Qanatamnot Ñim Lo'onatac 'Enauacna
1'Am Ñatamnaxala', aỹem 'auchoxoren qome,
cha'aye huo'o na aỹem icaatac, qataq 'enauaque
naua na'axa'te da aỹem iloquiaxaatac qataq aỹem ỹachetaiya'.
2Ỹataqta imerauec naua na'axa'te
da aỹem icaatac na ñepa'aguenaxauapi,
ỹataqta qalota na ño'oxonnaxaicpi na aỹem iloquiaxaatac.
3Qaq naxa da huo'o de'era icolanaxa,
nache ỹataqta 'am sacheto'ot da ipi'iỹaxac.
4Aỹem ỹataqta sepi'iỹa'a Ñim Lo'onatac 'Enauacna
qataq sho'oxoreetac da la'aqtac. Aỹem ỹataqta sepi'iỹa'a
Ñim Lo'onatac 'Enauacna qataq qaica da huo'o ca icolanaxa,
¿negue'tom ca ishet da aỹem ỹo'otec ca choche shiỹaxauatto?
5Ỹataqta imerauec naua na'axa'te,
da aỹem ique'emaqche't naua la'aqtaqa,
qataq nacherata da lhuennataxa,
da aỹem ỹo'otec ca qauem.
6Namayepi nqañoxottañi nache aỹem nauaatac
cha'aye ỹataqta huo'o da lyaxa da aỹem ỹalauat,
nache imeteetac 'enauac na so'ottacpi.
7Qaq 'Am Ñatamnaxala',
ỹataqta huetaiya' 'anqa'en qome ne'ena ỹotta'a't shiỹaxauapi,
'aurolec de'era 'aralemataic da yaqto' saishet da ỹet,
ca nhuaxanaguec da lle'etaxaloxo.
8Ñaq 'auennata'a qome na huañapi da satauec,
qataq 'ettalec aca 'ere naua ỹache' naxa da ñeỹeetac,
¿cha'aye saisheto' peta'a da saq 'ettalec aca 'ere de'era ñenoinaxac?
9Da ivita da 'am seỹaxanot da aỹem 'autauan,
nache maiche datauec na ñepa'aguenaxauapi.
Cha'aye saỹateeta da aỹem qoueta'aguet 'Am Ñatamnaxala'.
10Ỹataqta sepi'iỹa'a Ñim Lo'onatac 'Enauacna qataq sho'oxoreetac da la'aqtac,
ỹataqta sepi'iỹa'a Ñim Nataxala' qataq sho'oxoreetac da la'aqtac.
11Ỹataqta sepi'iỹa'a Ñim Lo'onatac 'Enauacna qataq qaica da huo'o ca icolanaxa,
cha'aye ¿negue'tom ca ishet da aỹem ỹo'otec ca choche shiỹaxauatto?
12'Am Ñatamnaxala', na ỹa'aqtacpi maye 'am sanot co'ollaxa,
namayepi sepacchigui qome da 'am sho'oxoreetac.
13Cha'aye aỹem 'anca'alaxateeguesop da nleuaxa.
Cha'aye aỹem 'anca'alaxateeguesop da yaqto' saishet da souañi.
Yaqto' da ñachaalataxac quetaigui na yo'oqchiguiñi,
da sooto'ot Ñim Lo'onatac 'Enauacna.
