Salmos 52

₁¿Ta'ainco' da 'año'oxoreetapigui na 'aye'etaxaloxosat, 'am 'añaxaic?

¡Ye da lsoxoyec Ñim Lo'onatac 'Enauacna damaye nache 'eetai'!

₂Qaq 'am nda'a't da 'auo'ottac na qauemsat,

na 'arachaxat qalaq 'eeta'am da llaxa ca ỹeelonec,

₃qataq 'agaqnauec na qauem da 'auauotec, saq 'ena'am ca no'on,

qataq 'auauotec ca shepegaxanaxac saq 'ena'am 'anqa'en ca 'eesa.

₄Qaq ñi 'arachaxat qalaq tenataxanaxaic,

ỹoqo'oye 'anqopitalo naua na'aqtaqa maye deque'emaqtaxa'n.

₅Qalaxaye Ñim Lo'onatac 'Enauacna

nataqa'en 'am ilaxachigui qome, Ñimaye 'am ỹaconeua'a qome,

'am ỹachegoxotchiguiña ca 'arma' da 'am ỹo'orauec,

qataq nqat da 'anachaalataxac.

₆Qaq na no'on da lataxac qom ỹauaachigui de'era,

nache ỹataqta huo'o da la'aalaxa, nache lashetac que'eca shiỹaxaua, 'eeta':

₇«Ña qauloỹa ñim saishet da nmitaique,

da ỹe'eguenot Ñim Lo'onatac 'Enauacna,

nacherata da pe'etega da lta'araic lsallaxa,

qataq nache queto'ot da lle'etaxaloxo.»

₈Qalaxaye aỹem sheeta'am aca qo'oipaq olivo,

maye darala da sootaña aca atamnaxaqui,

maye lalamaqte Ñim Lo'onatac 'Enauacna,

qataq nache 'eetai' da sepe'etega da lsoxoyec Ñimaye.

₉Qaq 'enauaque naua na'axa'te da 'am sho'oxoreetac,

souaxat na 'auo'otpi qataq 'am sacheto'ot da ñaquitaxac

da salectaigui na 'am quetague'pi,

cha'aye ỹataqta 'am soxoraic.