Da natamnaxac so huo'o da ncanaguec
1'Am Ñatamnaxala', ñaq 'aua'axaỹa qome da ñatamnaxac,
saishet qome da sa 'auqocha'a da ñachoxonnaxac.
2Ñaq aỹem 'auqocha'a qataq aỹem 'auasateguet,
souaxat de'era ñiqui'ic nache 'am seỹaxanot.
3Cha'aye aỹem iviloxolaqchet da lavilỹaxac
so depa'aguenataxaatac qataq da la'alaxac na qauemaicpi.
Cha'aye aỹem iỹoxolec na ñeque'eenaxaguesat,
qataq aỹem iloquiaxan souaxat da lalemataic.
4Añi iquiyaqte qalaq ỹataqta dasot,
cha'aye da lchec da nleuaxa aỹem ipataxañi.
5Nache ỹataqta aỹem iviloxolaqchet da icolanaxa,
nache ỹataqta aỹem ipataqta'a't da qaica ca 'ena'am lchec.
6Nache aỹem shenapec:
«Daiyaxa da huo'oi caua ỹaua't da sheeta'am na qoto',
nache ishettaxa da saỹo qataq ishet da ñematec.
7Da saỹo taxa nache qaỹoqtegue ca saigue,
nache ishet da sonaña ca toolec 'alhua.
8Qataq sa ñaỹaloxon da ñaneltaxaneguet,
na sansatteguet la'añaxac na la'at.»
9'Am Nataxala', 'aulaxachigui qome namayepi,
qataq sa naỹaana't 'anqa'en na la'aqtacpi,
cha'aye qaica ca lỹa sela'a nda'a't da loquiaxac,
qataq qaica ca nhuoteete' ca lỹa,
10cha'aye ye na'a'q qataq ye pe,
qalaq coleeta'asop na huaqta'a't nỹecpi.
Qaq ne'ena nỹecpi nache huetaigui
da loquiaxac qataq pa'aguenaxac,
11nache na qauemsat huetaigui namayepi,
nache naua nqa'aico qalaq nlaqchiguilo
da loquiaxac qataq da natenataxanaxac.
12Da anac taxa ca ñepa'aguenaxaua da aỹem inogoqchet,
qalaq aỹem ishettaxa da ña'añaxateguet,
qataq da aỹem dataỹa'aguet ca aỹem nquiỹatapega,
qalaq ishettaxa da ñeqañoxocheesop.
13Qalaxaye 'am ye maiche 'am ñenaigaxaua,
qataq ỹataqta 'am ñauochaxaua,
14nache 'am naxa da 'am ña'aqtaxaatague'
da ña'aqtaxanaqtapigui na sa qananoma lataxac,
qataq qaica ca machaqca da souaqta'a
añi atamnaxaqui maye lalamaqte Ñim Lo'onatac 'Enauacna.
15Qaq 'onaxaic taxa da choche ique'elaxatta qome
da l-leuaxa ne'ena ñepa'aguenaxauapi,
nache ñaq nca'altauec da tangui aca nhuachiqui,
cha'aye namayepi nache huetaigui na qauemsat.
16Qalaxaye aỹem seỹaxanot qome Ñim Lo'onatac 'Enauacna,
nache Ñim Nataxala' aỹem nca'alaxatec qome.
17Nache she'eguelaqto'ot qome Ñimaye
qataq ñeỹeeto'ot ye nte'eta qataq ye avit,
qaq Ñimaye hua'axaỹa qome de'era ivilỹaxac.
18Qaq da huo'o da loquiaxac qalaq aỹem mpaxattalec,
nca'alaxatec da ñachaalataxac,
na'aictaxa da qalota na ñepa'aguenaxauapi.
19Qaq Ñim Lo'onatac 'Enauacna ñim choche tatec da ilotague' 'enauacna,
Ñimaye aỹem hua'axaỹa qome, nache huetaiya' naqa'en namayepi,
cha'aye namayepi saishet da naralaxat de'era lataxac,
qataq saishet da ñe'etega Ñim Lo'onatac 'Enauacna.
20Cha'aye namayepi nauaxaỹaxaasheguem na lhuaq
da irota'a ca maiche nauochaxaua,
qataq saishet da ipagueleguete naua la'aqtaqa.
21Naua la'aqtaqa qalaq isotta'ape 'eeta'ama na da'añiỹa'a't huaca lche',
qalaxaye naua lhuennataxaco nda'a't da nalaataxac.
Do'onataxanalo naua la'aqtaqa isotta'ape 'eeta'am na aceite,
qalaxaye naamaye da llaxa 'eeta'am na ỹeelonec.
22'Aupa'axano'ot qome Ñim Nataxala' 'enauac na 'auennatapegapi,
nache Ñimaye ỹataqta 'am lasoqchiguiñi qome,
cha'aye Ñimaye saishet da huañi naqa'en ca no'on da lataxac.
23Qaq 'Am Ñatamnaxala',
na laataxanaxaicpi qataq tenataxanaxaicpi,
saishet da nache 'eetai' 'anqa'en da nca'altauec,
saishet da ivira'a 'anqa'en ca laiñi da nachaalataxac,
namayepi tangui 'anqa'en na pa'aguiñi aca nhuachiqui.
Aỹem qalaxaye ỹataqta 'am sepi'iỹa'a.
