Salmos 47

₁Qami' ỹotta'a't shiỹaxauapi, qauaxañiỹa't naua qarhuaxayilli',

qavio'oxoyiñi Ñim Lo'onatac 'Enauacna qaua'alqaitai' da qantonaxaqui.

₂Cha'aye Ñim Nataxala', Ñim Nataỹaña 'enauacna,

Ñimaye ỹataqta huo'o da lchec, Ñimaye nacheñi

ñi lta'araic nta'a 'enauac na huetalec ana 'alhua.

₃Ñimaye qomi' ỹanema da seloxogue na ỹotta'a't shiỹaxauapi,

qataq da qomi' datato'oto na nhuo' le'ecpi.

₄Ñimaye iqataxanai' co'ollaxa yem ỹauotaique da qaralamaxat,

maye ỹo'ot da llo'oxoyec so Jacob, som lauotaxat Ñimaye.

₅Ñim Lo'onatac 'Enauacna maye Nataxala' huenotsheguem,

nache qaỹa'alaqtalec

qataq qaỹashiiyigui ana nasheerepi souaxat da tonaxac.

₆¡Qauo'oñi na no'onecpi,

qauo'onaxañiito'ot Ñim Lo'onatac 'Enauacna!

¡Qauo'oñi na no'onecpi,

qauo'onaxañiito'ot ñim qarta'a!

₇¡Cha'aye nacheñi ñi nta'a 'enauac ana 'alhua!

¡Ỹoqo'oye qauo'oñi ca ỹataqta 'onaxaic no'onec da qauo'onaxañiito'ot Ñimaye!

₈Ñim Lo'onatac 'Enauacna ilotague' 'enauac na ỹotta'a't shiỹaxauapi,

Ñim Lo'onatac 'Enauacna nso'ootangui añi qui'itta nso'onaxaqui.

₉Na 'amaqtaqaicpi maye lataxala'pi na ỹotta'a't shiỹaxauapi,

huaxaiguet na nhuo' le'ecpi maye lalamaxatpi Ñim Natamnaxala' so Abraham.

₁₀Cha'aye Ñim Lo'onatac 'Enauacna

lalamaxat nam 'amaqtaqaicpi maye huetalec ana 'alhua.

Ñimaye nataỹaña 'enauac na huetalecna.