Da natamnaxac ca sano'on
1Ỹataqta machiguiñi qome ca lhuennataxat na choxoraq,
cha'aye Ñim Nataxala' nca'alaxatec camaye,
da ivita da huo'oi naua qauema na'axa'te.
2Ñim Nataxala' mpaxattalec camaye qataq ỹanem da lca'alaxa,
qataq machiguiñi naqa'en da netalec ana 'alhua,
qataq saishet da ỹaneguet ca maiche 'eetapeguec na mpa'aguenaxauapi.
3Ñim Nataxala' ỹanem camaye da la'añaxac da sano'on,
qataq ỹa'añaqchet da huetalec ca lmala' souaxat da nqui'ic.
4Qaq aỹem shenapec: «'Am Nataxala',
ñaq aỹem 'auchoxoren qome, aỹem 'anataren
na'aictaxa da huo'o da ỹasouaxashet 'am hueto'ot.»
5Cha'aye na ñepa'aguenaxauapi aỹem ỹasaqtapeguelec
da qauem, 'eeta': «¿Chaq laguio' qaq ileu ñimaye, yaqto' qaicoua'ai?»
6Namayepi da anac da aỹem nmeenaxaneua'a qalaq saishet da ỹoqta 'eesa,
cha'aye da lhuennataxa huetaigui 'enauac na qauemsat,
ỹoqo'oye da tauga na nqa'aic nache ỹa'axattac.
7Na aỹem nquiỹatega qalaq lapona't, nache aỹem detaqtapigui,
cha'aye lhuennataxac da aỹem huo'o da ñeque'eenaxac
souaxat na maiche ỹasouaxashetpi.
8Nache 'eeta': «De'era lalolaxa maye hueta'ac
damaye chegoqo'ot so saqcha'a na'añaxac leguemaxaic,
qaq nagui da huetalec ye lmala', nache saishet qome da qaltaq ñisheguem.»
9Qataq ivira'a so ỹataqta ñauochaxaua, som ỹataqta sepe'etega,
som iquia'axaua naxa qalaq aỹem dataỹa'aguet.
10Qalaxaye 'am Nataxala', aỹem 'auchoxoren qome,
aỹem 'aỹa'anem da soosheguem,
yaqto' sanem ca 'itchiguiñi nhuaxanaguec.
11Huaña qome nache saỹaten da ỹoqta aỹem 'auaỹamaxareeta,
qom na ñepa'aguenaxauapi saishet da aỹem ntootalec da aỹem loxonec.
12Qaq aỹem souaxat da nalochiguiñi
da ñachaalataxac nache aỹem 'anlletañi,
qataq nache 'eetai' da 'am ñachatto'ot.
13¡Ỹataqta qaỹo'oxoren qome Ñim Nataxala',
maye Natamnaxala' na Israel le'ecpi,
nagui qataq nache 'eetai' qome!
¡Aja', nache 'eetec!
