Da no'onec da qaỹo'onaxaalec da laronaxac ca nta'a
1Ỹataqta 'onaxaiqa naua na'aqtaqa maye huetaiguilo da ñetoonaxac,
ñi ỹachaxat qalaq, 'eeta'am ca leraxanaxat ca ỹaỹaten da leraxanaxac.
Qaq nagui ñanoldec naua so'onaxaataueguelo ỹa'aqtaqa da sanema ñi nta'a.
2Da 'aryacỹaxac ỹataqta napacalec na laỹe ỹalleppi,
qaq na 'ap qalaq chegaqaiguilo naua no'oñi na'aqtaqa,
ỹoqo'oye Ñim Lo'onatac 'Enauacna
nache 'eetai' da 'am huetalec naqa'en da lchoxonnataxanaxa.
3¡Ñaq 'auo'ogoxona da 'ara'amaqchec qataq da 'ayo'oxoyec,
da 'ana'achigui ca 'ainec 'am 'añaxaic!
¡Cha'aye nachera da ỹo'ot da 'ayo'oxoyec!
4Cha'aye de'era 'ayo'oxoyec nache chegoqchigui da queta da 'am 'añaxaic,
souaxat da 'auetteguelec da 'eesa lataxac,
qataq da huesota nataxac
qataq da nalochiguiñi lataxac.
Qaq na 'oiguishec 'arhuaq, qalaq ỹo'ot qome na lta'araic da llo'oxoyec.
5Qaq ana ỹaxarai 'archecnapi 'am nta'a,
ñaq ỹapacaviiguilo qome ana lquiyaqtepi na 'ampa'aguenaxauapi.
Qataq huañi qome nache huetañoto naua 'archel na ỹotta'a't shiỹaxauapi.
6Da 'aro'onataxanaxac 'am maye 'Aro'onatac 'Enauacna damaye chochaq tatec,
qaq de'era 'aro'onataxanaxac damaye ỹataqta nalochiguiñi.
7'Am ỹataqta 'auauotec da no'on, qalaxaye 'auaỹemec da qauem.
Qaq ỹoqo'oye 'am lca'ateua'a Ñim Lo'onatac 'Enauacna, Ñim 'Anatamnaxala',
da 'am talec naqa'en da 'antonaxac, qaq saq 'ena'am na 'araỹepi.
8Qaq 'enauac na 'ogoxot ỹataqta quichigui da laitaỹaxac na coraxat
maye chegaqaigui ana mirra, áloe, qataq ana canela.
Qataq da l-lamaxa ana nviquepi maye huo'oi naua lque'ete,
ỹo'ot da 'antonaxac da qouetaigui
ca nỹec lta'araic maye llo'oxoraxat na marfil.
9Qaq ca 'aro'onataxanaqa' da 'am nta'a
nache hueta'a ana llale na nta'alpi,
qaq na pa'aỹa'ague na 'oic nache hueta'a aca nate'e,
ỹaatañi ca no'otaxat maye chegaqaigui na oro.
10Ñaq aỹem 'ana'axaỹaxana 'am ỹalole,
ñaq 'ana'axaỹaxaachigui da shenapec:
Ñaq 'aucoua'aisalo qome caua 'arta'al qataq ca 'arhuo' le'ecpi,
11cha'aye ñi'iñi nta'a ỹataqta nqopita da 'aryacỹaxac,
qaq ñimaye nacheñi ñi 'arataxala',
qaq no'on da 'aualaxaguet qome ñimaye.
12Cha'aye ana llalpi ye Tiro le'ecpi,
qataq na ỹataqta sallaxanecpi, anac qome da 'am nda'a
na lachetaqtaxanaxatpi da yaqto' 'auo'otec ca ỹaỹamaqchiguiñi.
13Qaq ana llale ca nta'a mashe nnoxoneuo lỹateuo da lyacỹaxac,
ỹaatrañi naua alogo maye chegaqaigui na oro.
14Qataq na no'on llo'oxoraxat naua alogo
da qaỹauegueua'a ñi nta'a, nache ca'attaueegue
na qa'ampi maye nauochaxauapi anamaye.
15Nache lỹateuo da lamaicỹaxac qataq da ntonaxac,
da huenoxoneua'a ñi lma' lta'araic ñi nta'a.
16Qaq na 'aỹa'alaqpi nachena qome na talec
da lo'onataxanaxac so hua'au 'arta'alpi,
namayepi ilo'ogue qome 'anqa'en 'enauac na 'alhua.
17Qaq aỹem so'ot qome da nache 'eetai'
da lhuennataxat da 'are'enaxat 'enauac ca dalaxaic shiỹaxauapi,
ỹoqo'oye 'enauac qome na ỹotta'a't shiỹaxauapi
da chochaq tatec da 'am ỹo'oxoreetac.
