Atamnaxac da qaiỹaxaataique ca ntaunaxanaxac
1'Am Qanatamnaxala', qomi' qoca'aisalo co'ollaxa,
qataq qomi' 'anlaxaayiñi souaxat da 'aralemataic,
qaq nagui qalaq qomi' 'anauaxaỹaxaayishegue'm qome.
2Qataq 'auacholaxan co'ollaxa ana 'alhua,
nache colaxagui 'anqa'en, qalaxaye 'avi'eguelaxara't nagui,
ten huotaique da qalagoxora't anamaye.
3Nache qomi' nhuo' le'ecpi maye qomi' 'aralamaxatpi,
qomi' 'aỹa'anegueta na sansatta qañe'eguenataguecpi,
qataq qomi' 'aỹa'anema na lataxa, maye qomi' ỹe'etaxaloqche't.
4Qataq 'aucoyeguen na 'am ỹauotec da naneltaxan,
da yaqto' ishet da nca'aleeguesop 'anqa'en ana checnapi.
5Qataq 'auo'ogoxona qome na 'arhuaq 'oiguishec
da qomi' 'anca'alaxatrec, ñaq qomi' 'auasategueta,
yaqto' na 'arauotaxat nhuo' le'ecpi nca'alec.
6Ñim Lo'onatac 'Enauacna ỹan da la'aqtac
huaña so npe'l maye lanataqa', 'eeta':
«Ỹataqta samachiguiñi qom ivita da secolaxatapigui na 'alhua ye Siquén,
qataq da sanec na ca'amapega't 'alhuapi ye Sucot.
7Ye Galaad qataq Manasés yeemaye ỹalamaqa'ate,
qaq ye Efraín 'eeta'am aca aro'o maye ỹapotalec na iqaic.
Qaq ye Judá qalaq 'eeta'am ca ñepon da samaxasoxonapec.
8Qaq ye Moab qalaq 'eeta'am ca laỹe' na 'etaxat
da yaqto' seỹoi' naua ihua'q, qaq ye Edom
qalaq sasaxanguilo naua ỹapela'ate.
Qaq ye 'alhua Filistea huaña da sa'alaqtai' souaxat da soxonaxan.»
9¿Negue'tom ca ishet da aỹem ỹauegueua'a
ye huaqta'a't nỹecpi maye huo'o na lpaqtaxat?
¿Negue't ca aỹem ỹachaxana ca nqa'aic maye taỹaua'a ye Edom?
10Cha'aye ¿saisheto' da saq nache 'Am Atamnaxala' da qomi' sa 'auoonegueta,
qataq saishet da 'annaictague' na qanalleppi?
11Qaq ỹoqo'oye qomi' 'autaua'n nagui,
da sataỹaqa'aguet na qampa'aguenaxauapi,
cha'aye qaica ca naigui da ltaunaxanaxac
ca yo'oqchigui shiỹaxaua.
12Qaq de'era ltaunaxanaxac Ñim Lo'onatac 'Enauacna,
ỹo'ot da lta'araic na so'otaqpi,
cha'aye Ñimaye huetaiya' naqa'en,
na qampa'aguenaxauapi.
