Salmos 50

₁Ñim Nataxala', Ñim Lo'onatac 'Enauacna,

maye lataxala' 'enauac na atamnaxala'pi, Ñimaye detaqa,

qataq iỹaxana 'enauac na huetalec ana 'alhua,

nam neta'ague da yo'oxoñi qataq da avit.

₂Ñim Lo'onatac 'Enauacna 'eroigui,

chegoqchiguiña ye Sión na le'eraxa,

yem huaqta'a't nỹecpi maye ỹataqta nalochiguiñi qataq 'onaxaic.

₃Ñim Qanatamnaxala' anac, qalaxaye saishet da paltalec,

cha'aye Ñimaye na'auaxaata na norec maye nlaxaañi naqa'en 'enauacna,

qaq naua laỹel Ñimaye qalaq dellimigui na lta'araic la'at.

₄Qaq yem netaña maye qaỹoqotcheguema,

Ñim Lo'onatac 'Enauacna, nache huaña da iỹaxana

na piguem qataq ana 'alhua da yaqto' nachaateua'a

ca huaña da nmit na lalamaxatpi, 'eeta':

₅«Qalapoñiỹa't qome 'enauac na aỹem quetague',

nam aỹem naỹamaxate' co'ollaxa,

nache ỹavigaxat so lachetaqtaxanaxat da aỹem ỹanem.»

₆Nache na piguem ỹa'axat qome da Ñim Lo'onatac 'Enauacna,

nacheñi ñi nmit 'enauacna.

₇«Qami' ỹalamaxat nhuo' le'ecpi

ñaq aỹem qana'axaỹaxañiỹa da setaqa,

qami' Israel le'ecpi aỹem qami' sataỹa'agueta

da qami' shenapegalo, Aỹem maye Atamnaxala'

nachaỹem 'oonolec da aỹem Qanatamnaxala'ai.

₈Qalaxaye saishet da 'am sa'aloqchet

souaxat na 'arachetaqtaxanaxatpi

qataq souaxat na 'auavigaxat maye nache 'eetai' naxa da aỹem 'aỹa'aatacot.

₉Qalaxaye saishet da 'am seỹaxanot

da aỹem 'aỹa'anem ca 'arelo huaca llalec,

huo'otaq ca 'arelo quetaq lhuaraic

maye huetaigui añi laỹe' na 'arelopi,

₁₀cha'aye maiche ỹalamaxat 'enauac na shiguiỹacpi maye huauec,

qataq na shiguiỹacpi maye huetalec ana lcomaraxalatepi.

₁₁Qataq ỹalamaxat na maỹopi maye huetalec ana qasoxonaxapi.

Qataq 'enauac na queuotapeguelec na no'onaxa.

₁₂Qaq da huo'otaq seqouat qalaq saishet da 'am seỹaxaatacot,

cha'aye maiche ỹalamaqte ana 'alhua,

qataq 'enauac na huetalec anamaye.

₁₃Cha'aye ¿isheto' peta'a da sachec na lapat na huaca,

huo'otaq da ñeỹomtapiguilo naua ltago'q na quetaq lhuaraic?

₁₄Ỹoqo'oye 'aỹa'anot qome da 'ana'achecỹaxac Ñim Lo'onatac 'Enauacna,

qataq 'aupactelec ca 'aỹa'anot 'ara'aqtac Ñim Nataỹaña 'enauacna.

₁₅Qataq Aỹem 'aỹaxana qom huo'o ca 'anque'eenaxac,

nache aỹem qome 'am ñepaxattalec, huaña nache 'am aỹem 'avio'oxoreetac.»

₁₆Qaq ca qauemaic qalaq Ñim Lo'onatac 'Enauacna 'enapega, 'eeta':

«¿Negue't ca 'am ỹamaxalec da 'aua'axatta'ape naua iqataxaco,

qataq da 'aua'axattac da ñaỹamaxataxac?

₁₇Ye 'am sa 'auaỹamaxaren da 'am sachaxana ca 'arsomaxac

qataq qaica ca 'aỹa'anaiguilo naua ỹa'aqtaqa.

₁₈Cha'aye da 'aula'a ca cachaxaic nache 'annaicapegue',

qataq 'aralegaxaua na ncachetague' aca sa lhua.

₁₉Na qauem qalaq sa 'auarenalec da 'aua'axattac,

qataq ñi 'arachaxat lhuotta da ỹa'axattac na natenataxanaxacpi.

₂₀Qataq 'auasaxalec ca qauem 'ara'aqtac ca 'arỹa,

qataq 'ampa'aguene' ca maiche 'arqaỹa,

nache ỹataqta 'aunogoqchet.

₂₁Qaq 'ena 'enauac na 'auo'otpi, qalaxaye aỹem she'emaqtom,

qaq peta'a 'aupi'itaxaatega da 'am sheeta'am.

Qalaxaye nagui ỹataqta 'am seviraxato'ot,

nagui saỹamaxaayiñi naua 'arasouaxashe'ete.

₂₂Qaq qami' maye qaucouaỹa'ai Ñim Lo'onatac 'Enauacna

qauaỹaañita nagui de'era,

cha'aye sa iuena'a da qami' secolaxata'ape,

nache saishet da huo'o ca qami' iueeleguete.

₂₃Ca Aỹem ỹanot da na'achecỹaxac, camaye Aỹem ỹo'oxoren.

Qataq ca ỹaỹamaxatchiguiñi da lataxac,

nache sachaxana da ica'alaqtaxanaxac.»