Salmos 4

₁'Am Ñatamnaxala' qataq 'am ipaqtaxanaxat,

ñaq aỹem 'auasateguet da 'am seỹaxanot,

cha'aye co'ollaq huo'o so ñiqui'ic nache aỹem 'aỹa'anem da sasattec,

ñaq aỹem 'auchoxoren qome qataq 'aua'axaỹa da ñatamnaxac.

₂Qaq qami' maye qaupi'itaxañiitega da qami' 'amaqtaqaiqa,

¿che laguio' da qaỹa'axañiiñi da aỹem qaunogoqchichiitac?

Qataq ¿che laguio' da qaỹa'axañiiñi

da qanmichiitaique na qaica ca naigui?

₃Ña qauaỹachiñiita qome da Ñim Nataxala',

ipactaique ca ỹale maye ỹataqta 'en da quetague' Ñimaye,

qataq qauaỹachiñiita da Ñim Nataxala' aỹem ỹasateguet da seỹaxanot.

₄Da qaualematai qalaq saishet da qauauo'oi ca qarasouaxashichi,

qaq qom qannañiitalec ca qarmala'ai ye pe nache qavi'imaqaitac,

da qauennataxañiilec cam qarhuennataxaqui.

₅Qataq qaỹa'añiiuo qome aca qarachetaqtaxanaqche,

maye chegoqchigui da ỹaỹamaqchiguiñi lataxac,

qataq qaupi'iỹa'ai Ñim Nataxala'.

₆Qalota na 'eeta': «¿Negue'tom ca qomi'

ỹachaxanalo ca ỹaỹamaqchiguiñi?»

'Am Nataxala', ñaq 'ano'onaxat qome

da 'armeenaxanaxac da qomi' 'anamata'alo.

₇'Am 'auachaigui co'ollaxa añi iquiyaqte da ỹamaicỹaxac,

qaq saq 'ena'am ca hueto'ot na chochaq huañi trigo qataq na lataxa.

₈Da ñenaañi qalaq she'emaqtac,

qataq sa qaỹaloq da so'oche, cha'aye 'Am Nataxala',

aỹem 'aỹa'anem da qaica ca ñeraqtaique.