Ñim Lo'onatac 'Enauacna nacheñita ñe'eguenaxala'
1Ñim Lo'onatac 'Enauacna nacheñita da nlletañi da ñachaalataxac,
cha'aye Ñimaye nache chegoqo'ot da ica'alaxa.
2Nacheñita Ñimaye da aỹem mpaxattalec,
qataq ica'alaxaqui, qataq ỹe'eguenaxala',
nache saishet qome da souañi.
3Qaq qami' ñaq aỹem qaỹa'axañiiñi qome da aỹem qauloquiaxañiitac,
qataq da qansheetaique da semeuo qanqa'eñi,
sheeta'am na laỹe ca nỹec da huotaique da hua'axauec.
Qataq sheeta'am ca mpaqtaxanaxat da huotaique da hua'axañi.
4Qataq nda'a't da qarhuennataxaqui da aỹem qauamaqaiñi,
qataq qanqopichiỹa da natenataxanaxac.
Qataq ndotrec naua qara'aqtaqalle'
da aỹem qavio'oxoyiñiitac, qalaxaye da qarhuennataxaqui
aỹem ilattapiguiñi.
5Ñim Lo'onatac 'Enauacna nacheñita da nlletañi da ñachaalataxac,
cha'aye Ñimaye nache chegoqo'ot da ñaquitaxac.
6Nacheñita Ñimaye da aỹem mpaxattalec,
qataq ica'alaxaqui, qataq ỹe'eguenaxala',
nache saishet qome da souañi.
7Ñim Lo'onatac 'Enauacna nacheñi ñi ica'alaxaqui qataq ỹo'ot da ỹo'oxoyec.
Nacheñi ñi ỹo'ot da ỹa'añaxac qataq nacheñi ñi ỹe'eguenaxala'.
8Qaq qami' ihuo' le'ecpi nache 'eetai' qome
da qaupi'iitega Ñimaye, ỹataqta qaumachiỹo'ot
da qarquiyaqteỹaxaqui da qanatamñiitacot
cha'aye Ñim Lo'onatac 'Enauacna nacheñi Ñim qaye'eguenaxala'.
9Qaq ỹataqta 'eesa da ca shiỹaxaua qaica ca naigui,
ca choxoraq qataq ca sallaxanec da qaỹacherangui,
aca naloqnaxanaxaqui da qanaloqte'n,
nache qaica ca lsallaqa'.
10Saishet qome da qaupi'iitega da loquiaxac,
saishet da qaỹa'agaqñiỹauec da ncachaxac,
da ivita da nquictasheguem da qarsallaqai,
qalaq saishet da qaumachiỹalec da qarquiyaqteỹaxaqui damaye.
11Huo'o so na'a'q detaqa Ñim Lo'onatac 'Enauacna,
qataq dos da sa'aqchigui da 'eeta':
«Ñim Lo'onatac 'Enauacna lalamaxat da na'añaxac,
12qataq Ñimaye lalamaxat da nsoxoyec,
qataq da isheeten ñi 'oonolec, qalaq ipacchigui naqa'en ca lo'onataxanaxac.»
