo'otec da qauem.
Qataq souaxat da ñeshetaique da so'ot ca no'on,
nache namayepi aỹem dataỹa'aguet.
21'Am Nataxala' saishet qome da aỹem 'andoxottec,
'Am Ñatamnaxala', saishet qome da qaỹoqtaique 'anqa'en aỹem.
22'Am maye 'Aro'onatac 'Enauacna,
qataq 'am ica'alaxaqui,
sa 'anaỹaloxon qome da 'auanac da aỹem 'autauan.
